ఆంక్షలు ఉల్లంఘన.. 21 మంది పోలీసులపై కేసులు

నిబంధనల ఉల్లంఘనకు పాల్పడిన 21 మంది పోలీసులపై హైదరాబాద్ పోలీసులు కేసులు నమోదు చేశారు. నగరంలోని ధర్నాచౌక్‌లో అనుమతి లేకుండా ఆందోళన నిర్వహించారన్న కారణంతో 21 మంది తెలంగాణ స్పెషల్ పోలీస్‌ (TGSP) కానిస్టేబుళ్లకు పోలీసు శాఖ షోకాజ్‌ నోటీసులు జారీ చేసింది. గతకొద్ది రోజులుగా TGSP బెటాలియన్‌కు చెందిన కానిస్టేబుళ్లు ఆందోళనలు నిర్వహిస్తున్నారు. ఒకే రాష్ట్రం- ఒకే పోలీసింగ్ నినాదంతో కానిస్టేబుళ్లు, వారి కుటుంబ సభ్యులు ఆందోళనలు చేస్తున్నారు. హైదరాబాద్ నగరంలోనూ గతకొన్ని రోజులుగా కానిస్టేబుళ్లు ఆందోళనలు చేస్తున్నారు.

దీంతో శాంతి భద్రతల పరిరక్షణలో భాగంగా నగరంలో హైదరాబాద్ సీపీ సీవీ ఆనంద్ ఆంక్షలు విధించారు. ర్యాలీలు, ధర్నాలు, ఆందోళనలను నిషేధిస్తూ ఉత్తర్వులు జారీ చేశారు. నిబంధనలు పాటించకపోతే కఠిన చర్యలు తీసుకుంటామని హెచ్చరించారు. ఈ నేపథ్యంలో నిబంధనలు ఉల్లంఘించి ప్రత్యేక కానిస్టేబుళ్లు ఆందోళన చేపట్టడంతో 21 మందిని అరెస్ట్ చేశారు. అనంతరం పోలీసులపై వివిధ కేసుల కింద రెండు కేసులు నమోదు చేసినట్లు పోలీస్ శాఖ వెల్లడించింది. దోమలగూడ పోలీస్‌ స్టేషన్‌లో BNS యాక్ట్ ప్రకారం సెక్షన్లు 223, 126(2) తదితర చట్టాల కింద కేసులు బుక్ చేసినట్లు చెప్పారు.

పది మంది పోలీసులు సస్పెండ్..

ఇక పోలీస్ శాఖపై తిరుగుబాటు చేసిన పది మంది టీజీఎస్పీ పోలీసులపై వేటు వేసింది. వారిని డిస్మిస్‌ చేస్తూ ఆదివారం (అక్టోబర్ 27) రాత్రి పోలీస్ శాఖ ఉత్తర్వులు జారీ చేసింది. పోలీసు డిపార్ట్‌మెంట్‌లో పని చేస్తూ. క్రమశిక్షణ ఉల్లంఘించి ఆందోళన నిర్వహించేందుకు కారణమైన పోలీసులపై ప్రభుత్వం కఠిన చర్యలు తీసుకుంది. ఆర్టికల్‌ 311(2)B ప్రకారం పది మంది పోలీసులను శాశ్వతంగా విధుల నుంచి తొలగించినట్లు తెలిపింది.

ఇందులో ఓ ఎస్సై స్థాయి అధికారితో పాటుగా కానిస్టేబుళ్లు ఉన్నారు. డిస్మిస్‌ అయిన 17వ బెటాలియన్‌కు చెందిన ఏఆర్‌ ఎస్సై టి.సాయిరామ్‌, కానిస్టేబుళ్లు బి.అశోక్, ఆర్‌.శ్రీనివాస్ ఎస్‌.కరుణాకర్‌రెడ్డి కె.లక్ష్మీనారాయణ, టి.వంశీ, అన్నెపర్తి 12వ బెటాలియన్‌కు చెందిన హెడ్‌కానిస్టేబుల్‌ ఎస్‌.కె.షఫీ, వి.రామకృష్ణ, ఇబ్రహీంపట్నం 3వ బెటాలియన్‌కు చెందిన కానిస్టేబుల్‌ జి.రవికుమార్, కొత్తగూడెం 6వ బెటాలియన్‌కు చెందిన కె.భూషణ్‌రావు ఉన్నారు.