ఏడేళ్ల క్రితం చనిపోయిన వ్యక్తిపై ఎఫ్ఐఆర్.. అది కూడా ఆ కేసులో

ఎన్నిసార్లు ఫిర్యాదులు చేసినా పోలీసులు ఎఫ్‌ఐఆర్ నమోదు చేయకుండా పోలీస్ స్టేషన్ చుట్టూ తిప్పించుకుంటున్నారంటూ జనాలు ఆగ్రహం వ్యక్తం చేసే ఘటనలు చూసుంటాం. కానీ.. ఇక్కడ పోలీసులు మాత్రం కొంత అత్యుత్సాహమే చూపించినట్టు కనిపిస్తోంది. ఏకంగా ఏడేళ్ల క్రితం చనిపోయిన వ్యక్తిపైన ఎఫ్ఐఆర్ నమోదు చేసి.. అందరినీ ఆశ్చర్యానికి గురి చేశారు. ఈ ఘటన.. మెదక్ జిల్లా నర్సాపూర్‌లో జరిగింది. ఓ భూమి వివాదంలో కేసు నమోదు చేసిన నర్సాపూర్ పోలీసులు.. మరణించిన వ్యక్తి పేరును ఎఫ్ఐఆర్‌లో చేర్చారు. ఈ విషయం తెలుసుకుని కుటుంబసభ్యులతో పాటు గ్రామస్తులు ఆశ్చర్యానికి గురయ్యారు. ఇదే ఇప్పుడు స్థానికంగా చర్చనీయాంశంగా మారింది. బతికున్న వారిపై కాకుండా చనిపోయినవారిపై ఎఫ్ఐఆర్ నమోదు చేయడం ఏంటని జనాలు చర్చించుకుంటున్నారు.

అసలు విషయం ఏంటంటే.. నర్సాపూర్ మండలం నారాయణపూర్ శివారులోని లచ్చిరాం తండాలోని 200 సర్వే నంబర్‌లో కొన్నేళ్లుగా భూమి విషయంలో వివాదం కొనసాగుతుంది. ఈ క్రమంలో తాజాగా మరోసారి ఇరువర్గాల మధ్య ఘర్షణ తలెత్తగా.. భూ వివాదంలో నర్సాపూర్‌ పోలీసులు ఐదుగురిపై ఎఫ్ఐఆర్ నమోదు చేశారు. ఎఫ్ఐఆర్‌లో పాతులోత్ విఠల్ అనే పేరును ఏ4గా చేర్చారు. విఠల్ పేరు ఎఫ్ఐఆర్‌లో ఉండటం చూసి ఆయన కుటుంబీకులు ఒక్కసారిగా ఆశ్చర్య పోయారు. విఠల్ అనే వ్యక్తి.. ఏడేళ్ల క్రితమే చనిపోవటమే అందుకు కారణం.

పోలీసులు ముందూ వెనక ఎలాంటి విచారణ చేయకుండానే.. ఏడేళ్ల క్రితం చనిపోయిన వ్యక్తి పేరును ఎఫ్‌ఐఆర్‌లో చేర్చి.. చర్చనీయాంశంగా మారింది. చనిపోయిన విఠల్ పేరును ఎఫ్‌ఐఆర్‌లో చేర్చటంపై ఆయన కుటుంబీకులు మండిపడుతున్నారు.

భూవివాదంలో తమ ప్రత్యర్థికి పోలీసులు అనుకూలంగా వ్యవహరిస్తున్నారన్న విషయం ఈ సంఘటనతో బయటపడిందని విఠల్ కుటుంబ సభ్యులు ఆరోపిస్తున్నారు. మృతుడి ఫోటో, మరణ ధ్రువీకరణ పత్రాన్ని చూపించి మరీ.. పోలీసులు అత్యుత్సాహాన్ని నిలదీస్తున్నారు. భూవివాదంలో పోలీసులు తమను భయాందోళనకు గురి చేస్తున్నారని వాపోయారు. కేసు పూర్తి దర్యాప్తు చేపట్టకుండానే.. ప్రత్యర్థులకు అనుకూలంగా వ్యవహరిస్తున్నారంటూ ఆరోపిస్తున్నారు. ఇప్పుడు ఇదే విషయం సర్వత్రా చర్చనీయాంశంగా మారింది.