వెన్నుదన్నుగా నిలిచిన ఉద్యమకారుడికి కేసీఆర్ గిఫ్ట్

తన సంతోషాల్లోనే కాదు.. కష్టకాలంలోనూ వెన్నంటి ఉండి.. వెన్నుదన్నుగా నిలిచిన ఉద్యమకారుడ్ని బీఆర్‌ఎస్‌ పార్టీ అధినేత, తెలంగాణ మాజీ ముఖ్యమంత్రి కల్వకుంట్ల చంద్రశేఖర్‌ రావు (కేసీఆర్) సగౌరవంగా సత్కరించారు. పార్టీ కార్యాలయం తెలంగాణ భవన్‌ ఇన్‌చార్జ్‌గా దాదాపు 20 ఏళ్ల పాటు సేవలు అందించిన మాజీ ఎమ్మెల్సీ శ్రీనివాస్ రెడ్డికి ఘనంగా వీడ్కోలు పలికారు. కుటుంబంతో కలిసి అమెరికాకు వెళ్లిపోతున్న ఆయనకు ఆత్మీయంగా బంగారు గొలుసు.. పట్టువస్త్రాలు సమర్పించి సాగనంపారు.

బీఆర్ఎస్ పార్టీ కేంద్ర కార్యాలయ కార్యదర్శి, మాజీ ఎమ్మెల్సీ ప్రొఫెసర్ శ్రీనివాస్ రెడ్డి.. ఎర్రవల్లిలోని వ్యవసాయ క్షేత్రంలో కేసీఆర్‌ను కుటుంబంతో సహా కలిశారు. ఈ సందర్బంగా కేసీఆర్, ఆయన సతీమణి శోభ.. ఆత్మీయంగా వారికి స్వాగతం పలికి ఆతిథ్యం ఇచ్చారు. ఈ సందర్భంగా మాజీ సీఎం బంగారు గొలుసును శ్రీనివాస్‌ రెడ్డి మెడలో వేశారు. అనంతరం పట్టువస్త్రాలు అందించి.. వారి పిల్లలకు కానుకలు బహూకరించారు. దగ్గరుండి కారు వద్దకు వెళ్లి మరి కేసీఆర్‌ దంపతులు.. శ్రీనివాస్‌ రెడ్డి కుటుంబానికి వీడ్కోలు పలికారు.

ఈ సందర్భంగా ప్రొఫెసర్ శ్రీనివాస రెడ్డి మాట్లాడుతూ.. కేసీఆర్‌తో తనకున్న అనుబంధాన్ని గుర్తుచేసుకున్నారు. ‘ఇది కేవలం నాకు జరిగిన సత్కారమే కాదు.. నాలాంటి ఎందరో తెలంగాణ వాదులకు జరిగిన సత్కారం’ అని తెలిపారు. తెలంగాణ జాతిని మేల్కొల్పిన ఉద్యమ రథ సారథి.. తెలంగాణ ప్రగతి ప్రదాత కేసీఆర్ అని ఆయన కొనియాడారు. కేసీఆర్‌ వద్ద 25 ఏళ్ల పాటు పనిచేయడం అదృష్టమని.. అదితనకు దక్కిన గొప్ప అవకాశమని వ్యాఖ్యానించారు

‘కేసీఆర్ లేకుంటే తెలంగాణ రాష్ట్రం వచ్చేదికాదు... తెలంగాణ కోసమే కేసీఆర్ జీవితం అర్పితం చేశారు.. తెలంగాణ ప్రజల హృదయాల్లో ఆయన స్థానం శాశ్వతం.. ప్రేమతో మీ కేసీఆర్.. (విత్ లవ్ ఫ్రమ్ కేసీఆర్) అని నాకు వేసిన లాకెట్... నాలాంటి తెలంగాణ వాదులందరికీ వేసిందిగా భావిస్తున్నా’ అని మాజీ ఎమ్మెల్సీ తెలిపారు. జీవితాంతం తెలంగాణ కోసం పోరాడిన తనకు అమెరికా వెళ్లడం తప్పనిసరిగా మారిందని ఆయన అన్నారు.

‘సొంతగడ్డను వదిలి వెళ్తున్నందుకు నాకు చాలా బాధగా ఉంది... కానీ తప్పని పరిస్థితి... తెలంగాణ వాదులందరి తరఫున కేసీఆర్‌కు ధన్యవాదాలు... అడ్డు తెరలు లేని ఆత్మీయతకు చిరునామా కేసీఆర్‌... హోదాతో సంబంధం లేని.. ఆత్మగల మనుషుల అనురాగ బంధం కేసీఆర్... తెలంగాణ మట్టి ఆత్మీయతకు నిలువుటద్దం కేసీఆర్... తెలంగాణ వాదికి ఘన సత్కారంతో మరోసారి రుజువైంది’ అని శ్రీనివాస్‌ రెడ్డి భావోద్వేగానికి గురయ్యారు.ఇక, ప్రొఫెసర్ శ్రీనివాసరెడ్డి అమెరికాలోనే స్థిరపడనున్నారు.