ప్రమాదాల నివారణ కోసం,,,,ఆటో డ్రైవర్లకు రోజా పూలు

విజయవాడ పోలీసులు విధి నిర్వహణలో వినూత్న కార్యక్రమాలు చేపడుతున్నారు. ఇందులో భాగంగా మిస్టర్ పర్ఫెక్ట్ ఆటో డ్రైవర్‌ పేరుతో.. వృత్తి పట్ల నిబద్ధత, అంకితభావంతో వ్యవహరించే ఆటోడ్రైవర్లను సత్కరిస్తున్నారు. రోజా పూలు అందిస్తూ వారిని గౌరవిస్తున్నారు. ఆటో డ్రైవర్లకు ప్రత్యేకంగా డ్రెస్ కోడ్ ఉంటుంది. అలాగే వాహనాన్ని నడిపే సమయంలో అనేక నియమాలు పాటించాల్సి ఉంటుంది. ప్రయాణికుల భద్రతే లక్ష్యంగా.. రవాణా శాఖ అధికారులు డ్రైవర్లకు కొన్ని నియమ నిబంధనలు అమలు చేస్తున్నారు. ఇలాంటి నియమాలను కచ్చితంగా పాటిస్తున్న ఆటో డ్రైవర్లను విజయవాడ ట్రాఫిక్ పోలీసులు సత్కరిస్తున్నారు. వారికి రోజా పూలు అందిస్తూ, ఫోటోలు దిగుతూ ప్రోత్సహిస్తున్నారు. అలాగే మిస్టర్ పర్ఫెక్ట్ ఆటో డ్రైవర్ అంటూ పూలదండలు వేసి సత్కరిస్తున్నారు.

మరోవైపు హిట్ అండ్ రన్ కేసుల్లో బాధితులకు ఎన్టీఆర్ జిల్లా పోలీసులు ఊరట కల్గించారు. సుప్రీంకోర్టు ఆదేశాల మేరకు 238 కేసుల్లో 247 మందికి రూ.2 కోట్లు నష్టపరిహారం అందేలా ఎన్టీఆర్ జిల్లా ఎస్పీ చర్యలు తీసుకున్నారు. మరణించిన 51 కుటుంబాలకు 2 లక్షల చొప్పున.. గాయపడిన 196 మందికి రూ. 50,000 చొప్పున అందించారు. మరోవైపు క్రిస్మస్ సందర్భంగా ఇటీవల మహిళా పోలీసు సిబ్బందికి చీరలు పంపిణీ చేశారు. సాయి తేజ కన్సల్టెన్సి, మెడ్‌ప్లస్, నాట్కో సహకారంతో వీటిని ఏర్పాటు చేశారు.

 అలాగే భవానీ దీక్షల సందర్భంగా విజయవాడ పోలీసులు అందించిన సేవలపైనా ప్రశంసలు వ్యక్తమయ్యాయి. భవానీ దీక్షల సమయంలో తప్పిపోయిన బాలికను కేవలం గంటలోనే క్షేమంగా తల్లిదండ్రులకు అప్పగించటంపై భక్తుల నుంచి ప్రశంసలు వ్యక్తమయ్యాయి. భవాని దీక్షల సందర్భంగా రథం సెంటర్ వద్ద తప్పిపోయిన బాలికను విధుల్లో ఉన్న పోలీసులు గుర్తించి కంట్రోల్ రూం‌కు తీసుకెళ్లారు. అనంతరం పబ్లిక్ అడ్రెస్స్ సిస్టం ద్వారా సమాచారం అందించి.. తల్లిదండ్రుల వద్దకు చేరవేశారు.

అలాగే సేఫ్ రైడింగ్ మీద కూడా విజయవాడ ట్రాఫిక్ పోలీసులు వాహనదారులకు అవగాహన కల్పిస్తున్నారు. వాహనదారులకు బెలూన్లు అందిస్తూ మీ భద్రత మీ చేతుల్లోనే ఉంది. ట్రాఫిక్ నియమాలు మన కోసం.. మన ప్రాణాల కోసం అంటూ తెలియజేస్తున్నారు. మొత్తంగా సేఫ్ రైడింగ్ విషయంలోనూ, రూల్స్ ఫాలో అవుతున్న ఆటో డ్రైవర్లను ప్రోత్సహిస్తున్న విషయంలోనూ విజయవాడ పోలీసులపై నెట్టింట ప్రశంసలు కురుస్తున్నాయి.