అప్పుడు అధః పాతాళానికి వెళ్లిపోయాం: జీవిత

 ''గరుడవేగ'కి ముందు ఎన్నో భయాలు ఉండేవి. అధః పాతాళానికి వెళ్లి పోయిన తర్వాత మళ్లీ సక్సెస్ లోకి రాగలుగుతామా? లేదా? అనుకున్న రోజులు ఉన్నాయి' అన్నారు సీనియర్ నటి జీవిత. ఆమె భర్త, నటుడు రాజశేఖర్ నటిస్తున్న సినిమా 'కల్కి'. ప్రశాంత్‌ వర్మ దర్శకత్వం వహిస్తున్నారు. ఎమ్‌. కోటేశ్వరరాజు సినిమాను నిర్మించారు.అదా శర్మ కథానాయికగా నటిస్తున్నారు. సి.కల్యాణ్‌, శివానీ రాజశేఖర్‌, శివాత్మిక రాజశేఖర్‌ సినిమాను నిర్మిస్తున్నారు. భారీ బడ్జెట్‌తో నిర్మాతలు ఈ సినిమాను తీస్తున్నట్లు సమాచారం.
సోమవారం రాజశేఖర్‌ పుట్టినరోజు సందర్భంగా ఆదివారం టీజర్‌ను విడుదల చేశారు. ఈ కార్యక్రమానికి చిత్ర బృందంతోపాటు రాజశేఖర్‌ భార్య జీవిత, కుమార్తెలు శివానీ, శివాత్మిక తదితరులు పాల్గొన్నారు. ఈ సందర్భంగా జీవిత మాట్లాడుతూ.. ''గరుడవేగ' పెద్ద హిట్ అయింది. తర్వాత ఏం చేయాలి అనేది ప్రశ్న. 'గరుడవేగ'కి ముందు ఎన్నో భయాలు ఉండేవి. అప్పుడు అధః పాతాళానికి వెళ్లిపోయాం. తర్వాత మళ్లీ సక్సెస్‌లోకి రాగలుగుతామా? లేదా? అనుకున్న రోజులు ఉన్నాయి. మన వెనక ఎన్ని కోట్లు ఉన్నా డబ్బుతో కెరీర్‌ను కొనలేం. అటువంటి సమయంలో 'గరుడవేగ' వచ్చింది. ఇప్పుడు 'బాహుబలి' గురించి మాట్లాడుతున్నప్పుడు 'గరుడవేగ' గురించి కూడా మాట్లాడుతున్నారు. నాకు చాలా సంతోషంగా ఉంది'.
'కానీ 'గరుడవేగ' విడుదలైన సమయంలో మా అత్తగారిని, మా అన్నయ్య మురళిని కోల్పోవడం చాలా బాధాకరం. నేను మా అన్నయ్యని ఒరేయ్ పోరా.. అంటుంటాను. అందువల్ల చాలామంది మురళీ నాకు తమ్ముడు అనుకుంటారు. నేను అన్నయ్య అని పిలిచేది కల్యాణ్ గారిని. గరుడవేగ తర్వాత ఆయన ఒకసారి ఫోన్ చేసి ఏం చేస్తున్నావ్ అని అడిగారు. 'కల్కి' సినిమా గురించి చెప్పా. 'ఇప్పటివరకు నువ్వు సంపాదించింది ఏం లేదు.. అన్నీ పోగొట్టుకున్నావ్. పిల్లలు పెద్దవాళ్ళవుతున్నారు. ఈ సినిమా నేను చేస్తా' అన్నారు. ఈ రోజుల్లో ఒక సినిమా తీయడం చాలా కష్టం. ఓ మహిళగా నాకు ఇంకా కష్టం. మనకు రావాల్సిన డబ్బులు మనం తెచ్చుకోవడానికి పెద్ద పోరాటం చేయాలి. ఇలాంటి సమయంలో కల్యాణ్ అన్నయ్య సినిమా చేస్తాను అనడం సంతోషంగా అనిపించింది. సినిమా కథ, స్క్రీన్ ప్లే, డైలాగులు ప్రశాంత్ వర్మ రాశారు. ముందు కేవలం సినిమా స్క్రిప్ట్ ఇస్తా అన్నారు. అది పూర్తయిన తర్వాత దర్శకత్వం కూడా చేయమని అడిగా. 'అ!' విజయం తర్వాత అతనికి చాలా అవకాశాలు వచ్చాయి. ఏ సినిమా చేయాలి అని ఆలోచించుకోవడానికి కొంత సమయం తీసుకున్నారు. ఆయన దర్శకత్వంకు అంగీకరించడమే సగం విజయంగా భావించా. విభిన్నమైన కథతో రూపొందుతున్న ఈ సినిమా ప్రేక్షకులను ఆకట్టుకుంటుంది. మే నెలలో సినిమాను విడుదల చేయాలని భావిస్తున్నాం' అని అన్నారు.
