![]() |
![]() |
by Suryaa Desk | Fri, Jul 12, 2024, 08:52 PM
ఆవేశంలో భార్యను చంపేశాడు. తాను జైలు పాలయ్యాడు. 14 ఏళ్లుగా ఇద్దరు పిల్లలు అనాథలయ్యారు. ఓ అనాథాశ్రమం నిర్వాహకులు ఇన్నాళ్లూ వారి ఆలనా పాలనా చూశారు. పద్నాలుగేళ్లు జైలు శిక్ష అనుభవించిన ఆ తండ్రి.. సత్ప్రవర్తన మీద ఇటీవలే విడుదలయ్యాడు. అనాథాశ్రమం నుంచి తన పిల్లల్ని తీసుకొని స్వస్థలానికి వెళ్లిపోయాడు. ఆ తర్వాత 3 రోజులకే చెప్పాపెట్టకుండా ఇంట్లోంచి వెళ్లిపోయాడు. తండ్రి రాక కోసం ఎదురుచూస్తున్న ఆ పిల్లలకు 3 రోజుల తర్వాత ఫోన్ చేసి, తాను హైదరాబాద్ వచ్చేశానని, పని వెతుక్కొని, మరో పెళ్లి చేసుకొని అక్కడే ఉంటానని చెప్పాడు. తమ జీవితాలు ఇకనైనా మారుతాయేమోనని ఆశపడ్డ ఆ పిల్లలు చేసేదేంలేక తిరిగి ఆనాథాశ్రమాన్ని ఆశ్రయించారు. తెలంగాణలోని జమ్మికుంటలో చోటు చేసుకున్న ఈ ఘటన కంటతడి పెట్టిస్తోంది.
కరీంనగర్ జిల్లా జమ్మికుంట మండలం వెంకటేశ్వర్లపల్లికి చెందిన సోమ సారయ్య, సత్తెమ్మ దంపతులకు ఒక కుమార్తె, కుమారుడు సంతానం. 2010లో భార్యాభర్తల మధ్య గొడవ జరిగింది. క్షణికావేశంలో సారయ్య తన భార్యపై దాడి చేసి బలంగా తోసేయడంతో సత్తెమ్మ కింద పడి తలకు తీవ్ర గాయమై మృతి చెందింది. హత్యానేరం కింద పోలీసులు అతడిని అరెస్టు చేసి జైలుకు పంపారు. ఆ సమయంలో కుమార్తె పూజ వయసు 5 ఏళ్లు, కుమారుడు బన్నీకి 3 ఏళ్లు.
భార్య హత్య కేసులో సారయ్యకు న్యాయస్థానం జీవిత ఖైదు విధించింది. తల్లి హత్యకు గురై, తండ్రి జైలు పాలై చిన్నారులిద్దరూ అనాథలయ్యారు. వారి కష్టాన్ని చూసి నాటి సీఐ సుందరగిరి శ్రీనివాస్రావు వారిని జమ్మికుంటలోని ‘స్పందన’ స్వచ్ఛంద సేవా సంస్థ అనాథ ఆశ్రమంలో చేర్పించారు.
అనాథాశ్రమ నిర్వాహకులు వీరస్వామి, శోభారాణి ఇన్నాళ్లూ ఆ పిల్లల ఆలనా పాలనా చూశారు. పూజ ప్రస్తుతం డిగ్రీ చదవుతుండగా, బన్నీ ఇంటర్ చదువుతున్నాడు. సత్ప్రవర్తన కలిగిన ఖైదీలను తెలంగాణ ప్రభుత్వం ఈ నెల 3న విడుదల చేసింది. చంచల్గూడ జైలు సారయ్య విడుదలై బయటికొచ్చాడు. 5వ తేదీన స్పందన ఆశ్రమానికి వచ్చి తన పిల్లలను కలిశాడు. పెద్దవాళ్లైన పిల్లలను ఆశ్రమ నిర్వాహకులు సారయ్యకు అప్పగించారు.
పోషణ బాధ్యత తీసుకుంటానని చెప్పి, పిల్లలను వెంటబెట్టుకుపోయిన సారయ్య.. జమ్మికుంటలో ఓ గది అద్దెకు తీసుకున్నాడు. 3 రోజులు పిల్లలతో ఉన్నాడు. జూలై 8న జైలు అధికారులు తనను రమ్మన్నారని పిల్లలకు మాయమాటలు చెప్పి హైదరాబాద్ వెళ్లిపోయాడు. మరుసటి రోజు పిల్లలకు ఫోన్ చేసి తాను హైదరాబాద్లోనే పని చూసుకొని, మరో పెళ్లి చేసుకొని అక్కడే ఉంటానని చెప్పాడు. ఆ మాటలు విని అక్కాతమ్ముడు షాక్కు గురయ్యారు. వారు అలా షాక్లో ఉండగానే.. ‘ఇకపై మీకు నాకు సంబంధం లేదు. ఆధార్ కార్డు, సర్టిఫికెట్లలోనూ తండ్రి పేరు చోట నా పేరును తీసేయండి’ అని చెప్పి ఫోన్ పెట్టేశాడు. తండ్రి నుంచి ఊహించని మాటలు విని పిల్లలిద్దరూ తీవ్ర మనోవేదనకు గురయ్యారు. ఎటు వెళ్లాలో తెలియదు. ఏం చేయాలో తెలియదు. ఆదరించేవారు ఎవరూ లేరు. తిరిగి ఆశ్రమానికే వెళ్లారు.