దయచేసి రాజకీయాలు చేయొద్దమ్మా: పరుచూరి

టాలీవుడ్ లేడీ సూపర్‌స్టార్‌గా పేరు తెచ్చుకున్న విజయశాంతి ‘సరిలేరు నీకెవ్వరు’ సినిమాతో మళ్లీ వెండితెరపై కనువిందు చేయడానికి సిద్ధమయ్యారు. అయితే మళ్లీ విజయశాంతి రాజకీయాల్లోకి వెళ్లకూడదని ప్రముఖ రచయిత పరుచూరి గోపాల కృష్ణ రిక్వెస్ట్ చేస్తున్నారు. విజయశాంతి తన కూతురులాంటిదని చెప్తూ తన జీవితంలో మర్చిపోని అనుభవాన్ని ఒకటి అభిమానులతో పంచుకున్నారు. ‘ప్రస్తుతం షూటింగ్ అవుతున్న సరిలేరు నీకెవ్వరు సినిమాలో నేను, విజయశాంతి కలిసి నటించాం. విజయశాంతితో మా అన్నయ్య పరుచూరి వెంకటేశ్వరరావు నటించారు కానీ నేనెప్పుడూ నటించలేదు. నన్ను విజయశాంతి అంకుల్ అని పిలుస్తుంది. మొన్న నేను సరిలేరు నీకెవ్వరు సెట్‌కి వెళ్లారు. ఆ సమయంలో సెట్‌లో ఏడుగురు ఆర్టిస్ట్‌లు ఉన్నారు. అందరూ ఎవరి కారవ్యాన్లలో వారు ఉన్నారు. నాకూ ఓ కారవ్యాన్ ఇచ్చారు. ఇంతలో ఓ వ్యక్తి వచ్చి మిమ్మల్ని విజయశాంతిగారు రమ్మంటున్నారు అన్నారు. నేను వెళ్లి చూసేసరికి విజయశాంతి ఓ చెట్టు కింద కుర్చీ వేసుకుని కూర్చుని ఉంది. అదేంటమ్మా ఇక్కడ కూర్చున్నావ్ అని అడిగాను. ఏం చేయమంటారు అంకుల్ షాట్ అయిపోగానే ఎవరికి వారు కారవ్యాన్లలోకి వెళ్లి కూర్చుంటున్నారు అంది. సరేనని కాసేపు తనతో కబుర్లు చెప్పాను. ఓసారి మేమంతా కలిసి భోజనాలు చేస్తున్నాం. ఆ సమయంలో విజయశాంతి ‘నేను పరుచూరిని అంకుల్ అని ఎందుకు పిలుస్తానో తెలుసా’ అంటూ మా మధ్య జరిగిన ఓ సంఘటన గురించి సెట్‌లో వారికి వివరించింది. ‘అపూర్వ సహోదరులు’ సినిమా సమయంలో విజయశాంతి వాళ్ల అమ్మ చనిపోయారు. కానీ విషయం విజయశాంతికి తెలీదు. తనకి తెలీకుండా దాచాం. తనని నేను నా భార్య కలిసి కారులో చెన్నైకి తీసుకెళ్లాం. మరికొద్దిసేపట్లో విజయశాంతి ఇంటికి చేరుకుంటామనగా.. ‘ఏమైంది అంకుల్ మా అమ్మకి’ అని కంగారు పడింది. ఏం లేదమ్మా గుండెకు సర్జరీ అయింది. అంతే అని చెప్పాను. తీరా ఆమె ఇంటికి వెళ్లి చూసేసరికి బయట బోలెడన్ని కార్లు ఉన్నాయి. విజయశాంతి భయపడి గబగబా లోపలికి పరిగెత్తుకుంటూ వెళ్లిపోయింది. తన తల్లి భౌతికకాయంపై పడి విలవిలా ఏడ్చింది. ఎందుకు చెప్పలేదు అంకుల్ అని అడిగింది. ఎలా చెప్పగలను తల్లీ.. ముందే చెబితే నాలుగు గంటల పాటు నరకయాతన అనుభవించేదానివి అన్నాను’‘సరిలేరు నీకెవ్వరులో తను ఓ షాట్‌లో నటిస్తున్నప్పుడు షాట్ అయిపోగానే నావైపు చూసింది. షాట్ సరిగ్గా రాలేదని తనకు అర్థమైంది. మరో టేక్ తీసుకుని చాలా అద్భుతంగా చేసింది. ఎందుకు రాజకీయాల్లోకి వెళ్లిందో తెలీదు. ఇప్పుడు మళ్లీ ఎందుకు సినిమాల్లోకి వచ్చిందో తెలీదు. కానీ తను మళ్లీ రాజకీయాల్లోకి వెళ్లకూడదని నేను కోరుకుంటున్నాను. రాజకీయాల్లోకి వెళితే ఎలా ఉంటుందో ఈపాటికి తనకు అర్థమై ఉంటుంది. కాబట్టి సినిమాలు కొనసాగిస్తూ ప్రేక్షకులను ఇలాగే అలరించాలని కోరుకుంటున్నాను’ అని వెల్లడించారు పరుచూరి.