రోజాకు గురువుగా భవిష్యత్ ఇచ్చిన శివప్రసాద్

చిత్తూరు మాజీ ఎంపీ శివప్రసాద్ మృతి టాలీవుడ్ ని సైతం విషాదంలోకి నెట్టింది. తనదైన నటనతో ముద్ర వేసుకున్న శివప్రసాద్ దర్శకుడిగా కూడా సత్తా చాటారు. భారతీరాజా శిష్యుడిగా వెండితెరకు పరిచయం అయిన శివప్రసాద్ ఎందరికో గురువుగా మారారు. అలా వెండితెరకు పరిచయమై అటు నుండి రాజకీయ రంగ ప్రవేశం చేసిన ఏపీ ఫైర్ బ్రాండ్ శ్రీలతకి తనే గురువు. శ్రీలతనా తనెవరు అనే కదా... అవును శ్రీలత అంటే ఎవరికి తెలియదు కూడా అదే రోజా అని చెప్పగానే వామ్మో ఫైర్ బ్రాండా అంటారు. అవును రాజకీయాల్లో తనకంటూ ప్రత్యేక గుర్తింపును తెచ్చుకున్న రోజాకి రాజకీయంగా సినీ రంగ పరంగా గురువు మాజీ ఎంపీ శివప్రసాదే.

శివప్రసాద్ దర్శకుడిగా తొలి సినిమా మొదలుపెట్టిన సమయంలో తన సినిమాలో హీరోగా రాజేంద్రప్రసాద్‌ను అనుకున్నారు. హీరోయిన్‌గా కొత్త అమ్మాయిని తీసుకోవాలనుకున్నారు. ఈ విషయం గురించి ఓ ఇంటర్వ్యూలో శివప్రసాద్ గారే పూర్తి వివరాలు చెప్పుకొచ్చారు. ‘‘భారతీరాజా శిష్యుణ్ని నేను. ఆయన తన సినిమాలకు కొత్త వాళ్లను ఎంపిక చేస్తుంటారు. నేను కూడా కొత్త అమ్మాయిని సినీ తెరకు పరిచయం చేద్దామనుకున్నాను. రాయలసీమ అమ్మాయి కోసం ప్రయత్నించాను. ఫలితం కనపడలేదు. చివరకు కేరళ అమ్మాయి కోసం ఓ నర్సింగ్ ఇన్‌స్టిట్యూట్‌కు వెళ్లాను. లోపలికి వెళితే.. అక్కడున్న వాళ్లలో ఎవరూ నచ్చలేదు. వారి ఆఫీసు రూములో ఓ అమ్మాయి ఫొటో కనిపించింది. చక్కగా ఉంది. అక్కడున్న సూపరింటెండెంట్ సహాయంతో ఆ అమ్మాయి ఇంటికి వెళ్లాను. నన్ను చూడగానే బిత్తర చూపులు చూసింది. ఆ చూపులు నాకు బాగా నచ్చాయి. అడగగానే ఒప్పుకుంది. ఆమె పేరు ‘శ్రీలత’. భారతీరాజా దగ్గరకు తీసుకువెళ్లి.. రోజాగా పేరు మార్చాం.. అని తెలిపారు శివప్రసాద్. తన తొలి సినిమా ప్రేమ తపస్సు ద్వారా సినీ రంగ ప్రవేశం చేసిన రోజా ఆ తరువాత టాప్ కథనాయికగా టాలివుడ్ లో పేరు తెచ్చుకుంది. 1999లో సత్యవేడు ఎమ్మెల్యేగా పోటీ చేసిన సమయంలో రోజాను ఎన్నికల ప్రచారానికి ఆహ్వనించారు శివప్రసాద్. పిలవగానే ప్రచారానికి వచ్చిన రోజాను చంద్రబాబు కు పరిచయం చేసి టీడీపీలో చేర్పించారు. అలా రాజకీయాల్లోకి ఎంట్రీ ఇచ్చింది రోజా. ప్రస్తుతం రోజా నగరి ఎమ్మెల్యేగా కొనసాగుతుంది. అయితే రోజాకు సినీ, రాజకీయ గురువుగా అవకాశం ఇచ్చిన శివప్రసాద్ ఇక లేరని తెలిసి రాయలసీమ వాసులు ఆవేదనకు లోనవుతున్నారు. ఆంధ్రప్రదేశ్ కు ప్రత్యేక హోదా విషయంలో శివప్రసాద్ ఒక్కరే అన్ని రకాల ప్రయత్నాలు చేశారని.. కేంద్రంపై పోరాటం చేశారని గుర్తు చేసుకున్నారు.