నా పేరుతో ఉన్న నకిలీ స్టికర్ తో ఓ వ్యక్తి బెదరింపులు...చర్యలు తీసుకోండి: ఎంపీ కేశినేని నాని

తన సొంత సోదరుడిపై ఎంపీ కేశినేని నాని కంప్లైట్ చేసినట్లు ప్రచారం సాగుతోంది. విజయవాడలో కేశినేని బ్రదర్స్ మధ్య వివాదం మరింత ముదురుతోంది. ఎంపీ స్టిక్కర్ వివాదంపై నాని స్పందించారు.. ఎంపీ కార్ స్టిక్కర్‌ను నకిలీది సృష్టించారని ఆరోపించారు. ఎంతో కాలంగా తన పేరుతో నకిలీ కారు స్టిక్కర్‌ను ఉపయోగిస్తున్నారని.. రియల్ ఎస్టేట్ వ్యాపారం చేస్తున్న వ్యక్తి ఎంపీ స్టిక్కర్ పేరుతో బెదిరింపులు, మోసాలకు పాల్పడుతున్నారని చెప్పుకొచ్చారు. పార్లమెంట్‌లో ఒక ఎంపీకి ఒక్క స్టిక్కర్ మాత్రమే ఇస్తారని.. నకిలీ స్టిక్కర్ వ్యవహారంపై ఆధారాలతో సహా పార్లమెంట్ సెక్రటరీ జనరల్‌కు ఫిర్యాదు చేసినట్లు తెలిపారు. లోక్ సభ అధికారుల సూచనతో తెలుగు రాష్ట్రాల డీజీపీలకు ఫిర్యాదు చేశానని, ఇక్కడ రాజకీయాలతో సంబంధం లేదన్నారు. తన పేరుతో ఉన్న స్టిక్కర్ ను దుర్వినియోగం చేస్తున్నారని ఫిర్యాదు చేశానన్నారు.

కేశినేని నాని తన తమ్ముడు చిన్నిపై పోలీసులకు ఫిర్యాదు చేసిన సంగతి తెలిసిందే. తన ఎంపీ స్టిక్కర్‌ను కారుకు అంటించారని.. అది నకిలీది అంటూ పోలీసులకు కంప్లైంట్ చేయడంతో కేసు నమోదైంది. ఈ ఎపిసోడ్‌పై కేశినేని చిన్ని స్పందించారు. తన సోదరుడు నానితో ఎప్పుడూ విభేదించలేదన్నారు. కుటుంబంలో వివాదాలు సహజమని.. కానీ చిన్న విషయాన్ని ఇంత దూరం తీసుకెళ్లడం సరికాదన్నారు. తన భార్యను వివాదంలోకి లాగారని.. అదే తనను బాధించిందన్నారు. హైదరాబాద్ పోలీసులు తన కారు వ్యవహారంలో ఆరా తీశారని, అనంతరం తిరిగి కారును ఇచ్చేశారన్నారు. తాను వ్యాపారులెవరిని బెదిరించలేదని.. ఇన్నాళ్లుగా లేనిది ఈ రెండు నెలల నుంచే ఆరోపణలు ఎందుకు వచ్చాయని ప్రశ్నించారు. ఇది కుటుంబ సమస్యగా వ్యాఖ్యానించిన ఆయన.. దీనికి పార్టీకి, చంద్రబాబు, లోకేష్‌లకు సంబంధం లేదని చెప్పుకొచ్చారు.