మేకప్ లేకున్నా ఇంత ‘అందం’గానా!

సినిమా ఇండస్ట్రీ అంటేనే ఓ రంగుల ప్రపంచం. తెరపై ఎంత అందంగా కనిపిస్తే.. అంత అభిమానం దక్కుతుంది. ఆ సినిమా కూడా మరింత బాగా ఆడుతుంది. అందుకే సినీ పరిశ్రమలో ఎంత మంది కథానాయికలు ఉన్నా.. కొత్త, కొత్త అందాల కోసం నిర్మాతలు, దర్శకుల వేట కొనసాగుతూనే ఉంటుంది. సినిమా సినిమాకి సరికొత్త లుక్‌తో కనిపించడానికి అటు హీరోలు, ఇటు హీరోయిన్లు ప్రయత్నిస్తూనే ఉంటారు. అయితే.. తెరపై కనిపించినంత అందంగా తమ జీవితాలు ఉండవని చాలా మంది తారలు తరచూ చెప్పేమాట. 

సిల్వర్ స్క్రీన్‌పై తళుక్కున మెరిసే ముద్దుగుమ్మలు.. ముఖానికి మేకప్‌ లేకుండా కెమెరా ముందుకు రావడం చాలా అరుదు. అలా రావడానికి ఇష్టపడరు కూడా. నవతరం నాయికలు సాయి పల్లవి లాంటి వారు ఆ హద్దులు చెరిపేశారు. మేకప్ లేకుండానే సినిమాల్లోనూ మెప్పిస్తున్నారు. తన మొటిమలే తనకు మరింత అందం అని ఆనందంగా చెప్తుంది ఫిదా బ్యూటీ సాయి పల్లవి. 

ఇక హీరోల విషయానికి వస్తే.. తమిళ అభిమానులు తమ దేవుడిగా కీర్తించే సౌతిండియా సూపర్ స్టార్ రజినీ కాంత్.. కుర్ర హీరోలకు దీటుగా సినిమాల్లో వెరైటీ గెటప్పులతో అలరించినా.. బయటకు వస్తే మాత్రం తన మామూలు లుక్‌తోనే కనిపిస్తారు. ఆడియో ఫంక్షన్ల లాంటి సినీ వేడుకలకు కూడా ఆయన మేకప్ లేకుండా నిరాడంబరంగా వచ్చేస్తారు. తెలుగులోనూ అలాంటి హీరోలు ఉన్నా.. వారిని వేళ్ల మీదే లెక్క పెట్టొచ్చు. 

ఇప్పుడు ఇదంతా ఎందుకంటే.. వెండితెర అందాల ‘చందమామ’గా తెలుగు అభిమానులు కీర్తించే కాజల్ అగర్వాల్ మేకప్ లేకుండా సంచలన ఫోటోలను ట్వీట్ చేసి వార్తల్లో నిలిచారు. ఆ వయసులో ఏ కథానాయికా చేయని ధైర్యం చేశారు. సహజంగా దిగిన ఫొటోలను శుక్రవారం (మే 31) ఇన్‌స్టాగ్రామ్ ఖాతా ద్వారా షేర్‌ చేస్తూ.. అందం కోసం వెంపర్లాడే నవతరానికి అద్భుతమైన సందేశం కూడా ఇచ్చారు. కాజల్ షేర్ చేసిన ఫోటోలు సోషల్‌మీడియాలో వైరల్‌గా మారాయి. ఆమె ధైర్యానికి నెటిజన్లు ప్రశంసలు కురిపిస్తున్నారు.

‘మేకప్‌ మనల్ని బాహ్యంగా మాత్రమే అందంగా చూపిస్తుంది. అంతేకానీ మన వ్యక్తిత్వాన్ని, ఉనికిని మారుస్తుందా? మనల్ని మనం స్వీకరించడంలోనే నిజమైన ఆనందం ఉంది’ అంటూ కాజల్‌ పోస్ట్‌ చేశారు. అందం అంటే మనల్ని మనం ఉన్నది ఉన్నట్లుగా స్వీకరించుకోవడమని చెప్పుకొచ్చారు 12 ఏళ్లుగా సినీ పరిశ్రమలో కుర్ర నాయికలతో పోటీ పడుతూ తనదైన అందచందాలతో మెప్పించిన ఈ భామ.

‘మనం శారీరక ఆకర్షణ కోసం వెంపర్లాడే ప్రపంచంలో జీవిస్తున్నాం. అందం కోసం లక్షల రూపాయలు వెచ్చిస్తున్నాం. ఖరీదైన కాస్మోటిక్ ఉత్పత్తుల కోసం భారీగా డబ్బు వెచ్చిస్తున్నాం. మన క్రేజ్‌ను క్యాష్ చేసుకుంటూ మోసాలు కూడా చేస్తున్నారు. ఇది అన్ని చోట్లా ఉంది. అయితే.. మనల్ని మనం సహజంగా స్వీకరించుకోవడం మొదలు పెట్టినప్పుడే నిజంగా మనం ఆనందంగా ఉంటాం’ అని కాజల్ రాసుకొచ్చారు.