రూ.30 లక్షలు కాజేసే ప్రయత్నం.. సైబర్ కేటుగాళ్లను చాకచక్యంగా అడ్డుకున్న ఎస్బీఐ

పలు రకాల ఆఫర్లు, కస్టమ్స్ కేసుల పేరుతో సామాన్యులను సైబర్ కేటుగాళ్లు బురిడీకొట్టించి లూటీ చేసేందుకు ప్రయత్నిస్తున్నారు. వీరి వలకు చిక్కి లక్షలు పోగట్టుకుంటున్న ఘటనలు తరుచూ చూస్తేనే ఉన్నాం. తాజాగా, ఓ వ్యక్తిని బోల్తాకొట్టించడానికి సైబర్ నేరగాళ్లు చేసిన ప్రయత్నాన్ని స్టేట్ బ్యాంకు ఆఫ్ ఇండియా (ఎస్బీఐ) అధికారులు చాకచక్యంగా అడ్డుకున్నారు. ఈ సంఘటన హైదరాబాద్‌‌లోని లోతుకుంట బ్రాంచ్‌లో చోటుచేసుకుంది. వివరాల్లోకి వెళితే ఓ 78 ఏళ్ల డాక్టర్ లోతుకుంట బ్రాంచ్‌ను సందర్శించి.. తన సీనియర్ సిటిజన్ సేవింగ్స్ స్కీమ్ మూసివేయాలని మేనేజర్‌ను కలిసి అభ్యర్థించాడు.

అందులోని రూ. 30 లక్షలను ఓ ఖాతాకు బదిలీ చేయాలని కోరాడు. అయితే, అతడి మొబైల్‌‌కు పదే పదే ఫోన్స్ చేసిన కేటుగాళ్లు.. త్వరగా నగదు బదిలీ చేయాలని చెప్పడాన్ని మేనేజర్ గమనించారు. ఈ మొత్తం ఎందుకని మేనేజర్ ప్రశ్నించగా.. అనారోగ్యంతో తన భార్య ఓ ప్రైవేట్ ఆసుపత్రిలో చికిత్స పొందుతుందని, అందుకు డబ్బులు అవసరమని ఆ కస్టమర్ చెప్పాడు. ఎస్బీఐ మేనేజర్‌కు అనుమానం వచ్చి.. ఆసుపత్రి పేరు, పేషెంట్ వివరాలు ఆరా తీశాడు. చివరకు ఆ వివరాలతో పేషెంట్ ఎవరూ లేరని నిర్దారణ అయ్యింది.

వెంటనే ఆయన పోలీసులకు సమాచారం ఇవ్వడంతో ఆ పెద్దాయన అసలు విషయం బయటపెట్టాడు. ఢిల్లీ నుంచి కస్టమ్స్ అధికారి పేరుతో ఓ వ్యక్తి ఫోన్ చేసి.. తనకు మలేషియా నుంచి 16 పాస్‌పోర్ట్‌లు, ఏటీఎం కార్డులతో కూడిన పార్శిల్ వచ్చిందని చెప్పాడు. తాను ఆధార్ కార్డుల ఆధారంగా 30 బ్యాంకు ఖాతాలు తెరిచి రూ. 88 కోట్ల మనీలాండరింగ్ మోసానికి పాల్పడ్డినట్టు బెదిరించి.. ఆ కేసు నుంచి బయటపడాలంటే తమ ఖాతాకు డబ్బులను బదిలీ చేయాలని డిమాండ్ చేసినట్టు వెల్లడించాడు. దీంతో అది నిజం కాదని ఆ సీనియర్ సిటిజన్‌కు బ్యాంకు అధికారులు సర్ది చెప్పి పంపించారు.

బ్రాంచ్ అధికారులు సమయస్ఫూర్తిగా వ్యవహరించి సీనియర్ సిటిజన్ డబ్బు సైబర్ కేటుగాళ్ల చేతుల్లోకి వెళ్లకుండా కాపాడరని ఎస్బీఐ పేర్కొంది. దీంతోపాటు డిజిటల్ మోసాలు/ అరెస్టుల గురించి గుర్తుతెలియని కాల్స్ వస్తే 1930 లేదా ప్రభుత్వ పోర్టల్ www.cybercrime.gov.inకి ఫిర్యాదు చేయాలని కస్టమర్లకు సూచించింది. అయితే, గతంలోనూ ఇలాంటి ఘటనలు చోటుచేసుకున్నాయి. ఈ నెలలో ఓ ఉద్యోగికి డిజిటల్ అరెస్ట్ పేరుతో ఫోన్ చేసిన సైబర్ నేరగాళ్లు.. దాదాపు రూ.13 లక్షలు లూటీ చేశారు. అలాగే, ఓ మహిళను కూడా బురిడీ కొట్టించి ఏకంగా 37 లక్షలు కొట్టేశారు.