మారనున్న వరంగల్ రూపురేఖలు.. కొత్తగా రీజనల్, ఔటరు, ఇన్నర్ రోడ్లు.. ఆ మండలాలకు మహర్దశ

తెలంగాణ రాజధాని హైదరాబాద్‌లో ఇప్పటికే కోటి జనాభా దాటింది. నగరం వేగంగా విస్తరిస్తుండటంతో పాటుగా జనాభా పెరుగుదలో గణనీయమైన వృద్ధిని సాధించింది. ఇక రాష్ట్రానికి రెండో రాజధాని ఏర్పాటు చేయాలనే ప్రతిపాదన ఎప్పట్నుంచో నానుతోంది. రెండో రాజధాని ప్రస్తావన వచ్చినప్పుడల్లా వరంగల్ నగరం తెరపైకి వస్తుంది. ప్రస్తుతం తెలంగాణలో హైదరాబాద్ తర్వాత పెద్ద నగరంగా వరగంల్ ఉంది. ఈ నేపథ్యంలో రాష్ట్రానికి రెండో రాజధానిగా వరంగల్ నగరాన్ని ఏర్పాటు చేసేందుకు వేగంగా అడుగులు పడుతున్నాయి.

గత ఐదేళ్లుగా నానుతున్న విజన్‌-2041 వరంగల్‌ నూతన బృహత్‌ ప్రణాళిక (మాస్టర్‌ ప్లాన్‌)కు ఎట్టకేలకు రేవంత్ సర్కార్‌లో మోక్షం లభించింది. ఈనెల 19న సీఎం రేవంత్‌రెడ్డి మాస్టర్ ప్లాన్‌పై అధికారిక ప్రకటన చేస్తారని ప్రభుత్వ వర్గాలు వెల్లడిస్తున్నాయి. అదే రోజు రాష్ట్ర ప్రభుత్వం గెజిటు విడుదల చేస్తుందని అంటున్నారు. ఇప్పటి వరకు వరంగల్‌ మహానగరానికి మాస్టర్‌ ప్లాన్‌ లేదు. గత రెండు, మూడేళ్లుగా కేవలం మెమో ఆధారంగా లేఅవుట్లు, భవన నిర్మాణ అనుమతులను గ్రేటర్‌ వరంగల్, కాకతీయ పట్టణాభివృద్ధి సంస్థ జారీ చేస్తోంది.

వరంగల్ నగరంలో పెద్ద ప్రాజెక్టులకు అనుమతులు ఇచ్చేందుకు అధికాలు ఇబ్బందులు ఎదుర్కొంటున్నారు. ఈ నేపథ్యంలో కాంగ్రెస్ ప్రభుత్వం కొత్త మాస్టర్‌ప్లాన్‌ ఆమోదానికి రంగం సిద్ధం చేసింది. 2041 వరంగల్‌ మాస్టర్‌ ప్లాన్‌ రూపొందించనున్నారు. త్రినగరాలగు పేరుతున్న కాజీపేట, హనుమకొండ, వరంగల్‌తో పాటుగా చుట్టూ ఉన్న 19 మండలాలు, 181 గ్రామాలు మాస్టర్ ప్లాన్ పరిదిలోకి వస్తాయి. మెుత్తం 1805 చదరపు కిలో మీటర్ల మేర పరిధిని విస్తరించారు. జనగామ జిల్లాలోని కొన్ని మండలాలు ఈ వరంగల్ మాస్టర్ ప్లాన్‌లో కలుస్తాయి.

ఇందులోనూ 13 భూ వినియోగ జోన్లు ఉండనున్నాయి. ఈ మాస్టర్ ప్లాన్ ఆమోదం పొందితే.. మూడు నగరాల్లో భవన నిర్మాణాలకు అడ్డంకులు తప్పనున్నాయి. దాంతో పాటుగా నగరం చుట్టూ రీజనల్, ఔటరు, ఇన్నర్, కనెక్టెడ్ రోడ్ల నిర్మాణం జరుగుతుంది. చెరువులు, నాలాల పునరుద్ధరణ వేగవంతం చేస్తారు. అండర్ గ్రౌండ్ డ్రైనేజీ వ్యవస్థ ఏర్పాడుతుంది. దీంతో వరంగల్ నగరంతో పాటుగా.. చుట్టూ ఉన్న 19 మండలాలు, 181 గ్రామాలకు మహర్దశ పట్టనుంది. గణనీయమైన అభివృద్ధి చోటు చేసుకుంటుంది. భూముల ధరలకు రెక్కలు రానున్నాయి.