కొత్త అధ్యక్షుడు వచ్చినా అదుపులోకి రాని ఆందోళనలు

శ్రీలంక రాజకీయ సంక్షోభానికి తెరపడేదెపుడూ అన్నది ప్రస్తుతం చర్చాంశనీయంగా మారింది. కొత్త అధ్యక్షుడి రాకతో శ్రీలంక రాజకీయ సంక్షోభం ఒక కొలిక్కి వస్తుందని భావించినా.. తాజా పరిస్థితులు చూస్తుంటే అలా కనిపించట్లేదు. కొలంబోలో రణిల్ విక్రమసింఘెకు వ్యతిరేకంగా ఆందోళనకారులు నినాదాలు చేస్తున్నారు. అధ్యక్ష కార్యాలయం బయట పెద్ద సంఖ్యలో గుమిగూడి ఆయనకు వ్యతిరేకంగా నినాదాలు చేస్తున్నారు. శ్రీలంకకు గతంలో ఆరు సార్లు అధ్యక్షుడిగా పనిచేసిన రణిల్ విక్రమసింఘెపై ప్రజల్లో తీవ్రమైన వ్యతిరేకత ఉంది.

రాజపక్స కుటుంబ పాలనతో విసిగిపోయిన లంక వాసులు.. సోదరులిద్దరూ అధ్యక్ష, ప్రధాని పదవులను నుంచి గద్దె దిగే వరకూ తీవ్ర స్థాయిలో ఆందోళనలు చేసిన విషయం తెలిసిందే. దీంతో గొటబాయ రాజపక్స అధ్యక్ష పదవి నుంచి దిగిపోయి దేశం విడిచి పారిపోవాల్సి వచ్చింది. ఆ తర్వాత రణిల్ విక్రమసింఘె తాత్కాలిక అధ్యక్షుడిగా కొనసాగుతున్నారు. తాజాగా జరిగిన ఎన్నికల్లో ఆయన అధ్యక్షుడిగా ఎన్నికయ్యారు.

అధ్యక్షుడి ఎన్నికైన తర్వాత రణిల్ విక్రమసింఘె తొలిసారిగా పార్లమెంట్‌లో మాట్లాడారు. దేశం తీవ్ర సంక్షోభ పరిస్థితులను ఎదుర్కొంటోందని.. తమ ముందు పెను సవాళ్లున్నాయని ఆయన అన్నారు. సంక్షోభ నివారణకు అందరం కలిసి పనిచేయాలని పిలుపునిచ్చారు.

ఆర్థిక సంక్షోభంలో కూరుకుపోయిన శ్రీలంకకు కొత్త అధ్యక్షుడు  వచ్చారు. బుధవారం (జులై 20) ఉదయం శ్రీలంక పార్లమెంట్‌లో జరిగిన ఓటింగ్‌లో యూఎన్‌పీ పార్టీ అధినేత రణిల్ విక్రమసింఘె శ్రీలంక కొత్త అధ్యక్షుడిగా ఎన్నికయ్యారు. రహస్య బ్యాలెట్‌ విధానంలో జరిగిన ఈ ఎన్నికలో రణిల్ విక్రమసింఘెకు 134 ఓట్లు దక్కాయి. ప్రత్యర్థి దులస్‌ అలహాప్పెరుమాకు 82 ఓట్లు వచ్చాయి. మరో అభ్యర్థి అనుర కుమార 3 ఓట్లతో సరిపెట్టుకున్నారు. శ్రీలంక పాార్లమెంట్‌కు మొత్తం 225 స్థానాలున్నాయి. మెజార్టీ మార్కు కోసం కావాల్సిన సంఖ్య 113 కాాగా.. రణిల్ విక్రమసింఘెకు అంతకంటే 21 ఓట్లు ఎక్కువగా దక్కాయి.