ప్రజాస్వామ్య స్పూర్తిని కాపాడండి,,,ఈసీని కోరిన ఎంపీ రఘురామకృష్ణరాజు
Andhra Pradesh Telugu | Suryaa Desk | Published : Tue, Jul 12, 2022, 01:45 PM
ప్రజాస్వామ్య స్ఫూర్తిని కాపాడాలంటే వైఎస్సార్‌సీపీ జీవితకాల అధ్యక్ష నియామకాన్ని నిలిపివేయాలని భారత ఎన్నికల సంఘాన్ని ఆ పార్టీ రెబల్ ఎంపీ రఘురామకృష్ణరాజు కోరారు. ఈసీఐ అధికారులను కలిసి లేఖ అందజేశారు. వైసీపీ కి కొత్త తలనొప్పి వచ్చి పడేలా కనిపిస్తోంది. ఇటీవల జరిగిన ప్లీనరీలో పార్టీ జీవితకాల అధ్యక్షుడిగా జగన్‌ ను ఎన్నుకున్న సంగతి తెలిసిందే. ఈ వ్యవహారంపై స్పందించిన ఆయన ఏకంగా ఈసీని కలిశారు.
పార్టీ జీవితకాల అధ్యక్ష నియామక తీర్మానం ద్వారా 1951 ప్రజాప్రాతినిధ్య చట్టంలోని ప్రాథమిక నిబంధనలను ఉల్లంఘించారని ఫిర్యాదులో పేర్కొన్నారు. పార్టీలో క్రియాశీల సభ్యుడిగా ఉన్న తాను ఈ విషయాన్ని తెలియజేస్తున్నానని.. చట్ట స్ఫూర్తికి విరుద్ధంగా ప్లీనరీలో జీవితకాల అధ్యక్ష తీర్మానాన్ని ఆమోదించారని చెప్పుకొచ్చారు. పార్టీ నిబంధనావళి ప్రకారం అంతర్గత ఎన్నికలు నిర్వహించాల్సి ఉందని.. దానిని మార్చిన సమాచారం ప్లీనరీలో తెలియజేయలేదన్నారు.
ఎట్టి పరిస్థితుల్లోనూ జీవితకాల అధ్యక్ష నియామకానికి అనుమతించొద్దని లేఖలో కోరారు. పార్టీ పేరు మార్పుపై రెండు ప్రత్యామ్నాయ పేర్లను సూచించారు., అప్పటికే నమోదు అయినందున ఆ పేర్ల విషయంలో గతంలోనే కమిషన్‌ ప్రతికూలత వ్యక్తం చేసిందని లేఖలో ప్రస్తావించారు. మొత్తానికి వైఎస్సార్‌సీపీకి మరో కొత్త తలనొప్పి తెచ్చే పనిలో ఉన్నారు రఘురామ.
|
|