'షోలే' తరహాలో నందమూరి హీరోల మల్టీస్టారర్ 'N.B.K.'

టాలీవుడ్ లో డెబ్బై, ఎనభైలలో మల్టీస్టారర్ చిత్రాల హవా నడిచేది. ఆ తర్వాత తెరమరుగైన ఈ ట్రెండ్ ఇటీవలికాలంలో మళ్ళీ ఊపందుకుంది. వెంకటేష్, మహేష్ బాబు కలిసి నటించిన 'సీతమ్మ వాకిట్లో సిరిమల్లె చెట్టు' చిత్రంతో బిగ్ స్టార్స్ మల్టీస్టారర్ లకు బీజం పడిందని చెప్పాలి. ఇండస్ట్రీలో పేరు ప్రఖ్యాతులున్న దిగ్గజ కుటుంబాల హీరోలంతా కలిసి సినిమా చెయ్యాలని వారి అభిమానులు ఎంతగానో ఆశపడుతున్నారు. ఈ క్రమంలో ఇప్పటికే విక్రమ్ కె. కుమార్ దర్శకత్వంలో వచ్చిన 'మనం' చిత్రంలో అక్కినేని హీరోలంతా కలిసి నటించి అక్కినేని అభిమానులకు కన్నులంపండుగ చేసారు. ఇంకొన్ని రోజుల్లో కొణిదెల హీరోలు ప్రేక్షకులను అలరించనున్నారు. కొరటాల శివ దర్శకత్వంలో మెగా స్టార్ చిరంజీవి, మెగాపవర్ స్టార్ రామ్ చరణ్ తేజ్ కలిసి ఆచార్యలో నటిస్తున్నారు. 

పోతే... ఇలానే నందమూరి హీరోలు కూడా కలిసి మల్టీస్టారర్ సినిమా చెయ్యాలని నందమూరి అభిమానులు కోరుకుంటున్నారు. గతంలో సీనియర్ ఎన్టీఆర్ తో బాలకృష్ణ కలిసి కొన్ని సినిమాలలో నటించిన సంగతి తెలిసిందే. ఎన్టీఆర్ బయోపిక్ లో బాలయ్య, కళ్యాణ్ రామ్ కలిసి కొంచెం సేపు కనిపించారు. దర్శకులు మంచి కథతో వస్తే మల్టీస్టారర్ సినిమాల్లో నటించటానికి ఎటువంటి అభ్యంతరం లేదని ఈ మధ్యనే బాలయ్య ఓపెన్ ఆఫర్ ఇచ్చారు. ఆర్ ఆర్ ఆర్ ప్రమోషన్స్ లో భాగంగా తారక్ తనకు బాలయ్యతో కలిసి మల్టీస్టారర్ చెయ్యాలనుందని మనసులో మాటను బయటపెట్టారు. ఈ నేపథ్యంలో బాలయ్య, తారక్, కళ్యాణ్ రామ్ ల కాంబోలో ఒక బిగ్ మల్టీస్టారర్ మూవీ త్వరలోనే పట్టాలెక్కబోతున్నట్టు ఇండస్ట్రీలో టాక్ వినబడుతుంది. PSV గరుడవేగా ఫేమ్ ప్రవీణ్ సత్తారు నందమూరి హీరోల మల్టీస్టారర్ మూవీ ని తెరకెక్కించే బాధ్యతను నెత్తిన వేసుకున్నట్టు తెలుస్తోంది. ఈ మేరకు కథను సిద్ధం చేసే పనిలో ఉన్నారట ప్రవీణ్. అయితే ఈ సినిమాకు N.B.K అనే టైటిల్ ను అనుకుంటున్నారని, అందులో N అంటే ఎన్టీయార్, B అంటే బాలకృష్ణ, K అంటే కళ్యాణ్ రామ్ అని మీనింగ్ అని రకరకాల రూమర్స్ ప్రచారంలో ఉన్నాయి. 

ప్రస్తుతం టాలీవుడ్ కింగ్ నాగార్జునతో ది ఘోస్ట్ చిత్రాన్ని తెరకెక్కిస్తున్నారు ప్రవీణ్. ఆ తర్వాత మెగా ప్రిన్స్ వరుణ్ తేజ్ తో మరో మూవీని చేస్తారు. ఆపై నందమూరి హీరోల మల్టీస్టారర్ మూవీ కార్యరూపం దాలుస్తుందని తెలుస్తుంది. అయితే ఈ వార్తలో ఎంతవరకు నిజముందో తెలియాల్సిఉంది.