రాజశేఖర్‌ మాట్లాడుతూ.. 'సినిమా గురించి విడుదల తర్వాత మాట్లాడుతా. 'గరుడవేగ' సమయంలోనూ సినిమా విడుదల తర్వాత మాట్లాడతానని చెప్పాను. ఇప్పుడు అంతే. 'గరుడవేగ' తర్వాత ఆరేడు నెలలు కథ కోసం అన్వేషించాం. ప్రశాంత్ వర్మ డేట్స్ కోసం చాలా రోజులు ఎదురు చూశాం. 'గరుడవేగ'కి ప్రవీణ్ సత్తారుతో పని చేసేటప్పుడు ఎంత కొత్తగా ఫీల్ అయ్యానో.. 'కల్కి'కి ప్రశాంత్ వర్మతో పని చేసేటప్పుడు అంతే కొత్తగా ఫీల్ అవుతున్నా. చాలా రోజుల విరామం తర్వాత కల్యాణ్ గారి సంస్థలో నేను నటిస్తున్న చిత్రమిది. నాకు ప్రమోషన్ వచ్చినట్టు భావిస్తున్నా. కల్యాణ్‌ కథలో బలం లేకపోతే సినిమా చేయరు. కథ నచ్చడమే సినిమా విజయంలో ఓ మెట్టు ఎక్కినట్టు. పుట్టినరోజు నాడు కూడా షూటింగ్ చేస్తున్నాం. లోకంలో పని దొరకడం చాలా కష్టం. నాకు పని కల్పించిన దర్శక, నిర్మాతలకు కృతజ్ఞతలు. జీవితం అన్నది చాలా తక్కువ రోజులు. అంతా సంతోషంగా అందరితో మంచిగా జీవితాన్ని ముందుకు సాగించాలి అని కోరుకుంటున్నా' అని చెప్పారు.
అనంతరం నిర్మాత కల్యాణ్ మాట్లాడుతూ.. 'మా హీరో రాజశేఖర్ గారికి పుట్టినరోజు శుభాకాంక్షలు. 'గరుడవేగ' హిట్‌ తర్వాత.. విభిన్నమైన సినిమా చేయాలనే ఉద్దేశంతో ఈ కథను ఎంచుకున్నాం. 1980 నేపథ్యంలో కథ సాగుతుంది. ఇంకా 30 శాతం షూటింగ్ చేయాల్సి ఉంది. మార్చి, ఏప్రిల్ నెలల్లో మిగతా షూటింగ్ పూర్తిచేసి మంచి తేది చూసి చిత్రాన్ని విడుదల చేయాలనుకుంటున్నాం. ఈ సినిమా పూర్తి బాధ్యత ప్రశాంత్ వర్మ మీద పెట్టాం. 'శేషు' తర్వాత రాజశేఖర్‌గారితో నేను చేస్తున్న చిత్రమిది.
దర్శకుడు ప్రశాంత్ వర్మ మాట్లాడుతూ.. 'నేను 'అ!' చిత్రానికి ముందే జీవిత గారిని కలిశా. అప్పుడే ఈ సినిమా చేద్దాం అనుకున్నాం. చాలా రోజులు ఎదురు చూసి ఈ సినిమా ప్రారంభించాం. ఆ చిత్రానికి ఎంత కష్టపడ్డానో.. దానికి పదిరెట్లు ఈ చిత్రానికి కష్టపడ్డా. ఇదేమీ కాంప్లెక్స్ కథ కాదు. స్క్రిప్ట్ వర్క్ లో చాలా డీటెయిలింగ్ చేశాం. రాజశేఖర్ గారితో పనిచేయడం అద్భుతమైన అనుభూతి. ఆయన చాలా జోకులు వేస్తూ ఉంటారు. జీవిత గారిది స్వీట్ ఫ్యామిలీ. వాళ్ల మీద నాది ఒక్కటే ఫిర్యాదు.. ఆహారం ఎక్కువ పెడతారు. సినిమా కోసం ఒక్కరోజు 48 గంటలు విరామం లేకుండా షూట్ చేశాం. 'కల్కి' అనేది చాలా పవర్‌ఫుల్‌ టైటిల్. అన్నీ కుదిరితే రాజశేఖర్ గారి తర్వాతి పుట్టినరోజుకు 'కల్కి 2' మొదలవుతుంది. నా అభిమాన నటుడు రాజశేఖర్ గారికి ఈ పుట్టిన రోజు కానుకగా నేను యాంగ్రీ స్టార్ అనే బిరుదు ఇస్తున్నా. సినిమా పెద్ద విజయం సాధిస్తుందని ఆశిస్తున్నా' అని ఆశించారు.