భూ నిర్వాసితులకు ఇందిరమ్మ ఇండ్లు.. రేవంత్ సర్కార్ కీలక నిర్ణయం

వరంగల్‌లో కాకతీయ మెగా టెక్స్‌టైల్‌ పార్కు ఏర్పాటు చేయనున్న సంగతి తెలిసిందే. గత బీఆర్ఎస్ ప్రభుత్వం జిల్లాలో గీసుకొండ, సంగెం మండలాల పరిధిలోని మెగా టెక్స్‌టైల్‌ పార్కు ఏర్పాటుకు నిర్ణయం తీసుకుంది. ఇందు కోసం 1,219 ఎకరాల భూమిని సైతం సేకరించింది. ఈ భూమిలో ఇప్పటికే ఓ టెక్స్‌టైల్‌ పరిశ్రమ తమ ఉత్పత్తులను ప్రారంభించింది. మరో పరిశ్రమ కూడా త్వరలో తమ సంస్థను ప్రారంభించడానికి రెడీ అవుతోంది. కాగా, ఈ పార్క్ నిర్మాణంలో చాలా మంది స్థానికులు తమ భూములు కోల్పోతున్నారు. ఇండ్లు, వ్యవసాయ భూములు కోల్పోతున్నారు.

ఈ నేపథ్యంలో వారిని ఆదుకునేందుకు రేవంత్ సర్కార్ కీలక నిర్ణయం తీసుకుంది. భూ నిర్వాసితులకు ఇందిరమ్మ ఇండ్లు ఇవ్వాలని ప్రభుత్వం డిసైడ్ అయింది. ఈ నెల 19న ఉమ్మడి వరంగల్‌ జిల్లాలో పర్యటించనున్న సీఎం రేవంత్.. కాకతీయ మెగా టెక్స్‌టైల్‌ పార్కు భూనిర్వాసితులకు ఇందిరమ్మ ఇళ్ల మంజూరు పత్రాలు అందించనున్నారు. నిర్వాసితుల్లో మొత్తం 863 మందికి ఇందిరమ్మ ఇళ్లను మంజూరు చేస్తూ శనివారం (నవంబర్ 16) ప్రభుత్వం ఉత్తర్వులు జారీ చేసింది.

ఇందుకు సంబంధించిన ప్రక్రియను ముందుకు తీసుకెళ్లాలని తెలంగాణ గృహ నిర్మాణ సంస్థ, వరంగల్‌ జిల్లా కలెక్టర్‌కు రాష్ట్ర ప్రభుత్వ కార్యదర్శి జ్యోతి బుద్ధ ప్రకాశ్‌ ఆదేశాలిచ్చారు. ఈ మేరకు జీవో నంబరు 40 ద్వారా ఉత్తర్వులు జారీ చేశారు. ఇందిరమ్మ ఇంటి నిర్మాణంలో భాగంగా ఒక్కొక్క భూ నిర్వాసితులకు ప్రభుత్వం రూ.5 లక్షలు మంజూరు చేయనుంది. భూనిర్వాసితులకు ఇందిరమ్మ ఇండ్లు మంజూరు చేయాలని రాష్ట్ర గృహ నిర్మాణ సంస్థకు వరంగల్‌ కలెక్టర్‌ ఇటీవల ప్రతిపాదనలు పంపారు.

ఇక పేదలు ఎప్పుడెప్పుడా అని ఎదురు చూస్తున్న ఇందిరమ్మ ఇండ్ల పథకంపై మంత్రి పొంగులేటి శ్రీనివాస్ రెడ్డి ఇటీవల కీలక అప్డేట్ ఇచ్చారు. త్వరలోనే లబ్ధిదారుల ఎంపిక ప్రక్రియ మెుదలవుతుందని అన్నారు. తొలి విడతలో ఖాళీ స్థలం ఉన్నవారికి ఇండ్లు మంజూరు చేస్తామన్నారు. 400 చదరపు అడుగుల్లో ఇల్లు నిర్మించుకోవాల్సి ఉంటుందని అన్నారు. అందులో తప్పనిసరిగా స్నానాల గది, వంట గది ఉండాలనే నిబంధన పెట్టినట్లు వెల్లడించారు. ప్రభుత్వం అందించే రూ. 5 లక్షలు ఆర్థిక సాయం నాలుగు విడతల్లో అందించనున్నట్లు చెప్పారు. పునాది నిర్మాణానికి రూ. లక్ష, లెంటల్‌ లెవల్‌కు చేరగానే రూ.1.25 లక్షలు, స్లాబు వేశాక రూ. 1.75 లక్షలు, గృహప్రవేశం సమయంలో మిగిలిన లక్ష అందించనున్నారు.