సికింద్రాబాద్ రైల్వేస్టేషన్‌లో సైకో కిల్లర్.. ఐదో తరగతిలోనే ఆ పనులు.. క్రైం థ్రిల్లర్‌ను మించిన స్టోరీ..

ఆదివారం (నవంబర్ 25న) ఉదయం సికింద్రాబాద్‌లోని ఓ రైలులోని వికలాంగుల పెట్టెలో మహిళ మృతదేహం కనిపించటం సర్వత్రా కలకలం రేపిన సంగతి తెలిసిందే. అయితే.. ఆ మహిళను ఎవరు హత్య చేశారని పోలీసులు ఆరా తీయగా.. విస్తుపోయే విషయాలు బయటికివచ్చాయి. హత్య చేసిన వ్యక్తి ఓ సైకో కిల్లర్‌గా గుర్తించిన పోలీసులు.. నిందితున్ని సోమవారం (నవంబర్ 26న) పట్టుకున్నారు. సికింద్రాబాద్ రైల్‌లోని మహిళను తానే హత్య చేసినట్లు కరమ్‌వీర్‌ అంగీకరించాడు. ఈ విషయాన్ని సికింద్రాబాద్‌ జీఆర్పీ అధికారులకు వల్సాద్‌ పోలీసులు సమాచారం ఇచ్చారు. దీంతో.. నిందితున్ని పీటీ వారెంట్‌పై హైదరాబాద్‌ తీసుకొచ్చేందుకు నగర పోలీసులు సన్నాహాలు చేస్తున్నారు. అయితే.. ఈ సైకో కిల్లర్‌ను గుజరాత్‌లోని వల్సాద్ పోలీసులు పట్టుకుని విచారించగా.. నిందితుని గురించి సంచలన విషయాలు వెలుగులులోకి వచ్చాయి. నిందితులని స్టోరీ క్రైం థ్రిల్లర్‌ సినిమాను మించిపోయేలా ఉంది. ఆ వివరాలను పోలీసులు వెల్లడించారు.

ఈ సంవత్సరంలో అక్టోబర్‌ 17 నుంచి నవంబర్‌ 24 మధ్య 35 రోజుల వ్యవధిలో ఎక్స్‌ప్రెస్‌ రైళ్లల్లో సంచరిస్తూ ఐదు రాష్ట్రాల్లో ఐదు మర్డర్లు చేసిన ఈ సైకో కిల్లర్ పేరు.. భోలో కరమ్‌వీర్‌ జాట్‌ అలియాస్‌ రాహుల్‌. హర్యానాలోని రోహ్తక్‌లో ఉన్న మోక్రాఖాస్‌ స్వస్థలం. గతంలో రాజస్థాన్, హర్యానా, ఉత్తరప్రదేశ్‌లో ఇప్పటికే పలు నేరాలు చేసినట్టుగా సమాచారం. హర్యానాకు చెందిన కరమ్‌వీర్‌కు చిన్నతనంలోనే ఎడమ కాలికి పోలియో సోకింది. మరోవైపు.. చిన్నతనం నుంచే ఒంటరిగా ఉంటూ, విచిత్రంగా ప్రవర్తించేవాడు. దీంతో.. కుటుంబం కూడా కరమ్ వీర్‌ను దూరం పెట్టింది. ఐదో తరగతితో చదువు మానేసిన కరమ్‌వీర్‌.. మొదట లారీ క్లీనర్‌గా పని చేసేవాడు. ఈ క్రమంలోనే.. డ్రైవింగ్‌ కూడా నేర్చుకున్నాడు.

అయితే.. పోలియో ఉండటంతో కరమ వీర్‌ను ఎవరూ డ్రైవర్‌గా పెట్టుకోలేదు. దీంతో హైవేల్లో ఉండే దాబాల్లో పనిచేస్తూ.. అక్కడ పార్క్‌ చేసే లారీలను ఎత్తుకెళ్లడం ప్రారంభించాడు. అలా మెల్లిగా నేరాల బాటపట్టిన కరమ్ వీర్.. చోరీలు, కిడ్నాప్‌లు చేస్తూ ప్రొఫెషనల్‌గా మారిపోయాడు. రాజస్థాన్, హర్యానా, ఉత్తరప్రదేశ్, ఉత్తరాఖండ్‌లో చేసిన నేరాలకు గానూ.. కరమ్ వీర్ మీద సుమారు 13 కేసులు నమోదైనట్టు పోలీసులు గుర్తించారు.

