తెలంగాణలో కనిష్ఠ ఉష్ణోగ్రతలు.. ఆ ప్రాంతాల్లో గడ్డకట్టే చలి, జాగ్రత్తగా ఉండండి

తెలంగాణలో చలి పులి పంజా విసురుతోంది. రోజురోజుకూ చలి తీవ్రత విపరీతంగా పెరిగిపోతుంది. గత వారం రోజులుగా అయితే కనిష్ఠ స్థాయికి ఉష్ణోగ్రతలు పడిపోతున్నాయి. రాత్రి సమయాల్లో ఉష్ణోగ్రతలు తగ్గుతుండగా.. ఉదయం కురుస్తోన్న పొగమంచు ఊపిరి ఆడనివ్వటం లేదు. కొన్ని ప్రాంతాల్లో సింగిల్ డిజిట్‌కే ఉష్ణోగ్రతలు పడిపోతున్నాయి. ఏజెన్సీ ప్రాంతాల్లో అయితే గడ్డకట్టే చలి అక్కడి ప్రజల్ని ఉక్కిరి బిక్కిరి చేస్తోంది. సంగారెడ్డి, ఆదిలాబాద్ జిల్లాల్లో 9 డిగ్రీల కంటే తక్కువగానే ఉష్ణోగ్రతలు నమోదవుతున్నట్లు హైదరాబాద్ వాతావరణ కేంద్రం అధికారులు వెల్లడించారు.

ఆదిలాబాద్ జిల్లాలోని కొన్ని ప్రాంతాలు, భద్రాచలం, హకీంపేట, ఖమ్మం. రామగుండం, పటాన్‌చెరు వంటి ప్రాంతాల్లో కనిష్ఠ ఉష్ణోగ్రతలు 12 డిగ్రీల కంటే తక్కువగా నమోదవుతున్నట్లు హైదరాబాద్ వాతావరణ కేంద్రం అధికారులు తెలిపారు. రాష్ట్రంలోని చాలా ప్రాంతాల్లో 15 డిగ్రీల కంటే తక్కువగా ఉష్ణోగ్రతలు నమోదవుతున్నాయని చెప్పారు. హైదరాబాద్ నగరంలో చలి తీవ్రత పెరిగింది. శివారు ప్రాంతాల్లో 14 డిగ్రీలకు దిగువన ఉష్ణోగ్రలు రికార్డు అవుతున్నాయి. రానున్న రోజుల్లో చలి మరింత పెరిగే అవకాశం ఉందని ప్రజలు తగిన జాగ్రత్తలు తీసుకోవాలని ఆరోగ్య నిపుణులు చెబుతున్నారు.

ఇక హిందూ మహాసముద్రం, దక్షిణ అండమాన్ సముద్రంపై ఉపరితల ఆవర్తనం ఏర్పడిందని భారత వాతావరణ కేంద్రం అధికారులు తెలిపారు. దీని ప్రభావంతో ఇవాళ ఆగ్నేయ బంగాళాఖాతంలో అల్పపీడనం ఏర్పడే ఛాన్స్ ఉందన్నారు. ఆ తర్వాత ఇది పశ్చిమ-వాయువ్య దిశగా పయనించే అవకాశం ఉందని వెల్లడించారు. రానున్న 2 రోజుల్లో దక్షిణ బంగాళాఖాతంలోని మధ్య భాగాలపై వాయుగుండంగా మారొచ్చునని చెప్పారు. దీని ప్రభావంతో ఏపీలో అక్కడక్కడా వర్షాలు కురుస్తాయని చెప్పారు. కోస్తాంధ్రలో భారీ నుంచి అతిభారీ వర్షాలకు ఛాన్స్ ఉందన్నారు. రాయలసీమలోనూ అక్కడక్కడ భారీ వర్షాలు కురిసేందుకు అవకాశం ఉందన్నారు.

అయితే తెలంగాణకు మాత్రం వర్ష సూచన లేదన్నారు. రాష్ట్రంలో పొడి వాతావరణం ఉంటుందని చెప్పారు. రాష్ట్రంలో ప్రస్తుతానికి భారీ వర్షాలకు ఏమాత్రం అవకాశం లేదని అన్నారు. కాగా, ఈ ఏడాది తెలంగాణలో రికార్డు వర్షపాతం నమోదైనట్లు వాతావరణ శాఖ అధికారులు తెలిపారు. అంచనాలకు మించి సాధారణం కంటే ఎక్కువగా వర్షాలు కురిసినట్లు వెల్లడించారు.