తెలంగాణలో భారీగా పెరిగిన విడాకులు.. దేశంలో ఎన్నో స్థానమంటే..?

ప్రస్తుత కాలంలో పెళ్లంటే చాలు మూతి ముప్పై వంకర్లు తిప్పేస్తున్నారు యువత. అందరూ అలాగే ఉన్నారని కాదండోయ్.. చాలా వరకు యువత పెళ్లిపై ఆసక్తి చూపించట్లేదు. పోనీ.. పెద్దలు బలవంతం చేసో.. బెదిరించో.. బతిమాలో.. అమ్మాయికీ, అబ్బాయికీ ముడి వేస్తే.. అది కాస్త మూన్నాళ్లకే విప్పేసుకుంటున్నారు చాలా మంది. అలాగని.. ప్రాణానికి ప్రాణంగా ప్రేమించి.. నువ్వులేక నేనులేను.. నువ్వే కావాలి.. నువ్వే నా ప్రాణం.. అంటూ చేతితో చెయ్యేసి బాసలు చేసుకున్న జంటలేమైన చివరి వరకు కలిసే ఉంటున్నాయా అంటే.. అదీ లేదు. ఏదో ఓ కారణం దొరికించుకుని.. ఆ బంధాన్ని వదిలించుకుంటూనే ఉన్నారు. పెళ్లి ఘనంగా వెయ్యి మందిని పిలిచి చేసినప్పటికీ.. ఇలాంటి ముచ్చట మాత్రం ఎవ్వరికీ తెలియకుండా సైలెంట్‌గా కానిచ్చేస్తున్నారు సామాన్యులు. కానీ.. సెలెబ్రిటీలు మాత్రం బహిరంగంగానే తాము విడిపోతున్నామంటూ ప్రకటించేస్తున్నారు.

నాగచైతన్య- సమంత, నిహారిక కొణిదెల- చైతన్య లాంటి సెలెబ్రిటీ జంటలు బహిరంగంగానే తమ విడాకుల విషయాన్ని ప్రకటించగా.. సామాన్యులు మాత్రం గుట్టు చప్పుడు కాకుండా ఎవరిదారి వాళ్లు చూసుకుంటున్నారు. అయితే.. ఇలా దంపతులు విడాకులు తీసుకునేందుకు కారణాలేమైనప్పటికీ.. తెలంగాణలో మాత్రం డివోర్స్ రేట్ మాత్రం గణనీయంగా పెరిగిపోయినట్టుగా రిపోర్టులు వెల్లడిస్తున్నాయి. తాజాగా ఓ సంస్థ దేశంలో అత్యధిక విడాకులు తీసుకుంటున్న ఏడు రాష్ట్రాల జాబితాను వెల్లడించింది. ఆ రిపోర్టు ప్రకారం.. విడాకుల సంఖ్యలో తెలంగాణ దేశంలో 6వ స్థానంలో నిలిచింది. ప్రస్తుతం తెలంగాణలో సుమారు 6.7 శాతంగా డివోర్స్ రేట్ ఉందని రిపోర్టు వెల్లడించింది.

ఇక.. దేశంలోనే అత్యధికంగా 18.7 శాతం విడాకుల రేటుతో మహారాష్ట్ర అగ్రస్థానంలో నిలవటం గమనార్హం. కాగా... 11.7 శాతంతో కర్ణాటక రెండో స్థానంలో నిలిచింది. ఇక.. 8.2 శాతం డివోర్ట్ రేటుతో.. పశ్చిమ బెంగాల్ మూడో స్థానంలో ఉంది. ఇక నాలుగో స్థానంలో దేశ రాజధాని ఢిల్లీ నిలిచింది. ఢిల్లీలో విడాకుల రేటు 7.7 శాతం ఉండగా.. ఇది మరింత పెరిగే అవకాశం ఉందని రిపోర్టు వెల్లడించింది. ఇక.. ఆ వెంటనే 7.1 శాతంతో తమిళనాడు ఐదో స్థానంలో ఉంది. ఇక.. 6.7 శాతంతో.. తెలంగాణ ఈ జాబితాలో ఆరో స్థానంలో నిలిచింది. చివరికి.. 6.3 శాతం విడాకుల రేట్‌తో కేరళ ఏడో స్థానంలో కొనసాగుతోంది.

అయితే.. పెళ్లి చేసుకున్న దంపతుల మధ్య.. స్వేచ్ఛ, సమానత్వం, ఆర్థిక స్థిరత్వం, అనుమానాలు, అభద్రతాభావం, వ్యక్తిగత అలవాట్లు ఇలా రకరకాల కారణాలే విడాకులకు దారి తీస్తున్నట్టు అధ్యయనాలు చెప్తున్నాయి. ప్రధానంగా.. పితృస్వామ్య వ్యవస్థ ఆచారాలను భరించలేక చాలా మంది మహిళలు విడాకులు తీసుకుని ఇండిపెండెంట్‌గా బతకాలని నిర్ణయించుకుంటున్నట్టు నిపుణులు చెప్తున్నారు. ఏది ఏమైనా భారత్‌లో కూడా పాశ్చత్య దేశాల మాదిరిగా.. విడాకుల సంఖ్య పెరిగిపోతుండగా.. అందులో తెలంగాణ ఆరో స్థానంలో ఉండటం గమనార్హం.