ఈ ఏడాది మే వరకు రాజస్థాన్‌లోని జోద్‌పూర్‌ జైల్లో ఉన్న కరమ్‌వీర్‌.. బెయిల్‌పై విడుదలై బయటకు వచ్చిన కరమ్ వీర్ రూట్ మార్చాడు. రైళ్లల్లో దివ్యాంగుల కోసం చివరలో ఉండే బోగీలపై కన్నేసిన కరమ్ వీర్.. సీరియల్‌ కిల్లర్‌గా మారాడు. రైళ్లలో దివ్యాంగుల బోగీలో ప్రయాణిస్తూ.. అందులో ఉన్న మహిళా ప్రయాణికులపై అత్యాచారం చేసి హత్యలు చేయటం, దోపిడికి పాల్పడి వారిని హతమార్చటం మొదలుపెట్టాడు. అక్టోబర్‌ 17వ తేదీన కరమ్ వీర్ తొలి హత్య చేశాడు.

ఆ తర్వాత.. కతిహార్‌ ఎక్స్‌ప్రెస్‌లో ప్రయాణించిన కరమ్ వీర్.. పశ్చిమ బెంగాల్‌లోని హౌరా స్టేషన్‌లో ఓ వృద్ధుడి గొంతు కోసి చంపేసి.. అతని దగ్గరున్న డబ్బును దొంగిలిచాడు. అనంతరం.. పూణే- కన్యాకుమారి ఎక్స్‌ప్రెస్‌లో మరో మహిళపై అత్యాచారం చేసి, కత్తితో గొంతు కోసి హత్య చేశాడు. నవంబర్‌ 14న ఉద్వాడలో తాను పని చేసిన హోటల్‌కు వెళ్లి జీతం తీసుకోవాలని భావించాడు. కానీ.. స్టేషన్‌ ఫ్లాట్‌ఫాం మీద ఓ యువతి ఒంటరిగా కనిపించటంతో.. ఆమెను దగ్గరిలోని మామిడి తోటలోకి లాక్కెళ్లి, అత్యాచారం చేసి చంపేశాడు. ఇలా వరుసపెట్టి మరో నాలుగు హత్యలు చేశాడు.

ఘటనాస్థలిలో లభించిన బ్యాగ్‌ ఆధారంగా విచారణ చేపట్టిన పోలీసులు.. సీసీ కెమెరాల ద్వారా నిందితుడిని గుర్తించారు. అమ్మాయిని రేప్ చేసిన చంపిన తర్వాత.. నిందితుడు కూల్‌గా వచ్చి ఫ్రూట్ సలాడ్ తిన్నట్టుగా సీసీ దృశ్యాల్లో రికార్డయ్యింది. ఆ తర్వాత.. ఉద్వాడ నుంచి రైలులో ఆంధ్రప్రదేశ్‌లోని మచిలీపట్నం చేరుకుని, అక్కడి నుంచి సికింద్రాబాద్‌ వచ్చాడు. అక్కడ ఆదివారం తెల్లవారుజామున రైలు దిగి.. 9వ నెంబర్‌ ప్లాట్‌ఫాంపై ఆగి ఉన్న మంగుళూరు స్పెషల్‌ ఎక్స్‌ప్రెస్‌ ఎక్కాడు. దాని సీట్‌ కమ్‌ లగేజ్‌ ర్యాక్‌ కోచ్‌లో ఓ మహిళ ఒంటరిగా ఉండటం గమనించి.. ఆమెను గొంతునులిమి చంపేశాడు. ఆమె దగ్గరున్న నగదు, సెల్‌ఫోన్‌ తీసుకుని రైలులోనే పారిపోయాడు.

ఈ హత్యపై సికింద్రాబాద్‌ జీఆర్పీ అధికారులు కేసు నమోదు చేసుకుని దర్యాప్తు చేపట్టారు. ఈ క్రమంలోనే.. కరమ్ వీర్ సోమవారం నాటికి గుజరాత్‌లోని వాపి చేరుకున్నాడు. అప్పటికే అతడి కోసం గాలిస్తున్న వల్సాద్‌ పోలీసులు అతడిని అరెస్ట్ చేశారు. అతని వద్ద సికింద్రాబాద్‌లో హత్య చేసిన మహిళ వద్ద కాజేసిన సెల్‌ఫోన్‌ స్వాధీనం చేసుకుని, అరెస్ట్ చేశారు.