సింగరేణి కాంట్రాక్ట్ ఉద్యోగులకు.. 30 లక్షల ప్రమాద బీమా వర్తింపు

కాంట్రాక్ట్‌ ఉద్యోగులకు సింగరేణి సంస్థలో పని చేస్తున్న.. సుమారు 25 వేల మంది ఉద్యోగుల కుటుంబాలకు ఆర్థిక భద్రత కల్పించాలన్న లక్ష్యంతో.. రూ.30 లక్షల ప్రమాద బీమా సదుపాయం వర్తింపజేస్తున్నట్లు సింగరేణి యాజమాన్యం ప్రకటించింది. హెచ్‌డీఎఫ్‌సీ సాలరీ అకౌంట్‌ ఉన్న ప్రతి కాంటాక్ట్ ఉద్యోగికి ఈ ప్రమాద బీమా అమలవుతుందని సంస్థ ఛైర్మన్‌, ఎండీ బలరాం ప్రకటించారు.

సింగరేణి భవన్‌లో.. కాంట్రాక్ట్ ఉద్యోగుల సంక్షేమంపై సంస్థ డైరెక్టర్లు, ఏరియా జీఎంలతో వీడియో కాన్ఫరెన్స్ నిర్వహించారు. ఈ సందర్భంగా మాట్లాడిన బలరాం.. ప్రమాద బీమా సదుపాయం వర్తింపజేసేందుకు ప్రతి కాంట్రాక్ట్‌ ఉద్యోగి హెచ్‌డీఎఫ్‌సీ బ్యాంక్‌లో సాలరీ అకౌంట్‌ ఉండాలని తెలిపారు. ఈ విషయంలో ఏరియా జీఎంలు సంబంధిత కాంట్రాక్టర్ల ద్వారా అవగాహన కల్పించాలని ఆదేశాలు జారీ చేశారు.

 ఇప్పటికే.. సింగరేణి ఉద్యోగుల కోసం ఎస్‌బీఐ, యూనియన్‌ బ్యాంక్‌ల ద్వారా కోటి ప్రమాద బీమా పథకాన్ని సీఎం, ఉప ముఖ్యమంత్రి చేతులమీదుగా ప్రారంభించామని బలరాం గుర్తుచేశారు. అలాగే కాంట్రాక్టు కార్మికుల సంక్షేమం కోసం హెచ్‌డీఎఫ్‌సీ బ్యాంకుతోనూ ఒప్పందం చేసుకుని రూ.30 లక్షల ప్రమాద బీమా వర్తింపజేయనున్నట్లు పేర్కొన్నారు. ఇతర ప్రభుత్వ రంగ బ్యాంకుల ద్వారా రూ.50 లక్షల వరకు ప్రమాద బీమా సదుపాయాన్ని కాంట్రాక్టు ఉద్యోగులకు వర్తింపజేసేందుకు కూడా ప్రయత్నాలు జరుగుతున్నాయని వివరించారు.

కాంట్రాక్టు ఉద్యోగుల కుటుంబ సభ్యుల సామాజిక, ఆర్థిక భద్రత చర్యల్లో భాగంగా.. చర్యలు తీసుకుంటున్నట్లు బలరాం తెలిపారు. కాంట్రాక్టు కార్మికులకు సింగరేణి ఆసుపత్రుల్లో వైద్యసేవలు అందిస్తున్నామని.. వారి కుటుంబ సభ్యులకు, పిల్లలకు కూడా ఆరోగ్య సేవలు అందించే విషయంపై ఈఎస్ఐ ఆసుపత్రుల ఉన్నతాధికారులతో సంప్రదింపులు జరుపుతున్నట్లు స్పష్టం చేశారు.

 కొత్తగూడెం, సింగరేణి థర్మల్ విద్యుత్ కేంద్రం లో ఈఎస్ఐ ఆసుపత్రుల ద్వారా కాంట్రాక్టు ఉద్యోగులకు, వారి కుటుంబ సభ్యులకు వైద్య సేవలు అందించేందుకు కృషి చేస్తున్నట్లు బలరాం వివరించారు. కార్మిక చట్టాలు, కోర్టు దిశానిర్దేశం ప్రకారం కాంట్రాక్టు ఉద్యోగులందరికీ తప్పనిసరిగా.. పీఎఫ్, సీఎంపీఎఫ్, పింఛన్ కోసం జీతంలో కొంత రికవరీ చేసి.. కాంట్రాక్టర్ల ద్వారా అంతే మొత్తాన్ని కలిపి వారి ఖాతాల్లో జమ చేయాల్సి ఉంటుందని బలరాం తెలిపారు.