'నూటొక్క జిల్లాల అందగాడు' సినిమా రివ్యూ

అవసరాల శ్రీనివాస్, రుహాని శర్మ హీరోహీరోయిన్లుగా నటించిన నూటొక్క జిల్లాల అందగాడు సినిమా శుక్రవారం థియేటర్లలో విడుదలయ్యింది. రాచకొండ విద్యాసాగర్‌ తెరకెక్కించిన ఈ సినిమా ఎలా ఉందో ఇప్పుడు తెలుసుకుందాం.

బట్టతల సమస్య ప్రధానాంశంగా రూపొందిన ఈ సినిమా ప్రచార చిత్రాలతో ప్రేక్షకుల్లో అంచనాలను పెంచేసింది. కథలోకి వెళ్తే.. గొత్తి సత్యనారాయణ అలియాస్ జి.ఎస్‌.ఎన్ (అవసరాల శ్రీనివాస్‌) ఓ రియల్ ఎస్టేట్ కంపెనీలో పనిచేస్తుంటాడు. అతడు వంశ పారంపర్యంగా వచ్చిన బట్టతల సమస్యతో సతమతమవుతూ ఉంటాడు. విగ్గు, టోపీ పెట్టుకుని మేనేజ్ చేస్తూ ఉంటాడు. అతనికి అంజలి (రుహానిశర్మ) పరిచయమవుతోంది. ఇద్దరూ ఒకరినొకరు ఇష్టపడతారు. కానీ జి.ఎస్‌.ఎన్‌. తన బట్టతల గురించి ఆమెకు చెప్పడు. కానీ తర్వాత బట్టతల రహస్యం అంజలికి తెలుస్తుంది. తర్వాత ఏం జరిగిందనేది మిగతా కథ.

చాలా మంది కథ అయినప్పటికీ ఈ కథని చెప్పిన విధానంలో కొత్తదనం కనిపించలేదు. బట్టతల సమస్యతో హీరో పడే సంఘర్షణ కానీ, భావోద్వేగాలు కానీ ఈ స్క్రిప్టులో పండలేదు. కామెడీ మాత్రం పండింది. డైలాగ్స్ తో నవ్విస్తూ సన్నివేశాల్ని అల్లిన తీరు మెప్పిస్తుంది. చాలా సన్నివేశాలు నవ్విస్తాయి. విరామ సన్నివేశాలు ఆసక్తిని రేకెత్తిస్తాయి. సెకండ్ హాఫ్ లో భావోద్వేగాలు ఆకట్టుకుంటాయి. పతాక సన్నివేశాలు ఊహకు తగ్గట్టే సాగుతాయి.

అవసరాల శ్రీనివాస్ గొత్తి సత్యనారాయణ పాత్రలో చాలా బాగా నటించారు. రుహానీ శర్మ కూడా తన నటనతో మెప్పిస్తుంది. నటి రోహిణి పాత్ర పరిధి తక్కువే అయినా ఆమె పాత్రతో కొన్ని భావోద్వేగాలు పండాయి. శక్తికాంత్ కార్తీక్ సంగీతం, రామ్ కెమెరా పనితనం, కిరణ్ గంటి ఎడిటింగ్ ఆకట్టుకుంటాయి. దర్శకుడు విద్యాసాగర్ కథనం, భావోద్వేగాల పరంగా పెద్దగా ప్రభావం చూపించలేకపోయారు.

ప్లస్ పాయింట్స్:

- హీరో హీరోయిన్ల నటన
- కామెడీ
- ఫస్ట్ హాఫ్

మైనస్ పాయింట్స్:
- భావోద్వేగాలు
- కథనం