డబ్బు కోసం గంజాయి స్మగ్లింగ్,,,పోలీసులకు పట్టుబడిన బ్రదర్స్

గంజాయి, డ్రగ్స్ వంటి మత్తు పదార్థాల అక్రమ రవాణాపై తెలంగాణ ప్రభుత్వం ఉక్కుపాదం మోపుతున్నా.. రాష్ట్రంలో ఎక్కడో ఓ చోట అవి బయపడుతూనే ఉన్నాయి. తనిఖీలు ముమ్మరం చేసినా.. చాప కింద నీరులా గంజాయి పట్టుబడుతూనే ఉంది. తాజాగా.. సికింద్రాబాద్‌ రైల్వే స్టేషన్‌లో గంజాయి పట్టుబంది. ఇద్దరు అన్నదమ్ములు వక్రబుద్దితో ఈజీగా డబ్బులు సంపాదించేందుకు గంజాయి స్మగ్లింగ్ చేస్తున్నారు. పక్కా సమాచారం మేరకు నిఘా ఉంచిన పోలీసులు అన్నదమ్ములను అరెస్ట్ చేసి వారి వద్ద నుంచి రూ. 4.50 లక్షల విలువ చేసే 18 కిలోల గంజాయిని సీజ్ చేశారు.

 రైల్వే పోలీసులు తెలిపిన వివరాల ప్రకారం.. పశ్చిమ బెంగాల్‌ హుగ్లీ మండలం రత్‌టాలా గ్రామానికి చెందిన ప్రీతం చౌదరి(37), సత్యం చౌదరి(29) అన్నదమ్ములు. ఈజీగా డబ్బు సంపాదించేందుకు గంజాయి స్మగ్లింగ్ చేయాలని నిర్ణయం తీసుకున్నారు. పశ్చిమ బెంగాల్‌లోని షాలిమార్‌ పట్టణంలో ఓ వ్యక్తి నుంచి 18 కిలోల గంజాయి కొనుగోలు చేశారు. ఆ గంజాయిని ముంబైలో విక్రయించేందుకు ప్లాన్ చేసుకున్నారు. ట్రైన్‌లో గంజాయి బ్యాగులతో సికింద్రాబాద్ రైల్వే స్టేషన్‌కు చేరుకున్నారు. వారు అనుమానాస్పదంగా కనిపించటంతో పోలీసులు వారిని తనిఖీలు నిర్వహించి గంజాయిని స్వాధీనం చేసుకున్నారు.

రూ.1.30 కోట్ల విలువైన గంజాయి దగ్ధంరామగుండం పోలీసు కమిషనరేట్‌ పరిధిలో రూ.1.30 కోట్ల విలువైన గంజాయిని దగ్ధం చేశారు. వివిధ కేసుల్లో స్వాధీనం చేసుకున్న 521.544 కిలోల గంజాయిని డ్రగ్స్‌ దహనం చేశారు. మెుత్తం 64 కేసుల్లో స్వాధీనం చేసుకున్న గంజాయిని రామగుండం సీపీ శ్రీనివాస్‌ సమక్షంలో కాల్చేశారు. కాల్చేసిన గంజాయి విలువ రూ.1,30,38,600 ఉంటుందని సీపీ శ్రీనివాస్ వెల్లడించారు. యువతను గంజాయి మత్తుకు అలవాటు చేసేవారిపై కఠిన చర్యలు తీసుకుంటామని పోలీసులు హెచ్చరించారు. యువత మత్తు పదార్థాలకు బానిసలు కావద్దని సూచించారు. రాష్ట్రంలో గంజాయి అక్రమ రవాణాకు పాల్పడితే సహించేది లేదని.. ఈ విషయంపై కఠినంగా చర్యలు తీసుకుంటామని సీపీ హెచ్చరించారు. ప్రత్యేక టీంలు ఏర్పాటు చేసి నిరంతరం తనిఖీలు చేస్తామన్నారు.