మొన్నటిదాక సీఎం అవుతానని.. ఇప్పుడు మరో బాంబు పేల్చిన జగ్గారెడ్డి

ఎప్పుడూ ఏవో ఇంట్రెస్టింగ్ కామెంట్స్ చేస్తూ.. వార్తల్లో నిలిచే కాంగ్రెస్ సీనియర్ నేత, టీపీసీసీ వర్కింగ్ ప్రెసిడెంట్ జగ్గారెడ్డి.. మరో బాంబు పేల్చాడు. తాను ఎప్పటికైనా ముఖ్యమంత్రిని అవుతానంటూ నిన్నమొన్నటివరకు సంచలన వ్యాఖ్యలు చేసిన జగ్గారెడ్డి.. తాజాగా, వచ్చే ఎన్నికల్లో తాను పోటీ చేయట్లేదని పరోక్షంగా చెప్పేశారు. శనివారం (అక్టోబర్ 12న) రోజు సంగారెడ్డిలో నిర్వహించిన దసరా వేడుకల్లో పాల్గొన్న జగ్గారెడ్డి.. ఈ వ్యాఖ్యలు చేశారు. వచ్చే ఎన్నికల్లో తన భార్య నిర్మల గానీ.. చేర్యాల ఆంజనేయులు గానీ ఎమ్మెల్యేగా పోటీ చేస్తారంటూ ప్రకటించారు. ఎన్నికలకు మరో నాలుగేళ్లు సమయం ఉన్నప్పటికీ.. ఇప్పుడే ఈ విషయాన్ని ప్రకటిస్తున్నట్టు చెప్పారు. సీఎం రేవంత్ రెడ్డితో పాటు టీపీసీసీ చీఫ్ మహేష్ కుమార్ గౌ‌డ్‌తో కూడా మాట్లాడానని చెప్పుకొచ్చారు. మరోవైపు.. కిషన్ అనే వ్యక్తికి ఎమ్మెల్సీ ఇప్పించేదుకు అధిష్ఠానంతో మాట్లాడతానని చెప్పుకొచ్చారు.

మరోవైపు.. ఓటమి అనేక పాఠాలు నేర్పిస్తుందన్నారు జగ్గారెడ్డి. తాను ఓడిపోయినా.. తన భార్యకు కార్పొరేషన్ పదవి వచ్చిందని గుర్తు చేశారు. సీఎం రేవంత్ రెడ్డి పిలిచి.. తన భార్య నిర్మలకు పదవిచ్చారన్నారు. ఏ పండుగ వచ్చినా ముందుండి సంగారెడ్డిలో కార్యక్రమాలు చేపిస్తానని చెప్పుకొచ్చారు. జగ్గారెడ్డి ఎప్పుడు బలహీనుడు కాదని.. జగ్గారెడ్డి ఓ ఫైటర్ అని పేర్కొన్నారు.

1995లోనే తాను పోలీసులతో గొడవపెట్టుకున్నానని జగ్గారెడ్డి తెలిపారు. అప్పుడు జరిగిన మున్సిపల్ ఎన్నికల్లో అప్పటి ఎస్పీ కృష్ణంరాజు.. తన మనుషులను కొట్టారని తెలిసి.. ఆయన కారును ఢీ కొట్టానని, ఆ తర్వాత పోలింగ్ బూత్‌లలో రిగ్గింగ్ కూడా చేశానంటూ అప్పటి విషయాలు పంచుకున్నారు. 3 వేల మందితో పోలీస్ స్టేషన్ ముట్టడించినట్టు తెలిపారు. అయితే.. ఎంత తోపులం అయినా సరే ఓ రోజు కాటికి వెళ్లక తప్పదంటూ హితవు తెలిపారు. ప్రాణికి చావుంది కానీ పైసాకు చావు లేదని తత్వం బోధించారు జగ్గారెడ్డి.

అయితే.. మొన్నటివరకు ఎప్పటికైనా తెలంగాణకు ముఖ్యమంత్రిని అవుతానంటూ పదే పదే వ్యాఖ్యానించిన జగ్గారెడ్డి.. ఇప్పుడు అసలుకే ఎసరు పెట్టి.. అసలు పోటీనే చేయననటం ఇప్పుడు సర్వత్రా ఆసక్తికరంగా మారింది. మరి జగ్గారెడ్డి వ్యాఖ్యల వెనుక ఎలాంటి వ్యూహం ఉందనేది ఆయనకే తెలుసు అంటున్నారు శ్రేణులు.