నవంబర్‌ తర్వాతే సినీ నిర్మాణం గురించి ఆలోచిస్తా : కాజల్ అగర్వాల్

గత పదేళ్లుకు పైగా హీరోయిన్ కాజల్ అగర్వాల్ అందంతోనే కాకుండా అభినయంతో ఆకట్టుకొంటున్నారు. టాలీవుడ్‌లోని అగ్రహీరోలతోపాటు, కుర్ర హీరోలతో కూడా నటించి మెప్పించారు. తాజాగా ఆమె ఇష్టపడి చేసిన సీత చిత్రం నిరాశ పరిచింది. ఆ పరాజయ భారం నుంచి బయటపడి.. ఇప్పుడు రణరంగం చిత్రంలో ఓ కీలక పాత్రను పోషిస్తున్నారు. శర్వానంద్, కల్యాణి ప్రియదర్శినితో కలిసి రణరంగంలో నటించారు. ఈ చిత్రం ఆగస్టు 15వ తేదీన రిలీజ్ అవుతున్న నేపథ్యంలో కాజల్ అగర్వాల్ తెలుగు ఫిల్మీబీట్‌తో ముచ్చటించింది. కాజల్ చెప్పిన విషయాలు ఆమె మాటల్లోనే సీత మూవీ నన్ను నిరాశ పరిచింది. అయితే నా వంతు బాధ్యతను పూర్తిగా నెరవేర్చానని అనుకొంటాను. నిజాయితీగా పనిచేయడమే నా వంతు. అది హిట్టా ఫ్లాఫా అనేది మన చేతిలో ఉండదు. విజయం అనేది టీమ్ వర్క్. సీత విషయంలో నా జడ్జిమెంట్ కరెక్ట్. నా రోల్‌కు మంచి ప్రశంసలు లభించాయి. సీత సక్సెస్ సాధించనప్పటికీ నాకు మంచి సంతృప్తిని ఇచ్చింది అని కాజల్ పేర్కొన్నది.

ఇప్పటికీ సీత నా కెరీర్‌లో మంచి చిత్రంగా భావిస్తాను. మళ్లీ తేజ డైరెక్షన్‌లో నటించాలని అనుకొంటున్నాను. ఇంకా తేజ సార్ నుంచి ఎలాంటి సంకేతాలు లేవు. సీత పరాజయం ద్వారా ఎంతో కొంత నేర్చుకొన్నాను. ప్రతీ సినిమా ఓ అనుభవాన్ని నేర్పుతుంది. ఆ సినిమాకు నేను ఎంత ఉపయోగపడ్డానో అనేది నేను బేరీజు వేసుకొంటాను అని కాజల్ అగర్వాల్ వెల్లడించింది.సీత సినిమాలో నా పాత్ర నుంచి బయటపడటానికి కొంత సమయం పట్టింది. చాలాకాలం ఆ పాత్ర నన్ను వెంటాడింది. కొన్నిసార్లు నేను నా చుట్టు ఉన్న వాళ్లతో చికాకు పడుతుంటాను. ఇలాంటి సమస్యల నుంచి మెడిటేషన్ ద్వారా బయటపడుతాను. పద్మావత్ సినిమాలో ఖిల్జీ పాత్ర నుంచి బయటపడలేక మానసిక వైద్యుడిని సంప్రదించారని విన్నాను. సీత విషయంలో నాకు అలాంటి పరిస్థితులు ఎదురు కాలేదు అని కాజల్ వివరించారు.

దర్శకుడు ప్రశాంత్ వర్మతో కలిసి ఓ సినిమాను నిర్మిస్తున్నారనే వార్త నిజం కాదు. కానీ ఆ దిశగా ఆలోచిస్తున్నాను. చర్చలు జరుగుతున్నాయి. కానీ ఇప్పుడే నిర్మాణ రంగంలోకి ప్రవేశించలేను. ఎందుకంటే నవంబర్‌ తర్వాతే సినీ నిర్మాణం గురించి ఆలోచిస్తాను. ప్రశాంత్ వర్మ తెరకెక్కించే సినిమా కథ అద్భుతంగా ఉంటుందని మాత్రం చెప్పగలను అని కాజల్ తన భవిష్యత్ కార్యచరణను తెలిపారు.