ఇలా మండటం..చరిత్రలో ఇదే మొదటి సారి

ఎండలు ఎలా ఉంటాయో భారతీయులందరికీ తెలుసు.  కానీ బ్రిటన్ వాసులుకు ఇది కాస్త కొత్తగా కనిపిస్తోంది. తాజాగా ఎన్నడూలేని విధంగా ఎండలకు బ్రిటన్ దేశం మండిపోతోంది. బ్రిటన్ చరిత్రలో ఎన్నడూ లేని విధంగా ఈ ఏడాది గరిష్ట ఉష్ణోగ్రతలు నమోదవుతున్నాయి. తూర్పు ఇంగ్లాండ్‌లోని కానింగ్స్‌బైలో మంగళవారం 40.3 డిగ్రీల ఉష్ణోగ్రత నమోదైందని యూకే వాతావరణ శాఖ వెల్లడించింది. 2019లో 38.7 డిగ్రీల ఉష్ణోగ్రత నమోదు కావడమే ఇప్పటి వరకూ బ్రిటన్‌లో అత్యధిక ఉష్ణోగ్రత. కానీ మంగళవారం ఆ రికార్డు చెరిగిపోయింది. మంగళవారం ఏకంగా బ్రిటన్‌లోని 29 ప్రదేశాల్లో రికార్డ్ స్థాయిలో ఉష్ణోగ్రతలు నమోదయ్యాయి. ఒక్క బ్రిటన్‌లోనే కాదు.. జర్మనీ, బెల్జియం, పోర్చుగల్ తదితర దేశాల్లోనూ ఎండలు ఠారెత్తిస్తున్నాయి. ఫ్రాన్స్, స్పెయిన్, పోర్చుగల్ తదితర దేశాల్లో దావాగ్ని అడవులను దహిస్తోంది.

ఎండలు, వేడి గాలుల ప్రభావం ప్రయాణాలు, హెల్త్ కేర్, స్కూళ్లపై పడింది. శీతల ప్రాంతం కావడంతో బ్రిటన్‌లోని చాలా ఇళ్లు, చిన్న వ్యాపార సముదాయాలు, పబ్లిక్ బిల్డింగ్‌లు, హాస్పిటళ్లలో ఏసీలు లేవు. కానీ అసాధారణ ఉష్ణోగ్రతలు నమోదవుతుండటంతో ఫ్యాన్ల అమ్మకాలు పెరిగాయి. మానవ ప్రమేయంతో కూడిన వాతావరణ మార్పుల వల్లే ఇలాంటి పరిస్థితి తలెత్తిందని లేదంటే.. తమ దేశంలో ఇలాంటి ఉష్ణోగ్రతలు దాదాపు అసాధ్యమని బ్రిటన్ వాతావరణ విభాగం చీఫ్ సైంటిస్ట్ స్టీఫెన్ బెల్చర్ అభిప్రాయపడ్డారు. కర్బన ఉద్గారాల విషయంలో తీవ్ర చర్యలు తీసుకోకపోతే.. ప్రతి మూడేళ్లకోసారి ఇలాంటి అసాధారణ ఉష్ణోగ్రతలను చూడాల్సి వస్తుందని ఆయన హెచ్చరించారు.

సోమవారం ఎండ వేడిమి కారణంగా లండన్‌లోని లూటన్ ఎయిర్‌పోర్ట్ రన్‌వే దెబ్బతింది. దీంతో చాలా సేపు రన్ వేను మూసివేయాల్సి వచ్చింది. మంగళవారం ఎండల తీవ్రత కారణంగా దేశంలోని ప్రధాన రైల్వే స్టేషన్లు దాదాపు ఖాళీగా కనిపించాయి. రైలు పట్టాలు దెబ్బతినే ప్రమాదం ఉండటంతో కొన్ని రైళ్లను రద్దు చేయగా.. మరి కొన్ని రైళ్లు నెమ్మదిగా ప్రయాణాలు సాగించాయి. అసాధారణ వేడి కారణంగా లండన్‌లో మంటలు అంటుకుంటున్నాయి.

స్పెయిన్, పోర్చుగల్‌లో వడగాలుల కారణంగా 750 మంది ప్రాణాలు కోల్పోయారు. ఫ్రాన్స్‌లోని జిర్నోడ్ ప్రాంతంలో దావాగ్నిని ఆర్పేందుకు 2 వేల మందికిపైగా అగ్నిమాపక సిబ్బంది శ్రమిస్తున్నారు. పోర్చుగల్‌లోని పిన్హావోలో ఇటీవల 47 డిగ్రీల సెల్సియస్ ఉష్ణోగ్రత నమోదైందని ‘ది పోర్చుగల్ న్యూస్’ వెల్లడించింది. 2003 ఆగస్టు 1న పోర్చుగల్‌లోని అమరీలిజలో 47.3 డిగ్రీల సెల్సియస్ ఉష్ణోగ్రత నమోదు కాగా.. ఇప్పుడు మళ్లీ ఆ స్థాయిలో ఉష్ణోగ్రతలు నమోదు కావడం గమనార్హం.

ఇదిలావుంటే ఇంగ్లాండ్‌లో తొలిసారిగా.. దక్షిణాన ఉన్న లండన్ నుంచి ఉత్తరాన ఉన్న మాంచెస్టర్, లీడ్స్ వరకు మంగళవారం రెడ్ అలర్ట్ జారీ చేశారు. ఎండల కారణంగా ఆరోగ్యవంతులు కూడా చనిపోయే ప్రమాదం ఉందని వాతావరణ శాఖ హెచ్చరించింది. ఇంగ్లాండ్‌లో పారిశ్రామిక విప్లవం కంటే ముందు రోజులతో పోలిస్తే.. దాదాపు 10 రెట్లు ఎక్కువగా ఉష్ణోగ్రతలు నమోదయ్యే పరిస్థితులు వచ్చాయని అధ్యయనాలు చెబుతున్నాయి.