విజయ్ దేవరకొండ-వెంకీ అట్లూరి కాంబినేషన్ కుదిరేనా?
cinema | Suryaa Desk | Published : Wed, Jan 23, 2019, 06:51 PM
సినీ పరిశ్రమలో ఒక విజయం అందుకునే ముందు వరకు ఎన్ని కష్టాలు పడనీ.. రోజులు ఎలాగైనా గడవనీ.. ఆ విజయం దక్కాక మాత్రం ఒక్కసారిగా జీవితం మారిపోతుంది. విజయానికి ఎక్కడైనా విలువ ఎక్కువే కానీ.. సక్సెస్ రేట్ చాలా చాలా తక్కువగా ఉండే సినీ రంగంలో దానికి మరింత విలువ ఉంటుంది. కాబట్టే ఒక్క సినిమా సక్సెస్తో చాలామంది జీవితాలు మారిపోతుంటాయి. దర్శకుడిగా మారాలని పదేళ్ల కిందట ప్రయత్నాలు మొదలుపెట్టిన వెంకీ అట్లూరి.. నటుడిగా, రచయితగా ట్రై చేసి చివరగా రెండేళ్ల కిందటే దర్శకుడిగా తొలి అవకాశం అందుకున్నాడు. ఆ చిత్రమే.. తొలి ప్రేమ.
గత ఏడాది ఆరంభంలో విడుదలైన ఈ చిత్రం ఎంత పెద్ద సక్సెస్ అయిందో తెలిసిందే. ఆ సినిమా రిలీజైన కొన్ని రోజులకే అక్కినేని నాగార్జున నుంచి పిలుపందుకుని అఖిల్ హీరోగా ‘మిస్టర్ మజ్ను’ తీశాడు వెంకీ. ప్రామిసింగ్గా కనిపిస్తున్న ఈ సినిమా ఈ నెల 25నే ప్రేక్షకుల ముందుకొస్తోంది. ఈ సినిమా ఆడితే వెంకీకి బంపరాఫర్ దక్కడం గ్యారెంటీ అని ఇండస్ట్రీ టాక్.
ప్రస్తుత టాలీవుడ్ హాట్ షాట్ హీరో విజయ్ దేవరకొండ.. వెంకీతో పని చేయడానికి ఆసక్తితో ఉన్నాడట. ‘డియర్ కామ్రేడ్’ తర్వాత విజయ్కు వేరే కమిట్మెంట్లు ఉన్నప్పటికీ ఏదీ వెంటనే మొదలుపెట్టేలా లేడు. వెంకీ వినిపించిన లైన్ విజయ్కి నచ్చడంతో అతడితోనే తన తర్వాతి సినిమా చేయడానికి ఆసక్తితో ఉన్నాడట. ‘మిస్టర్ మజ్ను’తో హిట్ కొడితే పక్కాగా ఈ కాంబినేషన్ ఓకే కావచ్చని సమాచారం. చూద్దాం మరి ‘మిస్టర్ మజ్ను’కు ఎలాంటి ఫలితం వస్తుందో?
|
|