రానా ఆరోగ్యంపై క్లారిటీ ఇచ్చిన సురేష్ బాబు...

రానా ఆరోగ్యంపై కొన్ని రోజులుగా ఎవ‌రికి న‌చ్చిన‌ట్లుగా వార్త‌లు రాస్తున్నారు.. సోష‌ల్ మీడియాలో అవి వైర‌ల్ అవుతున్నాయి. ఇలాంటి టైంలో ఎవర్ని నమ్మాలో.. ఎవర్ని నమ్మకూడదో తెలియని సందిగ్ధంలో ఉన్నారు అభిమానులు కూడా. మధ్యలో ఓ సారి తనకేం కాలేదని రానా స్వ‌యంగా చెప్పినా కూడా ఆయన్ని ఎవరూ నమ్మినట్లు కనిపించడం లేదు. ఎప్పుడూ యాక్టివ్‌గా ఉండే రానా కొన్నాళ్లుగా క‌నిపించ‌కుండా పోయేస‌రికి నిజంగానే రానాకు ఏదో అయిపోయిందనుకున్నారు ఫ్యాన్స్. ఇందులో నిజం కూడా లేక‌పోలేద‌నే వార్త‌లు కూడా వస్తున్నాయి. ఈ విష‌యంపై రానా కానీ.. ఆయ‌న కుటుంబ స‌భ్యులు కానీ ఎక్క‌డా స్పందించిన దాఖ‌లాలు లేవు. పైగా రానా కిడ్నీల సమస్యతో బాధపడుతున్నాడనేది ఈ వార్తల సారాంశం. అయితే ఇప్పుడు రానా అనారోగ్యంపై సురేష్ బాబు స్పందించాడు. ఈ మధ్యే ఓ ఛానెల్‌కు ఇచ్చిన ఇంటర్వ్యూలో ఆయన కొడుకు అనారోగ్యంపై వస్తున్న వార్తలకు చెక్ పెట్టారు. నిజానికి రానాకు చిన్నపుడే కంటి సమస్య ఉందని.. అయితే అప్పుడే చికిత్స చేస్తే చిన్నవాడు కాబట్టి తట్టుకోవడం కష్టమని డాక్టర్లు చెప్పారని తెలిపాడు సురేష్ బాబు. అందుకే పెద్దైన తర్వాత చికిత్స తీసుకుంటే మంచిదని డాక్టర్లు సూచించడంతో అలాగే చేసామని చెప్పాడు సురేష్ బాబు. దానికి సంబంధించిన చికిత్స ఈ మధ్యే పూర్తైందని.. అయితే సర్జరీ జరిగిన తర్వాత టెన్షన్ పడటంతో బీపీ లాంటివి అటాక్ అయ్యాయని.. దాంతో కాస్త వీక్ అయిపోయాడని చెప్పుకొచ్చాడు సురేష్ బాబు. అంతేకానీ తన కొడుక్కి ఏం కాలేదని.. కొన్ని రోజుల్లో మళ్లీ మా వాడు మునపటిలా తిరిగి వస్తాడు చూడండంటున్నాడు ఈ నిర్మాత. మొత్తానికి ఇన్నాళ్లూ దగ్గుబాటి ఫ్యామిలీ నుంచి కూడా ఎవరూ స్పందించకపోవడంతో రానాకు ఏమైందనే టెన్షన్ అందర్లోనూ కనిపించింది. ఇప్పుడు సురేష్ బాబు క్లారిటీ ఇవ్వడంతో ఊపిరి పీల్చుకుంటున్నారు అభిమానులు. ప్రస్తుతం విరాటపర్వంతో పాటు మరో అరడజన్ సినిమాలకు కమిట్ అయ్యాడు రానా దగ్గుబాటి. వచ్చిన తర్వాత అన్నీ పూర్తి చేస్తాడు ఈయన. ఈ మధ్యే ఇండియాకు వచ్చిన ఈయన.. ప్రస్తుతం ముంబైలో ఉన్నాడు.