మెగాబ్రదర్ మెగా ట్రయల్ ఈసారైనా వర్క్ ఔటవుతుందా?

చిరంజీవి తర్వాత మెగా కాంపౌండ్ నుండి చిత్రసీమకు ఎంట్రీ ఇచ్చిన మరో నటుడు నాగబాబు. కెరీర్లో ఎక్కువశాతం సపోర్టింగ్ క్యారెక్టర్లనే చేసిన నాగబాబు లీడ్ రోల్ లో నటించిన సినిమాలు వేళ్ళ మీద లెక్కపెట్టుకోవచ్చు. క్యారెక్టర్ ఆర్టిస్టుగా, అతిధి పాత్రల్లో నటిస్తూనే నిర్మాతగా మారి కొన్ని సినిమాలను నిర్మించాడు. నాగబాబు నిర్మించిన సినిమాలలో హీరోలందరూ మెగా హీరోలే. చిరంజీవి, పవన్ కళ్యాణ్, రామ్ చరణ్, అల్లుఅర్జున్ తో సినిమాలు చేసిన నాగబాబు ప్రతిసారి నష్టాలనే చవిచూశారు. నాగబాబు నిర్మించిన సినిమాలలో బావగారు బాగున్నారా సినిమా తప్పితే మిగిలినవన్నీ భారీ డిజాస్టర్లే. చిరంజీవితో చేసిన త్రినేత్రుడు, ముగ్గురు మొనగాళ్లు, రుద్రవీణ, పవన్ కళ్యాణ్ తో చేసిన గుడుంబా శంకర్, రామ్ చరణ్ తో చేసిన ఆరెంజ్, అల్లుఅర్జున్ తో చేసిన నా పేరు సూర్య నా ఇల్లు ఇండియా చిత్రాలన్నీ ఆయా హీరోల కెరీర్లో బిగ్ డిజాస్టర్స్ గా పేరు తెచ్చుకోవడం విశేషం. 

తాజాగా నాగబాబు మరోసారి నిర్మాత అవతారమెత్తబోతున్నారని సమాచారం. వాళ్ళు వీళ్లతో కాదు ఈసారి మెగాబ్రదర్ తనయుడు వరుణ్ తేజ్ తోనే సినిమా తియ్యాలనుకుంటున్నాడట. మెగా ఫ్యామిలీ సొంత ప్రొడక్షన్ హౌస్ ఐన అంజనాదేవి ప్రొడక్షన్స్ లో నాగబాబు నిర్మాతగా, వరుణ్ తేజ్ హీరోగా ఒక సినిమా తెరకెక్కబోతుందని ఫిలిం నగర్ సర్కిల్స్ లో వార్తలు చక్కర్లు కొడుతున్నాయి. ఈ ప్రాజెక్టును డైరెక్ట్ చేసేది ఎవరు, ఆ సినిమాలో నటించే నటీనటుల వివరాలు తెలియాల్సి ఉంది. మరి...మెగా ప్రిన్స్ తో మెగాబ్రదర్ చెయ్యబోతున్నఈ సినిమా అయినా నాగబాబుకు నిర్మాతగా మంచి బ్రేక్ ఇస్తుందేమో చూడాలి.