ఎమ్మెల్సీ ఎన్నికలకు ఓటు నమోదు చేసుకున్నారా..? రేపే లాస్ట్ డేట్

తెలంగాణలో త్వరలో జరగనున్న పట్టభద్రులు, ఉపాధ్యాయ ఎమ్మెల్సీ ఎన్నికలకు ఓటర్ల నమోదు ప్రక్రియ కొనసాగుతుంది. కాగా.. ఈ ఓటరు నమోదు ప్రక్రియకు రేపటి (నవంబర్ 06) తో గడువు ముగియనుంది. ఉమ్మడి ఆదిలాబాద్, నిజామాబాద్, కరీంనగర్, మెదక్ పట్టభద్రుల నియోజకవర్గంతో పాటు.. వరంగల్, ఖమ్మం, నల్గొండ ఉపాధ్యాయ నియోజకవర్గం.. ఆదిలాబాద్, కరీంనగర్, నిజామాబాద్, మెదక్ ఉపాధ్యాయ నియోజకవర్గాలకు ఓటరు నమోదు ప్రక్రియ కొనసాగుతున్న విషయం తెలిసిందే.

గతంలో ఓటు ఉన్న వారు కూడా ఈసారి నిర్వహించనున్న ఎమ్మెల్సీ ఎన్నికల్లో ఓటు వేయాలంటే మళ్లీ కొత్తగా నమోదు చేసుకోవాల్సిందేనని ఎన్నికల సంఘం స్పష్టం చేసింది. ఓటర్ల ముసాయిదా జాబితాను నవబంర్ 23న ప్రచురించనున్నట్లు ఈసీ తెలిపింది. దీనిపై డిసెంబరు 9వ తేదీ వరకు అభ్యంతరాలను స్వీకరించనున్నారు. అభ్యంతరాలను పరిశీలించిన తర్వాత డిసెంబరు 30న తుది జాబితాను ఈసీ విడుదల చేయనుంది.

అయితే.. ఓటరు నమోదు ప్రక్రియకు గడువు తేదీ(నవంబరు 6న) సమీపిస్తున్నా పట్టభద్రులు, ఉపాధ్యాయులు మాత్రం ఓటు హక్కు కోసం దరఖాస్తు చేయడంలో వెనకబడిపోతున్నట్టు అధికారులు చెప్తున్నారు. ఈ క్రమంలోనే.. రేపటితో గడువు ముగుస్తుండటంతో.. పట్టభద్రులతో పాటు ఉపాధ్యాయులు తమ ఓటును నమోదు చేసుకోవాలని అధికారులు సూచిస్తున్నారు.

ఎలా నమోదు చేసుకోవాలంటే..

ఎమ్మెల్సీ ఎన్నికల్లో ఓటు హక్కు వినియోగించుకోవడానికి పట్టభద్రులు, ఉపాధ్యాయులు ముందుగా ఓటరుగా నమోదు చేసుకోవాలి. గతంలో జరిగిన ఎన్నికల సమయంలో నమోదు చేసుకున్న వారు కూడా ఈసారి మళ్లీ దరఖాస్తు చేసుకోవాలని అధికారులు స్పష్టం చేశారు. ఉమ్మడి జిల్లా్ల్లోని అన్ని తహసీల్దార్, ఆర్డీవో కార్యాలయాల్లో ఓటరు నమోదు కేంద్రాలు ఏర్పాటు చేశారు. అన్ని కేంద్రాల్లో దరఖాస్తులు అందుబాటులో ఉంచారు. దరఖాస్తుల ప్రక్రియ పర్యవేక్షించడానికి ఓ అధికారిని కూడా నియమించారు.

ఆన్‌లైన్‌లోనూ అందుబాటులో..

ఆన్‌లైన్‌లోనూ దరఖాస్తు చేసుకోవడానికి ఎన్నికల సంఘం అవకాశం కల్పించింది. www.ceotelangana.nic.in అనే వెబ్‌సైట్‌లో గ్రాడ్యువేట్, ఉపాధ్యాయ ఎమ్మెల్సీ ఐచ్ఛికాల్లో ఒకటి సెలెక్ట్ చేసుకుంటే.. దరఖాస్తు ఫాం కనిపిస్తుంది. ఆ మొత్తం ధరఖాస్తును నింపి.. డిగ్రీ సర్టిఫికేట్ (మార్క్ షీట్/ ప్రొవిజనల్).. ఆధార్, ఓటరు ఐడీ పత్రాలతో పాటు ఫొటోను కూడా జత చేసి ద్వారా దరఖాస్తు చేసుకోవాల్సి ఉంటుంది.

అర్హత వివరాలు

2021 అక్టోబరు 31వ తేదీ నాటికి డిగ్రీ పూర్తి చేసినవారు పట్టభద్రుల నియోజకవర్గ ఓటర్లుగా నమోదు దరఖాస్తు చేసుకునే అవకాశం ఉంటుంది. ఎన్నికల కమిషన్ రూపొందించిన ఫామ్-18 పూరించి నేరుగా తహసీల్దార్‌ కార్యాలయంలో అందజేస్తే చాలు మీరు ఓటరుగా నమోదు అయినట్టే.

ఇక ఉపాధ్యాయుల్లో.. 2018 నవంబరు 1వ తేదీ నుంచి 2024 అక్టోబరు 31వ తేదీ వరకు మూడేళ్ల సర్వీస్‌ పూర్తి చేసుకున్న ఉపాధ్యాయులు ఫామ్-19 దరఖాస్తు నింపి ఉపాధ్యాయ ఎమ్మెల్సీ ఓటరుగా నమోదు చేసుకోవచ్చు. ప్రభుత్వ ఉన్నత పాఠశాలల్లో పనిచేసే స్కూల్‌ అసిస్టెంట్లు, ఎస్జీటీ ఉపాధ్యాయులు మూడేళ్ల సర్వీసు పూర్తయితే ఓటర్లుగా నమోదు చేసుకునే అర్హత ఉంటుంది.