తెలంగాణకు స్మితా సబర్వాల్ భర్త.. సీఎం రేవంత్ స్పెషల్ రిక్వెస్ట్‌తోనే

తెలంగాణ, ఆంధ్రప్రదేశ్ కేడర్ ఐఏఎస్, ఐపీఎస్ అధికారులపై కేంద్ర సర్కార్ సంచలన నిర్ణయం తీసుకుంది. తెలంగాణలో పనిచేస్తున్న ఏపీ కేడర్ ఐఏఎస్, ఐపీఎస్ అధికారులను.. ఆంధ్రప్రదేశ్‌లో రిపోర్టు చేయాలని ఆదేశించింది. ఈ క్రమంలోనే.. తెలంగాణలో పనిచేస్తున్న ఐఏఎస్ అధికారులు ఆమ్రపాలి కాట, రొనాల్డ్‌ రోస్, వాకాటి కరుణ, వాణీప్రసాద్, ప్రశాంతి.. ఏపీలో రిపోర్టు చేయాల్సి ఉంది. వీరితో పాటు ఐపీఎస్ అధికారులు అంజనీకుమార్, అభిలాష, అభిషేక్ మొహంతి కూడా ఆంధ్రప్రదేశ్‌లో రిపోర్టు చేయాలని ఉత్తర్వులు జారీ చేసింది. తమను తెలంగాణకు కేటాయించాలని చేసిన విజ్ఞప్తులను కేంద్రం తోసిపుచ్చింది. ఇదిలా ఉంటే.. కేంద్రం మరో కీలక నిర్ణయం తీసుకుంది.

డిప్యూటేషన్ మీద కేంద్ర సర్వీసులకు వెళ్లిన మరో డైనమిక్ ఐపీఎస్ ఆఫీసర్‌ అయిన అకున్ సబర్వాల్.. మళ్లీ తిరిగి తెలంగాణకు పంపించాలని మోదీ సర్కార్ నిర్ణయింది. ఈ మేరకు.. శుక్రవారం (అక్టోబర్ 11న) రోజు అకున్ సబర్వాల్‌ను తెలంగాణకు రిలీవ్ చేస్తూ కేంద్ర హోంశాఖ ఉత్తర్వులు జారీ చేసింది. గతంలో తెలంగాణలో విధులు నిర్వహించిన అకున్ సబర్వాల్.. సంచలనాలు సృష్టించిన కేసులను డీల్ చేశారు. ముంఖ్యంగా.. టాలీవుడ్‌లో ప్రకంపనలు సృష్టించిన డ్రగ్స్ వ్యవహారాన్ని ఎక్సైజ్ కమిషనర్‌గా అకున్‌ సబర్వాలే డీల్ చేయటం గమనార్హం. ఎన్నో కీలకమైన బాధ్యతలు నిర్వహించిన.. 2023లో కేంద్ర హోంశాఖలోకి డిప్యుటేషన్‌పై వెళ్లారు. ప్రస్తుతం ఐటీబీపీ ఐజీగా విధులు నిర్వహిస్తున్న అకున్ సబర్వాల్ తెలంగాణకు తిరిగి వస్తున్నారు.

అయితే.. అకున్ సబర్వాల్ తెలంగాణకు తిరిగి రావటానికి కారణం సీఎం రేవంత్ రెడ్డి చేసిన స్పెషల్ రిక్వెస్టేనని సమాచారం. ఇటీవల ఢిల్లీ పర్యటనకు వెళ్లిన రేవంత్ రెడ్డి.. అక్టోబర్ 7వ తేదీన కేంద్ర హోం శాఖ నిర్వహించిన మవోయిస్టు ప్రభావిత రాష్ట్రాల సీఎంల సమావేశానికి హాజరయ్యారు. కాగా.. ఈ మీటింగ్ అనంతరం అమిత్ షాతో ప్రత్యేకంగా సమావేశమైన రేవంత్ రెడ్డి.. తెలంగాణకు మరింత మంది ఐపీఎస్‌లను కేటాయించాల్సిందిగా స్పెషల్ రిక్వెస్ట్ చేశారు. అయితే.. కేంద్రం తీసుకున్న ఈ నిర్ణయం.. రేవంత్ రెడ్డి చేసిన రిక్వెస్ట్ ఫలితమే అంటూ కాంగ్రెస్ శ్రేణులు చెప్తున్నాయి.

అంతేకాకుండా.. స్మితా సబర్వాల్ భర్త అకున్ సబర్వాల్‌ని తెలంగాకు తిరిగి తీసుకురావటం కూడా రేవంత్ రెడ్డి.. వ్యూహంలో భాగమేనన్న అభిప్రాయాలు వ్యక్తమవుతున్నాయి. అకున్ సబర్వాల్‌ను తెలంగాణకు పంపించాలని రేవంత్ రెడ్డి ప్రత్యేకంగా రిక్వెస్ట్ చేసినట్టు సమాచారం. తెలంగాణను డ్రగ్స్ ఫ్రీ స్టేట్‌గా మార్చాలని నిర్ణయించుకున్న రేవంత్ రెడ్డి.. ఇప్పటికే కఠినమైన ఆదేశాలు జారీ చేయగా.. గతంలో టాలీవుడ్ డ్రగ్స్ కేసులో కీలకంగా వ్యవహరించిన అకున్ సబర్వాల్.. ఇప్పుడు తెలంగాణకు వస్తే తన అనుభవాన్ని ఉపయోగించి.. ఆ కేసును పూర్తిగా క్లోజ్ చేయటమే కాకండా.. రాష్ట్రంలో డ్రగ్స్‌ రక్కసిని పూర్తిగా రూపుమాపొచ్చని రేవంత్ రెడ్డి యోచిస్తున్నట్టు తెలుస్తోంది. మరి.. ఈ ప్రచారంలో నిజమెంతుందో తెలియదు కానీ.. నిజంగానే అకున్ సబర్వాల్‌ను డ్రగ్స్ నివారణ కోసం తెలంగాణకు తీసుకొస్తే మాత్రం రేవంత్ రెడ్డి స్ట్రాటజీని చాలా మంది మెచ్చుకునే అవకాశం లేకపోలేదు.