చీకటితో చేస్తున్న యుద్ధంలో మనం కూడా పాల్గొందాం : నాని

అంతర్జాతీయ మాదక ద్రవ్య వ్యతిరేక దినోత్సవం సందర్భంగా నేచురల్ స్టార్ నాని ఓ వీడియో మెసేజ్‌ను విడుదల చేశారు. మీ ఉన్నతిని కోరుకునే వారు ఒకరైతే, మిమ్మల్ని పాతాళానికి తొక్కేయాలని చూసేది మరొకరు. వీరిలో మీరు ఎవరిని కోరుకుంటారు.. అంటూ నాని ఓ మెసేజ్‌ను ఈ వీడియోలో తెలిపారు. ఎవరికైనా డ్రగ్స్ సరఫరా చేసే వారి సమాచారం తెలిస్తే వెంటనే పోలీసులకు తెలియజేయాలని ఆయన కోరారు. దయచేసి అందరూ ఈ చీకటితో ఫైట్ చేసి పోలీసులకు సహకరిద్దాం అని నాని పిలుపునిచ్చారు.

‘‘మీరు లైఫ్‌లో చాలా ఎత్తుకు ఎదిగితే చూడాలని మీ ఫ్రెండ్స్, మీ ఫ్యామిలీ మెంబర్స్, మీ చుట్టూ ఉన్న సొసైటీ, ఇంకా చాలా మంది ఎదురుచూస్తుంటారు. అదే మీరు ఎదగకుండా పాతాళానికి పడిపోతే చూడాలని ఒకరు ఎదురుచూస్తున్నారు. అదే డ్రగ్స్. ఆ డ్రగ్స్ వైపు మీరు వేసే ఒకే ఒక్క తప్పటడుగు మీ చేతిలో నుంచి మీ లైఫ్‌ని, మొత్తం కంట్రోల్‌ని లాగేసుకుంటుంది. ఆ కంట్రోల్ మొత్తం దాని చేతులలోనికి వెళ్లిపోతుంది. మిమ్మల్ని డ్రగ్స్‌కు బానిసలనుగా మార్చి, మీ నుంచి డబ్బు సంపాదించాలనుకునే మాఫియాలు, బ్లాక్ మార్కెట్‌లు చాలానే ఉన్నాయి. అవన్నీ ఒకవైపు. వాటన్నిటి నుంచి మిమ్మల్ని కాపాడాలనే కష్టపడుతున్న వేలాది మంది పోలీసులు మరో వైపు. మీరే వైపు. వాళ్లు చీకటితో చేస్తున్న యుద్ధంలో మనం కూడా పాల్గొందాం. వారికి సపోర్ట్ చేద్దాం. మీకు ఏదైనా సమాచారం తెలిసి ఉంటే, మీ ఫ్రెండ్స్ దగ్గర కానీ.. అది పోలీసులతో షేర్ చేసుకోండి. మీ పేరును కూడా వారు బయటికి రానివ్వరు. అందరం కలిసి ఈ చీకటితో ఫైట్ చేద్దాం. జైహింద్..’’ అని నాని ఈ వీడియోలో పేర్కొన్నారు.