ఐదు కోట్ల వ్యూస్ తో ‘డీజే’ – అల్లు అర్జున్

స్టార్ ప్రొడ్యూసర్ అల్లు అరవింద్ వారసుడిగా, మెగాస్టార్ చిరంజీవి మేనల్లుడిగా సినీ ఇండస్ట్రీలోకి అడుగుపెట్టాడు అల్లు అర్జున్. తొలి చిత్రం ‘గంగోత్రి’తో ఫర్వాలేదనించిన బన్నీ.. ‘ఆర్య’తో తొలి విజయం అందుకున్నాడు. అక్కడి నుంచి వరుస సినిమాలతో దూసుకెళ్తూ అభిమానుల మనసుల్లో స్టైలిష్ స్టార్‌గా ముద్రపడిపోయాడు. క్రమంగా తనకంటూ ప్రత్యేక క్రేజ్ సంపాదించుకుంటూ అగ్రహీరోగా ఎదుగుతున్నాడు. మరోవైపు కేరళలోనూ అల్లు అర్జున్‌కు లక్షల్లో అభిమానులున్నారు. కేరళలో బన్నీకి ఉన్నంత ఫాలోయింగ్ మరే తెలుగు హీరోకు లేదంటే అతిశయోక్తి కాదేమో. అల్లు అర్జున్‌ని అక్కడి వారు మల్లు అర్జున్‌గా పిలుచుకుంటారు. గతేడాది జరిగిన పడవ పోటీలకు కేరళ ప్రభుత్వం బన్నీని అతిథిగా ఆహ్వానించిదంటేనే అక్కడ ఆయనకున్న క్రేజ్‌ను అర్థం చేసుకోవచ్చు. గతేడాది ‘నా పేరు సూర్య’తో ప్రేక్షకుల ముందుకొచ్చిన బన్నీ తీవ్రంగా నిరాశపరిచాడు. తమ హీరో తర్వాతి సినిమా కోసం వేయి కళ్లతో ఎదురుచూస్తున్న మెగా అభిమానులకు పూనకం తెచ్చే వార్త ఇది. అల్లు అర్జున్, హరీశ్ శంకర్ కాంబినేషన్లో వచ్చిన ‘డీజే’ యావరేజ్‌గా నిలిచిన సంగతి తెలిసిందే. అయినప్పటికీ రూ.70కోట్ల గ్రాస్ రాబట్టి బన్నీ సత్తాను చాటింది. అల్లు అర్జున్ నటన, పూజా హెగ్డే అందాల ఆరబోత ఈ సినిమాకు ప్రత్యేక ఆకర్షణగా నిలిచాయి. థియేటర్లో యావరేజ్‌గా నిలిచిన ఈ సినియా యూట్యూబ్‌లో మాత్రం దుమ్ము దులిపేస్తోంది. నిర్మాత దిల్ రాజు 2017, డిసెంబర్‌లో ఈ చిత్రాన్ని యూట్యూబ్‌లో విడుదల చేశారు. అప్పటి నుంచి ఇప్పటివరకు ఈ సినిమాకు ఏకంగా 50 మిలియన్ల(5కోట్లు) మంది వీక్షించారు. తెలుగు సినిమాకు సంబంధించి ఇది సరికొత్త రికార్డని విశ్లేషకులు చెబుతున్నారు. ఇప్పటివరకు ఏ తెలుగు సినిమా కూడా యూట్యూబ్‌లో 50మిలియన్ల వ్యూస్ సాధించలేదు. దీంతో తమ హీరో సరికొత్త రికార్డు నెలకొల్పాడని అల్లు అర్జున్ అభిమానులు సంబరపడిపోతున్నారు. డీజే’ హిందీ డబ్బింగ్ వెర్షన్ తెలుగు సినిమాను మించి హిట్ కావడం మరో విశేషం. గతేడాది జులైలో గోల్డ్‌మైన్స్ టెలీ ఫిల్మ్స్ సంస్థ డబ్బింగ్ వెర్షన్‌ను యూట్యూబ్‌లో రిలీజ్ చేసింది. కేవలం ఆరు నెలల వ్యవధిలో ఏకంగా 72మిలియన్ వ్యూస్ సాధించి సత్తా చాటింది. తెలుగులో ఈ చిత్రానికి 129వేల లైకులు వస్తే.. హిందీలో 229వేల లైకులు రావడం విశేషం. బన్నీ కెరీర్లోనూ సూపర్ హిట్‌గా నిలిచిన ‘సరైనోడు’ హిందీ వెర్షన్ దేశంలోనే అత్యధిక మంది యూట్యూబ్ ద్వారా వీక్షించిన చిత్రంగా నిలిచిన సంగతి తెలిసిందే. ఈ సినిమా ఏకంగా 145 మిలియన్ల వ్యూస్‌తో, 5లక్షలకు పైగా లైక్స్‌తో ఎవరికీ అందనంత ఎత్తులో నిలిచింది.