నాకు సినిమాలు కంటే కుటుంబమే ముఖ్యం : బిపాసా
cinema | Suryaa Desk | Published : Tue, Feb 12, 2019, 11:35 AM
వర్తమాన కథాంశాలకు దగ్గరగా నటించడమే తన ముందున్న లక్ష్యమంటోంది బాలీవుడ్ హాట్ సుందరి బిపాసా బసు. నటిగా తనకున్నవి చిన్న చిన్న కోర్కెలేనని…స్టార్డమ్ శాశ్వతం కాదని తనకు తెలుసని చెబుతోంది. జిస్మ్, రాజ్ లాంటి చిత్రాలతో శృంగార తారగా గుర్తింపు పొందింది బిపాసా. ఆ తర్వాత కొంత దారి మార్చి నో ఎంట్రీ, కార్పొరేట్, ధూమ్ 2, ఓంకారా, ఫుట్ పాత్ లాంటి చిత్రాల్లో నటించింది. కొత్త నాయికల దూకుడుతో తన స్టార్డమ్ తగ్గిపోతుందని భయం తనకెప్పుడూ లేదంటోందీ తార. ఇటీవల బిపాసా మాట్లాడుతూ…వర్తమాన కథాంశాల్లో నటించలేకపోతానేమో అనే భయం తప్ప స్టార్డమ్ తగ్గుతుందనే బెంగ నాకెప్పుడూ లేదు. వ్యక్తిగతంగా నేనేమీ మారలేదు. మొదటి నుంచీ నా సొంత నిబంధనలకు అనుగుణంగానే పనిచేస్తున్నాను గానీ పరిశ్రమ కట్టుబాట్లకు బంధీ కాలేదు. అప్పుడెలా ఉన్నానో ఇప్పుడూ అలాగే ఉన్నాను. నటిగా నా కోరికలు చాలా చిన్నవి. నాకు సినిమాలు, నట జీవితం కంటే కుటుంబమే ముఖ్యం. నా 15వ ఏట నుంచే మోడలింగ్ ప్రారంభించాను. పంతొమ్మిది ఏళ్లకు నాయికగా తెరంగేట్రం చేశాను. అప్పటినుంచీ నటిస్తూనే ఉన్నాను. కాబట్టి పెళ్లయ్యాక నా కుటుంబంతో ఎక్కువ సమయం గడపాలని అనుకుంటున్నాను. అందుకే తక్కువ చిత్రాల్లో నటిస్తున్నాను. అని చెప్పింది. అలోన్ సినిమా తర్వాత నటించని బిపాసా…ప్రస్తుతం కరణ్ జోహార్ ఆదత్ చిత్రంలో నటిస్తోంది.
|
|