'కేసీఆర్ కుటుంబంలో లొల్లి షురూ.. ఆయన వస్తే మాత్రం కేటీఆర్, హరీష్ పక్కా జైలుకే.

మాజీ ముఖ్యమంత్రి, బీఆర్ఎస్ అధినేత కేసీఆర్ కుటుంబంలో గొడవలు మొదలయ్యాయని.. త్వరలోనే కేటీఆర్, హరీష్ రావు జైలుకు వెళ్లటం ఖాయమని మంత్రి కోమటిరెడ్డి వెంకట్ రెడ్డి సంచలన వ్యాఖ్యలు చేశారు. అమృత్ టెండర్లలో విషయంలో భారీ అవినీతి జరిగిందంటూ.. బీఆర్ఎస్ వర్కింగ్ ప్రెసిడెంట్ కేటీఆర్ చేసిన ఆరోపణలపై స్పందించిన కోమటిరెడ్డి వెంకట్ రెడ్డి.. ఈ మేరకు కీలక వ్యాఖ్యలు చేశారు. అవినీతి జరిగినట్లుగా ఏమైనా ఆధారాలు ఉన్నాయా అని ప్రశ్నించిన మంత్రి.. ఉంటే కేటీఆర్ బయటపెట్టాలని డిమాండ్ చేశారు. కేంద్రం నుంచి రూ. 8888 కోట్లు మంజూరు అయినట్టు ఆధారాలు తీసుకొస్తే తామంతా దేనికైనా సిద్ధమేనని కోమటిరెడ్డి సవాల్ విసిరారు. పదేళ్లు మంత్రిగా పని చేసిన కేటీఆర్.. ఆలోచించి మాట్లాడాలని.. చిన్నపిల్లాడిలా మాట్లాడొద్దని హితవు పలికారు.

కేసీఆర్ కుటుంబంలో ఇప్పటికే గొడవలు షురూ అయ్యాయని.. అందుకే కేటీఆర్ నోటికొచ్చినట్టుగా మాట్లాడుతున్నారని కోమటిరెడ్డి వెంకట్ రెడ్డి ఆరోపించారు. ప్రతిపక్ష నాయకుడి పదవి తనకొద్దని.. కేసీఆర్ అంటున్నారన్న కోమటిరెడ్డి.. ఆ పదవి నాకంటే నాకు కావాలంటూ కేటీఆర్, హరీశ్ రావు పట్టుబడుతున్నారంటూ చెప్పుకొచ్చారు.

ఇక.. ఇంటెలిజెన్స్ మాజీ చీఫ్ ప్రభాకర్ రావు.. అమెరికా నుంచి హైదారాబాద్‌కు వస్తే కేటీఆర్, హరీశ్ రావు ఇద్దరూ జైలుకు వెళ్లడం ఖాయమంటూ కోమటిరెడ్డి సంచలన వ్యాఖ్యలు చేశారు. అమెరికాకు వెళ్లి ప్రభాకర్ రావును హైదరాబాద్‌కు రావొద్దంటూ కేటీఆర్, హరీష్ రావు దండం పెట్టి వచ్చారని ఆరోపించారు. ఒకవేళ ప్రభాకర్ రావు హైదరాబాద్‌కు వచ్చి అప్రూవర్‌గా మారితే మాత్రం ఇద్దరు జైలుకు వెళ్లటం ఖాయమని చెప్పుకొచ్చారు.

ఎన్నికల సమయంలో ఇచ్చిన హామీలు ఒకదాని తర్వాత ఒకటి నెరవేరుస్తుంటే.. బీఆర్ఎస్ నేతలు ఓర్వలేకపోతున్నారంటూ మంత్రి కోమటిరెడ్డి దుయ్యబట్టారు. పదేళ్లు అధికారంలో ఉన్న బీఆర్ఎస్ పార్టీ ఇప్పుడు తెలంగాణలో తుడిచిపెట్టుకుపోయిందని ఎద్దేవా చేశారు. ఇక తెలంగాణలో బీఆర్ఎస్ పార్టీ కనిపించదని తెలిపారు. కేటీఆర్, హరీశ్ రావు బచ్చాగాళ్లని.. ఆధారాలు లేకుండా ఏది పడితే అది మాట్లాడితే ప్రజలు ఊరుకోరని కోమటిరెడ్డి తెలిపారు.

ఇక.. ఎన్నికల సమయంలో.. కోడ్ నిబంధనలకు విరుద్ధంగా తన బినామీ సత్యం రామలింగరాజు కుమారుడి కంపెనీకి కేటీఆర్ టెండర్లు కట్టబెట్టారని మంత్రి కోమటిరెడ్డి ఆరోపించారు. ప్రపంచస్థాయిలో తెలుగువారి ఇజ్జత్ తీసిన రామలింగరాజు కుమారుడు కేటీఆర్‌కు రైట్ హ్యాండ్ అంటూ మంత్రి కోమటిరెడ్డి వెంకర్ రెడ్డి ఎద్దేవా చేశారు.