త్వరలోనే అకౌంట్లలోకి రూ.10 వేలు.. మంత్రి పొంగులేటి

తెలంగాణలో వర్షాలు, వరదలు బీభత్సం సృష్టించిన విషయం తెలిసిందే. గత పది రోజుల క్రితం కురిసిన వర్షాలకు పలు జిల్లాలు అతలాకుతలం అయ్యాయి. మెుత్తం 29 జిల్లాలను వరద ప్రభావిత జిల్లాలుగా గుర్తించగా.. ఖమ్మం, మహబూబాబాద్ జిల్లాల్లో భారీగా నష్టం వాటిల్లింది. మెుత్తం 33 మంది ప్రాణాలు కోల్పోయారు. ఇండ్లు, పొలాలు, మూగజీవాలు కొట్టుకుపోయి చాలా మంది నిరాశ్రయులుగా మిగిలారు. వందల గ్రామాలు ముంపునకు గురి కాగా.. లక్షల మంది బాధితులుగా మారారు. ఈ నేపథ్యంలో వరద బాధితులను ఆదుకుంటామని ప్రభుత్వం హామీ ఇచ్చింది.

ఇప్పటికే వరద బాధితుల అకౌంట్లలో రూ.16,500 చొప్పున జమ చేశారు. తాజాగా.. పంట నష్ట పరిహారంపై రెవెన్యూ శాఖ మంత్రి పొంగులేటి శ్రీనివాస్ రెడ్డి కీలక కామెంట్స్ చేశారు. వర్షాలు, వరదలతో పంట నష్టపోయినవారికి సాయం త్వరలోనే బ్యాంకు ఖాతాల్లో జమవుతుందని చెప్పారు. బాధితుల ఖాతాల్లో ఎకరాకు రూ.10 వేల చొప్పున త్వరలోనే జమ చేస్తామని అన్నారు. వరదలతో తెలంగాణ వ్యాప్తంగా రూ.10 వేల కోట్ల పైచిలుకు ఆస్తి నష్టం జరిగిందన్నారు. గతంలో కేంద్రమిచ్చిన సాయం కాగితాలకే పరిమితమైందని పొంగులేటి ఆరోపించారు. గత బీఆర్ఎస్ ప్రభుత్వం విపత్తు నిర్వహణ నిధులు ఎలా వాడారనే వివరాలను తాజాగా తాము సేకరిస్తున్నామన్నారు.

భారీ వర్షాలు, వరదలు వంటి ప్రకృతి విపత్తులు వచ్చినప్పుడు కేంద్రంపై ఆదారపడకుండా రాష్ట్ర స్థాయిలోనే ప్రత్యేక టీంలు ఏర్పాటు చేసే దిశగా తమ ప్రభుత్వం యోచిస్తోందని చెప్పారు. ప్రతి పోలీసు బెటాలియన్‌ నుంచి 100 మందికి స్పెషల్‌గా ట్రైనింగ్ ఇచ్చి వారిని విపత్తు నిర్వహణలో నిమగ్నం చేస్తామని అన్నారు. త్వరలోనే ముఖ్యమంత్రి రేవంత్‌ రెడ్డి నేతృత్వంలో ప్రధాని మోదీ, కేంద్ర మంత్రులను కలిసి వరద నష్టాన్ని వివరిస్తామన్నారు. కేంద్రం నుంచి ఆర్థిక సాయం కోరతామని చెప్పారు. విద్యుత్‌ స్తంభాలు, ట్రాన్స్‌ఫార్మర్ల ఏర్పాటుకు రైతుల ట్రాక్టర్లు కాకుండా శాఖకు సంబంధించిన ట్రాక్టర్లనే వినియోగించాలని విద్యుత్ శాఖ అధికారులకు సూచించారు. ఈ అంశంపై ఫిర్యాదులు వస్తున్నాయని.. రైతులపై భారం మోపకూడదన్నారు.