గుణశేఖర్‌ అన్నిటికీ తెగించినట్లున్నాడే..

ఆంధ్రప్రదేశ్ ప్రభుత్వం ప్రకటించిన నంది అవార్డుల విషయంలో దర్శకుడు గుణశేఖర్ తీవ్ర స్థాయిలో అభ్యంతరాలు వ్యక్తం చేసిన సంగతి తెలిసిందే. ‘రుద్రమదేవి’ సినిమాకు నంది అవార్డుల విషయంలో జరిగిన అన్యాయం గురించే కాక.. అంతకుముందు ఈ సినిమాకు పన్ను మినహాయింపు విషయంలో చూపిన వివక్ష గురించి కూడా గుణశేఖర్ తన వాదన గట్టిగానే వినిపించాడు. అతడి వ్యాఖ్యలు తెలుగుదేశం ప్రభుత్వానికి ఇబ్బందికరంగానే మారాయి. దీంతో తెలుగుదేశం మద్దతుదారులు అతడిపై ఎదురు దాడి చేసేందుకు ప్రణాళిక రూపొందిస్తున్నట్లు.. అందుకు తగ్గ సరంజామా సిద్ధం చేస్తున్నట్లు మీడియాలో వార్తలొచ్చాయి. ఐతే వాళ్లు ఆ దాడి చేయడానికంటే ముందే గుణశేఖర్ అలెర్టయిపోయాడు.

గతంలో దిగ్గజ నిర్మాత ఎం.ఎస్.రెడ్డి తన ఆత్మకథలో గుణశేఖర్ గురించి తీవ్ర వ్యాఖ్యలు చేసిన సంగతి గుర్తుండే ఉంటుంది. గుణశేఖర్ కష్టాల్లో ఉన్నపుడు తాను అవకాశమిస్తే.. ఆ తర్వాత తాను సినిమా తీయమని అడిగితే చాలా పొగరుగా సమాధానం ఇచ్చినట్లు అందులో పేర్కొన్నాడు ఎం.ఎస్.రెడ్డి. మరి ఈ విషయాన్ని తెలుగుదేశం మద్దతుదారులు లేవనెత్తబోతున్నారని గుణకు ముందే ఉప్పందిందో ఏమో.. వాళ్ల కంటే ముందు తనే తన ట్విట్టర్ అకౌంట్లో దీని గురించి ప్రస్తావించాడు. తనను ఎం.ఎస్.రెడ్డి తనను తిట్టిన పేజీల్ని షేర్ చేస్తూ.. ‘‘ఈ నిందల్ని కొందరు తెలుగు తమ్ముళ్లు సమర్థించవచ్చేమో కానీ.. ఇదే పుస్తకంలో అన్నగారిపై వచ్చిన నిందల్ని నేను ఏమాత్రం నిజమని సమర్థించను’’ అని గుణశేఖర్ పేర్కొన్నాడు.

తన మీద ఇందులో ఉన్న నిందలు కరెక్టయితే ఎన్టీఆర్ మీద ఉన్నవి కూడా కరెక్టే అని ఒప్పుకోవాల్సిందే అని గుణ పరోక్షంగా టీడీపీ వర్గాలకు సంకేతాలు ఇచ్చినట్లయింది ఈ వ్యాఖ్యలతో. మొత్తానికి గుణశేఖర్ తీరు చూస్తుంటే.. అతను ఈ వ్యవహారంలో అన్నింటికీ తెగించినట్లే కనిపిస్తోంది. ఈ పుస్తకంలో ఎన్టీఆర్‌ మీద కూడా ఎం.ఎస్.రెడ్డి తీవ్ర విమర్శలు గుప్పించారు. జూనియర్ ఎన్టీఆర్‌ను సైతం ఆయన వదిలిపెట్టలేదు. ఇలా పలువురు ప్రముఖుల మీద ఎం.ఎస్.రెడ్డి విరుచుకుపడటంతో ఈ పుస్తకం బయటికే రాకుండా చేశారు ఆయన తనయుడు శ్యాంప్రసాద్ రెడ్డి.