![]() |
![]() |
by Suryaa Desk | Mon, Aug 12, 2024, 07:38 PM
తెలంగాణ ఏర్పడిన పదేళ్ల తర్వాత అధికారంలోకి వచ్చిన కాంగ్రెస్ ప్రభుత్వాన్ని సీఎం రేవంత్ రెడ్డి.. తనదైన పాలనతో ప్రజల్లోకి తీసుకెళ్తున్నారు. ఈ క్రమంలోనే.. సంచలన నిర్ణయాలు తీసుకుంటూ పాలనలో తమ మార్క్ చూపిస్తున్నారు. అయితే.. పదేళ్లు తెలంగాణను పాలించిన బీఆర్ఎస్ పార్టీపై తీవ్ర ఆరోపణలు చేస్తున్న సీఎం రేవంత్ రెడ్డి.. రాష్ట్రంలో మాజీ సీఎం కేసీఆర్ ఆనవాళ్లు లేకుండా చేస్తానంటూ ఘాటు వ్యాఖ్యలు చేసిన సంగతి తెలిసిందే. ఈ మేరకు.. ప్రగతిభవన్ను ప్రజాభవన్గా, 'టీజీ'ని 'టీఎస్'గా మార్చటంతో పాటు రాష్ట్రంలో అమలవుతున్న పథకాల పేర్ల నుంచి మొదలు తెలంగాణ లోగో, తెలంగాణ తల్లి విగ్రహం, రాష్ట్ర గీతంలో మార్పుల వరకు తనదైన మార్క్ ఉండేలా చూసుకుంటున్నారు. ఇన్ని మార్పులు చేస్తున్న సీఎం రేవంత్ రెడ్డి కొన్ని విషయాల్లో మాత్రం కేసీఆర్ను ఫాలో అవుతుండటం గమనార్హం.
మొన్నటి కేంద్ర బడ్జెట్లో తెలంగాణకు అన్యాయం చేశారంటూ తీవ్ర ఆగ్రహం వ్యక్తం చేసిన సీఎం రేవంత్ రెడ్డి.. కేసీఆర్ బాటలోనే తన నిరసన వ్యక్తం చేశారు. నీతి ఆయోగ్ సమావేశాన్ని బైకాట్ చేస్తూ.. నరేంద్ మోదీ ప్రభుత్వంపై నిరసన వ్యక్తం చేశారు. కాగా., ఇప్పుడు మరో విషయంలోనూ కేసీఆర్ను ఫాలో అవనున్నట్టు తెలుస్తోంది. తెలంగాణలో తొలిసారి అధికారంలోకి వచ్చిన తర్వాత వస్తున్న స్వాతంత్ర్య వేడుకలను ఘనంగా నిర్వహించాలని యోచిస్తోంది. ఈమేరకు ఏర్పాట్లు కూడా చేస్తోంది. అయితే.. తెలంగాణ ఆవిర్భావం నుంచి 2023 స్వాతంత్ర్య వేడుకల వరకు.. మాజీ సీఎం కేసీఆర్.. గోల్కొండ కోటపైనే జెండా ఎగురవేయగా.. ఇప్పుడు సీఎం రేవంత్ రెడ్డి కూడా అదే సంప్రదాయాన్ని కొనసాగించనున్నట్టు తెలుస్తోంది.
ముఖ్యమంత్రి హోదాలో తొలిసారి గోల్కొండ కోటపై త్రివర్ణ పతాకాన్ని ఎగురవేయాలని నిర్ణయించుకున్నట్టు తెలుస్తోంది. దీంతో.. గోల్కొండలో పంద్రాగస్టు కోసం జరుగుతున్న ఏర్పాట్లను.. అమెరికా పర్యటన ముంగించుకుని తిరిగి వచ్చిన సీఎస్ శాంతికుమారి సోమవారం పరిశీలించారు. వేడుకల సమయంలో వర్షం కురిస్తే.. తడవకుండా వాటర్ ప్రూఫ్ టెంట్లు ఏర్పాటు చేయాలని అధికారులను శాంతి కుమారి ఆదేశించారు. వీఐపీలు రానున్న నేపథ్యంలో ప్రజలకు అసౌకర్యం కలగకుండా బందోబస్తు, ట్రాఫిక్ ఏర్పాట్లు, పార్కింగ్పై దృష్టి సారించాలని పోలీసులను ఆమె ఆదేశించారు. కాగా.. ఈ స్వాతంత్ర్య వేడుకల్లో తెలంగాణ సంస్కృతి సంప్రదాయాలు ప్రత్యేక ఆకర్షణగా నిలవనున్నాయి.
అయితే.. సీఎం రేవంత్ రెడ్డికి.. రాజుల సంప్రదాయాలు, కోటలు ఇలాంటి విషయాలను ఎంత మాత్రం ఇష్టం ఉండదన్న విషయం అందరికీ తెలిసిందే. ఈ విషయాన్ని ఆయనే చాలా సందర్భాల్లో పంచుకున్నారు. కాగా.. ఇప్పుడు గోల్కొండ కోటపై జెండా ఎగరేయటం.. అది కూడా కేసీఆర్ ఆరభించిన సంప్రదాయాన్ని కొనసాగించటమనేది ఇప్పుడు సర్వత్రా చర్చనీయాంశంగా మారింది.