నేను నటించిన సినిమాలలో 'ఆ ఒకటి' నాకే నచ్చదు - తమన్నా
cinema | Suryaa Desk | Published : Thu, May 19, 2022, 01:32 PM
ప్రస్తుతం 75వ కేన్స్ ఫిలిం ఫెస్టివల్ లో ఇండియా తరపున పాల్గొంటున్న సెలెబ్రిటీలలో టాలీవుడ్ స్టార్ హీరోయిన్ తమన్నా ఒకరు. ఇండియన్ డెలిగేషన్ ఇంటర్వ్యూలో తమన్నా మాట్లాడుతూ హిందీ చిత్రపరిశ్రమలో తాను వేసిన తప్పటడుగుల గురించి వ్యాఖ్యానించింది. 2013లో అజయ్ దేవగణ్ హీరోగా నటించిన హిమ్మత్ వాలా చిత్రాల్లో తమన్నా హీరోయిన్ గా నటించింది. ఈ చిత్రమే ఆమెకు తొలి హిందీ చిత్రం. 1983లో వచ్చిన క్లాసిక్ మూవీ హిమ్మత్ వాలా కు మోడరన్ రీమేక్ ఈ సినిమా. పాత సినిమాలో జితేంద్ర, శ్రీదేవి జంటగా నటించగా ఆ సినిమా సూపర్ హిట్ అయ్యింది. కొత్తగా తీసిన హిమ్మత్ వాలా చిత్రం బాలీవుడ్ బాక్సాఫీస్ వద్ద భారీడిజాస్టర్ గా నిలిచింది. కనీసం రూ. 50కోట్లు కూడా ఆ సినిమా కలెక్ట్ చెయ్యలేకపోయింది. ఈ విషయంపై తమన్నా తన స్పందనను తెలియచేసింది. "నా కెరీర్ లో ఉత్తమమైన నిర్ణయాలను , చెత్త నిర్ణయాలను తీసుకున్నాను. ఆ సమయంలో నేను తీసుకున్న నిర్ణయం సరైనదని అనిపించి తీసుకున్నాను. బాహుబలి సినిమాపై ఎంత నమ్మకముంచి చేసానో హిమ్మత్ వాలా కూడా అలానే చేశాను. ఫ్రాంక్ గా చెప్పాలంటే, హిమ్మత్ వాలా సినిమా నాకే నచ్చదు. అయితే, బాహుబలి విజయంతో పొంగిపోలేదు, హిమ్మత్ వాలా పరాజయంతో కృంగిపోలేదు. నటిగా నా పని చేసుకుంటూ వెళ్ళానంతే. కళారంగంలో ఉన్నాక రోజు రోజుకూ ఎంతోకొంత అభివృద్ధి చెందుతూ ఉండాలి. ఎక్కడ వేసిన గొంగళి అక్కడే అన్నట్టు ఉండకూడదు కదా. ఇప్పుడు నేను కూడా ఎంతో పరిణతి సాధించాను. బాహుబలి, హిమ్మత్ వాలా సమయంలో ఉన్న తమన్నా ను కాదు" ... అంటూ తమన్నా చెప్పుకొచ్చింది.
|
|