వాట్సాప్ ఛాట్‌బోట్ ద్వారా ఉబర్ సేవలు అందుబాటులోకి

ఉబర్ తన  కస్టమర్ల కోసం పలురకాల  వినూత్న సేవలను అందుబాటులోకి తీసుకొస్తోంది. తాజగా ఉబర్ కంపెనీ వాట్సాప్‌ భాగస్వామ్యాన్ని మరింత విస్తరించింది. ఈ భాగస్వామ్యంలో ఢిల్లీ, ఎన్‌సీఆర్ ప్రాంతాల్లోని యూజర్లు అధికారిక వాట్సాప్ ఛాట్‌బోట్ ద్వారా ఉబర్‌ రైడ్‌ను బుక్ చేసుకోవచ్చు. హిందీ, ఇంగ్లీష్ భాషలలో ఈ వాట్సాప్ ఛాట్‌బోట్ అందుబాటులో ఉంటుంది. దీని కోసం వాట్సాప్ టూ రైడ్(WA2R) ప్రొడక్టు ఫీచర్‌ను మరింత విస్తరిస్తున్నట్టు ఉబర్ ప్రకటించింది. తొలుత ఈ ఫీచర్‌ను డిసెంబర్ 2021లో లక్నోలో పరీక్షించింది. ‘వాట్సాప్ బిజినెస్‌ ప్లాట్‌ఫామ్‌పై అభివృద్ధి చేసిన ఈ ఫీచర్‌.. రెండు భాషల ద్వారా సరికొత్త సెగ్మెంట్ కస్టమర్లను ఉబర్ మొబిలిటీ సర్వీసులు చేరుకునేందుకు ఉపయోగపడుతుంది’ అని కంపెనీ తెలిపింది.

లక్నోలో జరిపిన పైలట్‌ ప్రొగ్రామ్‌లో ఉబర్ ప్లాట్‌ఫామ్‌పైకి వచ్చిన 33 శాతం మంది కొత్త యూజర్లేనని, ఈ భాగస్వామ్యం ద్వారా కొత్త యూజర్ల అక్విజిషన్ పొందవచ్చని కంపెనీ తెలిపింది. ఢిల్లీ ఎన్‌సీఆర్ మార్కెట్లో కూడా ఈ భాగస్వామ్యాన్ని కుదుర్చుకోవడంతో.. ఇప్పటి వరకు చేరుకోని మార్కెట్‌ కూడా ఉబర్ అనుభవాన్ని పొందేందుకు ఉపయోగపడుతుందని చెప్పింది. లోకల్ మార్కెట్ అవసరాలకు అనుగుణంగా వాట్సాప్ ద్వారా రైడ్ బుక్ చేసుకునేటప్పుడు హిందీ లాంగ్వేజ్ సపోర్టును కూడా తమ టీమ్ అందిస్తుందని ఉబర్ మొబిలిటీ, ప్లాట్‌ఫామ్స్ సీనియర్ డైరెక్టర్ మనికందన్ తంగరత్నం అన్నారు.

వాట్సాప్ ద్వారా రైడ్ ఇలా బుక్ చేసుకోవాలి..

తొలుత వాట్సాప్ నుంచి ఉబర్ బిజినెస్ అకౌంట్ నెంబర్‌కి మెసేజ్ చేయాలి. క్యూఆర్ కోడ్ స్కాన్ చేయాలి. ఉబర్ వాట్సాప్ ఛాట్ తెరుచుకునేందుకు నేరుగా లింక్‌ను క్లిక్ చేయాలి. పికప్, డ్రాప్ లొకేషన్లను ఉబర్ యూజర్లను అడుగుతుంది. ఆ తర్వాత ఎంత ఛార్జ్ అవుతుంది, డ్రైవర్ ఏ సమయం కల్లా మిమ్మల్ని పిక్ చేసుకుంటాడో తెలుపుతుంది.

ఉబర్ యాప్ నుంచి నేరుగా ఎవరైతే ట్రిపులను బుక్ చేసుకుంటారో.. వారికి లభిస్తోన్న సేఫ్టీ ఫీచర్లు, ఇన్సూరెన్స్ ప్రొటెక్షన్ వీరికి కూడా వర్తిస్తుంది. బుకింగ్ సమయంలో డ్రైవర్ పేరు, లైసెన్స్ ప్లేట్ కనిపిస్తుంది. డ్రైవర్ పికప్ పాయింట్ నుంచి చేరుకునే వరకు లొకేషన్‌ ట్రాక్ చేసుకోవచ్చు. ఈ ట్రిపులో ఏదైనా సమస్య తలెత్తితే.. ఎమర్జెన్సీ ఆప్షన్ సెలక్ట్ చేయాలి. లేదంటే హెల్ప్ ఆన్ ట్రిప్ అని టైప్ చేసినా సరిపోతుంది. ఆ తర్వాత ఉబర్ కస్టమర్ సపోర్టు టీమ్ నుంచి కాల్ వస్తుంది.