డ్వాక్రా మహిళలకు అద్భుత అవకాశం.. ఈ - నారీలుగా ఛాన్స్

డ్వాక్రా మహిళలకు స్వయం ఉపాధి అవకాశాలు కల్పించేందుకు ప్రభుత్పాలు ఎప్పటికప్పుడు కొత్త చర్యలు చేపడుతూ ఉంటాయి. తక్కువ వడ్డీకే రుణాలు అందించి వ్యాపారాలు చేసుకునేలా ఆర్థికంగా అండగా ఉండటంతో పాటుగా.. డబ్బును పొదుపు చేసుకునేలా ప్రోత్సహిస్తూ ఉంటాయి. ఈ క్రమంలోనే.. డ్వాక్రా సంఘాలలో సభ్యులుగా ఉండే మహిళలకు ప్రత్యామ్నాయ ఆదాయ వనరులను కల్పించడానికి ఆంధ్రప్రదేశ్ ప్రభుత్వం చర్యలు చేపడుతోంది. ఇందులో భాగంగా ఈ - నారీ అనే కాన్సెప్ట్ తెరపైకి వచ్చింది. ప్రస్తుత రోజుల్లో చేతిలో ఆండ్రాయిడ్ ఫోన్ లేనిదే ఏ పనీ జరగని పరిస్థితి. ఈ మార్పులకు తగినట్లు డ్వాక్రా సంఘాలలోని మహిళలకు కూడా అవగాహన కల్పించాల్సి ఉంటుంది.

ఎందుకంటే డ్వాక్రా మహిళలకు ఉపయోగకరంగా ఉండేలా ప్రభుత్వం కొత్త యాప్‌లు అందుబాటులోకి తెస్తోంది. ఇంటి వద్ద నుంచే రుణ వాయిదాల చెల్లింపులతో పాటుగా.. సంఘానికి సంబంధించిన పూర్తి సమాచారం తెలుసుకునేందుకు మన డబ్బులు - మన లెక్కలు వంటి మొబైల్ అప్లికేషన్లను కూడా అందుబాటులో తెస్తోంది. వీటిని ఉపయోగించాలంటే డ్వాక్రా మహిళలకు కనీస సాంకేతిక పరిజ్ఞానం అవసరం. ఈ నేపథ్యంలోనే ఈ -నారీ వ్యవస్థను ఏర్పాటు చేసేందుకు అధికారులు చర్యలు చేపడుతున్నారు. డ్వాక్రా సంఘాలలో యాక్టివ్‌గా ఉండే మహిళలను.. ఈ -నారీలుగా నియమించి.. వారి ద్వారా మిగతా సభ్యులకు వివిధ అంశాలపై అవగాహన కల్పించనున్నారు. అలాగే ఈ - నారీలుగా ఎంపికైన వారికి ఆర్థికంగా కూడా భరోసా అందించనున్నారు.

ఈ - నారీ అర్హతలు ఇవే..

మరోవైపు ఈ - నారీగా ఎంపిక చేసేవారికి అధికారులు కొన్ని అర్హతలు నిర్దేశించారు. వయసు 18 నుంచి 45 ఏళ్ల లోపు ఉండాలి. సంఘం సభ్యురాలిగా కొనసాగుతూ ఉండాలి. కనీసం పదో తరగతి చదివి ఉండాలి. ఆండ్రాయిడ్ ఫోన్ వాడకంపై అవగాహన ఉండాలి. అలాగే డ్వాక్రా సంఘాలకు సంబంధించిన పుస్తకాల నిర్వహణపై అవగాహన ఉండాలి. ఆసక్తిగల వారి నుంచి కొంతమందిని ఎంపిక చేస్తారు. మరోవైపు 25 కంటే ఎక్కువ డ్వాక్రా సంఘాలు ఉన్న గ్రామాలలో 6 నుంచి 10 మందిని ఈ - నారీలుగా ఎంపిక చేయనున్నారు. ఎంపిక చేసిన అనంతరం వారికి ట్రైనింగ్ కూడా ఉంటుందని అధికారులు చెప్తున్నారు.