ఇద్దరు అబ్బాయిలు, ఓ అమ్మాయి కలిసి.. పట్టపగలే

రాను రాను మనుషులు చాలా దారుణంగా తయారవుతున్నారు. రోడ్లపై కనిపించినా చిన్నపిల్లలను.. ఆస్పత్రిలో పసిబిడ్డలను.. అమ్మాయిలను, మహిళలను ఎత్తుకెళ్లిన వార్తలు ఇప్పటివరకు చూశాం.. కానీ ఇంటి గేటు ముందు కనిపించిన కుక్కపిల్లను కూడా వదలకుండా ఎత్తుకెళ్తుండటం ఇప్పుడు సర్వత్రా విస్మయానికి గురి చేస్తోంది. పెద్దపల్లి జిల్లా మంథనిలో ఈ ఘటన జరిగింది. పట్టణంలోని శ్రీరాంనగర్‌లో నారాయణ కుటుంబం కుక్కపిల్లను పెంచుకుంటోంది. కాగా.. నిత్యం గేటులోపలే ఉంటూ ఆడుకునే ఆ కుక్క.. శనివారం (నవంబర్ 02) రోజున గేటు కొంచెం తెరిచి ఉండటంతో.. ఎవరూ తోడు లేకుండానే బయటకు వచ్చింది.

బయటకు వచ్చి ఇంటి ముందు తచ్చాడుతున్న కుక్కపిల్లను గమనించిన గుర్తు తెలియని ముగ్గురు వ్యక్తులు.. పల్సర్ బైక్ మీద వచ్చారు. ఆ ముగ్గురిలో ఇద్దరు అబ్బాయిలు కాగా.. ఓ అమ్మాయి కూడా ఉంది. ఆ మహిళ కుక్కపిల్లను ముద్దాడుతున్నట్టు నటించి.. చుట్టూ ఎవరూ లేరని గమనించి.. వెంటనే తన చున్నీతో కప్పేసి.. బండి ఎక్కి అక్కడి నుంచి ఎస్కేప్ అయ్యింది. ఇంట్లో నుంచి ఈ సన్నివేశాన్ని గమనించిన యజమాని నారాయణ.. తన స్కూటీపై ఆ దుండగులను వెంబడించాడు. అయితే.. పల్సర్ బైక్‌ను స్పీడుగా పోనివ్వటంతో.. వారి వేగాన్ని స్కూటీ అందుకోలేకపోవటంతో.. వాళ్లు తప్పించుకున్నారు.

దీంతో.. తాను ఎంతో అల్లారు ముద్దుగా పెంచుకుంటున్న కుక్కపిల్లని గుర్తు తెలియని వ్యక్తులు ఎత్తుకెళ్లినట్టు దాని యజమాని నారాయణ పోలీసులను ఆశ్రయించాడు. మంథని పోలీస్ స్టేషన్లో ఫిర్యాదు చేశాడు. దీంతో పోలీసులు కేసు నమోదు చేసి దర్యాప్తు చేస్తున్నారు. అయితే.. కుక్కపిల్లను ఎత్తుకెళ్లిన దృశ్యాలు లద్మాపూర్ వద్ద ఉన్న ఓ సీసీ కెమెరాలో రికార్డు అయ్యాయి. సీసీ కెమెరా దృశ్యాలను ఆధారంగా చేసుకుని పోలీసులు దుండగులను పట్టుకునే ప్రయత్నం చేస్తున్నారు.

 తన కూతురు ఐదేళ్ల క్రితం.. రెండు నెలల వయసున్న హచ్ కుక్కపిల్లను హైదరాబాద్ నుంచి తీసుకొచ్చుకుందని బాధితుడు తెలిపారు. తాము ఆ కుక్కను ఇంటిలో కుటుంబ సభ్యుల మాదిరిగా ప్రేమగా పెంచుకున్నామని బాధితుడు తెలిపాడు. ప్రతిరోజు గుడ్డు, చికెన్‌తో భోజనం పెట్టేవాళ్లమని వివరించాడు. కుక్క చోరీకి గురైందనే బాధతో రెండ్రోజులుగా తమ కుటుంబం తీవ్ర మనస్తాపానికి లోనైనట్టు వివరించారు. తనకు ఇద్దరు కూతుర్లు ఉండగా.. పెంపుడు కుక్కను మూడో కూతురిలా చూసుకుంటున్నామని చెప్పుకొచ్చారు. తమ కుక్కపిల్లను ఎవరు ఎత్తుకుపోయినా.. దయచేసి తమ కుక్కను తిరిగి ఇవ్వాలని నారాయణ విజ్ఞప్తి చేశారు.