రష్యా మిలటరీ కార్గో షిప్‌ను అదుపులోకి తీసుకొన్న భారత నౌకదళ అధికార్లు

ఇంధన బిల్లుల ఎగవేత కేసులో రష్యా మిలటరీ కార్గో షిప్‌ను కొచ్చి సమీపంలో అదుపులోకి తీసుకున్నారు. భారత నౌకాదళం కోసం ఆయుధాలను మోసుకొచ్చిన తమ కార్గో నౌకను కొచ్చి పోర్టులో అదుపులోకి తీసుకున్న విషయం తెలుసని భారత్‌లోని రష్యా ఎంబసీ మంగళవారం వెల్లడించింది. ఈ విషయమై వివరణ ఇవ్వాలని భారత విదేశీ వ్యవహారాల శాఖను ఇప్పటికే కోరామని తెలిపింది. రష్యా షిప్ యజమానులు, సిబ్బంది హక్కుల విషయమై ఆంక్షలు లేకుండా చూడాలని కోరింది.

షిప్ ఓనర్లకు రుణాలు ఉన్నాయని, ఇస్తోనియన్ షోర్ సర్వీస్ కంపెనీ బంకర్ పార్ట్నర్ ఓయూ ఆరోపణలతోనే షిప్‌ను అదుపులోకి తీసుకున్నారని ప్రాథమికంగా తెలుస్తోంది. రుణాలపై కోర్టులో వేసిన దావాకు షిప్ నుంచి సరకును అన్‌లోడ్ చేయడానికి సంబంధం లేదని.. కోర్టు కూడా కార్గో దింపడానికి అనుమతి ఇచ్చిందని రష్యన్ ఎంబసీ గుర్తు చేసింది. ఈ విషయమై చెన్నైలోని రష్యన్ కాన్సులేట్ జనరల్ సంప్రదింపులు జరుపుతోందని తెలిపింది.

రష్యా నౌక MV MAIA-I రూ.1.87 కోట్ల విలువైన ఇంధన బిల్లులు చెల్లించకపోవడంతో ఇస్తోనియన్ కంపెనీ కేరళ హైకోర్టును ఆశ్రయించింది. ఇస్తోనియన్ కంపెనీ వాదనలు విన్న న్యాయస్థానం.. షిప్‌ను సీజ్ చేయాలని ఆదేశించింది. ఆ షిప్‌ ఇండియన్ నేవీకి ఆయుధాలను తీసుకొని రావడంతో.. వాటిని నౌక నుంచి దింపడానికి కోర్టు అనుమతిచ్చింది.

బంకర్ పార్ట్నర్ ఓయూ సంస్థ ఇస్తోనియా కేంద్రంగా కార్యకలాపాలు సాగిస్తోంది. బిల్లుల ఎగవేత విషయమై కొచ్చిన్‌లో ఆ సంస్థ పవర్ ఆఫ్ అటర్నీ ఉన్న టీఎక్స్ హ్యారీ.. రష్యా షిప్‌పై హైకోర్టులో దావా వేశారు. స్పందించిన న్యాయస్థానం అరెస్ట్ వారంట్ జారీ చేయడంతోపాటు.. కొచ్చి పోర్టులో ఉన్న నౌకను అదుపులోకి తీసుకొని సీజ్ చేయాలని డిప్యూటీ కన్జర్వేటర్‌ను ఆదేశించింది.