అరుణాచలేశ్వరుడి భక్తులకు.. గిరిప్రదక్షిణకు ఈ జిల్లాల నుంచి తెలంగాణ ఆర్టీసీ స్పెషల్ బస్సులు

కార్తీక పౌర్ణమి సంద‌ర్భంగా చాలా మంది భక్తులు తమిళనాడులోని అరుణాచ‌లేశ్వరుని గిరి ప్రదక్షిణకు వెళ్తుంటారు. అలా వెళ్లే భక్తులకు తెలంగాణ ఆర్టీసీ గుడ్‌న్యూస్ చెప్పింది. ప‌ర‌మ‌శివుణి దర్శనం కోసం అరుణాచ‌లం గిరి ప్రదక్షిణ టూర్ ప్యాకేజీని ఆర్టీసీ యాజ‌మాన్యం ప్రకటించింది. ఈ ప్యాకేజీలో కాణిపాకం వ‌ర‌సిద్ధి వినాయ‌క‌స్వామితో పాటు వెల్లూరులోని గోల్డెన్ టెంపుల్‌ను సంద‌ర్శించే సౌక‌ర్యాన్ని సంస్థ క‌ల్పిస్తోంది.

తెలంగాణ‌లోని హైద‌రాబాద్, ఆదిలాబాద్, నిజామాబాద్, మెద‌క్, నల్గొండ, వరంగ‌ల్, క‌రీంన‌గ‌ర్, మ‌హ‌బూబ్‌న‌గ‌ర్ నుంచి అరుణాచ‌లానికి ప్రత్యేక బ‌స్సుల‌ను సంస్థ న‌డుపుతోంది. ఈ నెల 15న కార్తీక పౌర్ణమి కాగా.. 13 నుంచి ఆయా ప్రాంతాల నుంచి ప్రత్యేక బ‌స్సులు బ‌య‌లుదేరుతాయి. కాణిపాకం, గొల్డెన్ టెంపుల్ ద‌ర్శనం త‌ర్వాత కార్తీక పౌర్ణమి పర్వదినం రోజు అరుణాచ‌లానికి చేరుకుంటాయి. అరుణాచ‌ల గిరి ప్రదక్షిణ టూర్ ప్యాకేజీని http://tgsrtcbus.in వెబ్‌సైట్‌లో బుక్ చేసుకోవ‌చ్చు. పూర్తి వివ‌రాల‌కు టీజీఎస్ఆర్టీసీ కాల్ సెంట‌ర్ నంబ‌ర్లు 040-23450033, 040-69440000 సంప్రదించొచ్చు. ఈ మేరకు సంస్థ ఎండీ సజ్జనార్ ట్వీట్ చేశారు.

ఇక ప‌విత్ర కార్తీక మాసంలో తెలంగాణలోని శైవ క్షేత్రాల‌కు భ‌క్తుల సౌక‌ర్యార్థం ప్రత్యేక బ‌స్సుల‌ను ఏర్పాటు చేస్తున్నట్లు టీజీఎస్ఆర్టీసీ ఎండీ వీసీ సజ్జనార్ వెల్లడించారు. శ్రీశైలం, వేముల‌వాడ, ధర్మపురి, కీస‌ర‌గుట్ట, త‌దిత‌ర దేవాల‌యాల‌కు హైద‌రాబాద్ నుంచి స్పెష‌ల్ బ‌స్సుల‌ను న‌డుపుతున్నామ‌ని ఆయ‌న పేర్కొన్నారు. ఆర్టీసీకి కార్తీక మాసం, శ‌బ‌రిమ‌ల ఆప‌రేష‌న్స్ ఎంతో కీల‌క‌మ‌ని, భ‌క్తుల‌కు అసౌక‌ర్యం క‌ల‌గ‌కుండా త‌గు చర్యలు తీసుకుంటున్నట్లు చెప్పారు. ఆది, సోమ‌వారాలు శైవ‌క్షేత్రాల‌కు భ‌క్తుల ర‌ద్దీ ఎక్కువ‌గా ఉంటుంద‌ని, అందుకు అనుగుణంగా ప్రత్యేక బ‌స్సుల‌ను అందుబాటులో ఉంచుతున్నట్లు వెల్లడించారు. ఈ ప్రత్యేక బ‌స్సుల్లోనూ ముంద‌స్తు రిజ‌ర్వేష‌న్‌ను అందుబాటులో ఉంటుందని చెప్పారు. మ‌రిన్ని వివ‌రాల‌కు ఆర్టీసీ కాల్ సెంట‌ర్ నంబ‌ర్లకు కాల్ చేయాలని సూచించారు.

ఇక ఇటీవల ఆర్టీసీ బ‌స్సు టికెట్ ధ‌ర‌లను పెంచింద‌ని ప్ర‌చారం జరుగుతుండగా.. అందులో వాస్త‌వం లేదని సజ్జనార్ వెల్లడించారు. రెగ్యుల‌ర్ స‌ర్వీస్‌లకు సాధార‌ణ చార్జీలే అమ‌ల్లో ఉన్నాయని చెప్పారు. దీపావ‌ళి తిరుగు ప్ర‌యాణ ర‌ద్దీ నేప‌థ్యంలో ఏర్పాటు చేసిన స్పెష‌ల్ బ‌స్సుల్లో మాత్రమే రాష్ట్ర ప్ర‌భుత్వ జీవో ప్ర‌కారం చార్జీల‌ను సంస్థ స‌వ‌రించిందన్నారు.