స్కూల్స్, కాలేజీల‌కు వెళ్లే అమ్మాయిలే టార్గెట్.. ఇలాంటి కాల్స్‌తో జాగ్రత్త

ప్రస్తుతం రోజుకో తరహా కొత్త మోసాలు వెలుగు చూస్తున్నాయి. ఈజీ మనీకి అలవాటు పడిన కొందరు అమాయకులను టార్గెట్‌గా చేసుకొని మోసాలకు పాల్పడుతున్నారు. వారి బలహీనతలే పెట్టుబడిగా డబ్బులు లాగేస్తున్నారు. తాజాగా.. స్కూల్స్, కాలేజీల‌కు వెళ్లే అమ్మాయిలను నేరగాళ్లు టార్గెట్ చేశారు. వారిని కిడ్నాప్ చేశారంటూ త‌ల్లిదండ్రులకు సైబ‌ర్ నేర‌గాళ్లు పోలీసుల పేరుతో వాట్సాప్ కాల్స్ చేసి బెదిరింపుల‌కు దిగుతున్నారు. అడిగినంత డ‌బ్బు ఇవ్వకుంటే వారిని కిడ్నాప‌ర్లు చంపేస్తారంటూ భ‌య‌భ్రాంతుల‌కు గురిచేస్తున్నారు.

తాజాగా హైదరాబాద్ రాయ‌దుర్గంలో ఓ విద్యార్థిని తల్లిదండ్రులకు విదేశీ ఫోన్ నంబ‌ర్‌తో సైబ‌ర్ నేర‌గాళ్లు వాట్సాప్ కాల్ చేశారు. 'నేను పోలీస్ ఆఫీస‌ర్‌ను మాట్లాడుతున్నాను. కాలేజీకి వెళ్లిన మీ అమ్మాయి కిడ్నాప్‌న‌కు గురైంది. ఆమె ప్రస్తుతం మాద‌గ్గరే ఉంది. వెంట‌నే మేం అడిగినంత డ‌బ్బును ఆన్‌లైన్ ద్వారా పంపించండి. లేకుంటే మీ అమ్మాయిని కిడ్నాప‌ర్లు చంపేస్తారు.' అని బెదిరించారు. ఇదిగో మీ అమ్మాయి ఏడుస్తుందంటూ ఒక వాయిస్‌ కూడా వినిపించారు.

ఏడుస్తున్న గొంతు వినిపించ‌డంతో కాలేజీకి వెళ్లిన త‌మ‌ కూతురు కిడ్నాప్‌న‌కు గురైంద‌ని త‌ల్లిదండ్రులు ఆందోళనకు గురయ్యారు. ఏకంగా పోలీసులే కాల్ చేయటంతో డ‌బ్బులు పంపించేందుకు సిద్ధపడ్డారు. మోసగాళ్లతో ఫోన్‌లో మాట్లాడుతూనే త‌మ బంధువుల‌కు ఈ విష‌యాన్ని చేర‌వేశారు. త‌మ కూతురు కాలేజీలో ఉందో.. లేదో తెలుసుకోండ‌ని వారిని పంపించారు. ఆమె కాలేజీలో క్షేమంగా ఉంద‌ని చెప్పటంతో వీరు ఊపిరిపీల్చుకున్నారు. వెంటనే స్థానిక పోలీస్ స్టేషన్‌కి వెళ్లి ఫిర్యాదు చేశారు.

ఈ త‌ర‌హా బెదిరింపు ఫోన్ కాల్స్ తెలుగు రాష్ట్రాల్లో ఎక్కువ‌గా వ‌స్తున్నాయని టీజీఎస్‌ఆర్టీసీ ఎండీ సజ్జనార్ ట్వీట్ చేశారు. ఆడ పిల్లలను కిడ్నాప్ చేశార‌ని చెప్పగానే న‌మ్మి తల్లిదండ్రులు సైబర్ కేటుగాళ్లకు డ‌బ్బులు పంపిస్తున్నారన్నారు. అజ్ఞాత వ్యక్తుల నుంచి విదేశీ ఫోన్ నెంబర్లతో వ‌చ్చే వాట్సాప్ కాల్స్‌కు ఎవరూ స్పందించవద్దని సూచించారు. వారి బెదిరింపుల‌కు ఏ మాత్రం జంక‌కుండా వెంటనే స్థానిక పోలీస్ స్టేష‌న్లలో ఫిర్యాదు చేయాలన్నారు. సైబర్ నేరాల పట్ల ప్రతి ఒక్కరూ అప్రమత్తంగా ఉండాలని ఏ మాత్రం అనుమానం ఉన్నా వెంటనే పోలీసులకు కాల్ చేయాలని ఆయన ట్విట్టర్ వేదికగా సూచించారు.