వీడియో గేమ్‌లో ఓడిపోయి.. నెల రోజుల పసికందును గుద్ది.. ఆ తండ్రిని కోర్టు ఏం చేసిందంటే

అప్పుడే పుట్టిన పిల్లలను తల్లిదండ్రులు ఎంతో ప్రేమగా చూసుకుంటారు. వారికి చిన్న దెబ్బ తగిలినా విలవిల్లాడిపోతుంటారు. వారిని చూసుకోవడానికి తమ పనులు అన్నీ మానుకొని మరీ కంటికి రెప్పలా కాపాడుకుంటారు. కానీ ఆ తండ్రి మాత్రం రాక్షసుడిలా మారాడు. అతడిని నమ్మి కుమారుడిని ఇంట్లో వదిలి వెళ్లిన తల్లికి పుత్రశోకం కల్గించాడు. నవజాత శిశివును చూసుకోమని చెప్పి వెళ్లగానే బాబును పడుకోబెట్టి వీడియో గేమ్ ఆడడం ప్రారంభించాడు. ఆ గేమ్‌లో ఓడిపోవడంతో.. తీవ్ర కోపోద్రిక్తుడైన అతడు ఆ కోపాన్ని శిశువుపై చూపించాడు. ఒక్క గుద్దు గుద్ది అతడి ప్రాణాలు తీశాడు. అసలేం జరిగిందంటే..?

అమెరికా కెంటుకికీ చెందిన 32 ఏళ్ల ఆంథోని ట్రైస్‌కు పండంటి మగ బిడ్డ పుట్టాడు. అది చూసి మురిసిపోయిన అతడు కొడుకును బాగానే చూసుకున్నాడు. 2019లో మే 3వ తేదీన అతడి భార్య పని మీద బయటకు వెళ్లింది. అయితే నెల రోజుల వయసు ఉన్న కుమారుడిని భర్త ఆంథోనికి అప్పగించింది. త్వరగా తిరిగి వస్తాను అప్పటి వరకు జాగ్రత్తగా చూసుకోమంటూ భర్తకు తెలిపింది. సరేనని చెప్పిన అతడు భార్య వెళ్లగానే కుమారుడిని పడుకోబెట్టి ఆపై వీడియో గేమ్ ఆడడం ప్రారంభించాడు. అయితే చాలా సేపు గేమ్ ఆడుతూనే ఉన్న అతడు అందులో ఓడిపోవడంతో తీవ్ర కోపోద్రిక్తుడు అయ్యాడు.

ఆ కోపంతోనే బయటకు వచ్చిన అతడు ఇంట్లోని వస్తువులన్నీ చిందరవందరగా పడేశాడు. అయితే ఆ చప్పుడుకు నిద్ర లేచిన బాబు ఏడవడంతో అతడి గదిలోకి వెళ్లాడు ఆంథోని. అప్పటికే కోపంలో ఉన్న అతడు బాబు తలపై పిడికిలి బిగించి ఒక్క గుద్దు గుద్దాడు. ఆపై బాబు కాసేపు స్పృహ తప్పాడు. అయినా సరే అతడు బాలుడిని అక్కడే పడుకోబెట్టి బాత్రూంకు వెళ్లాడు. బయటకు వచ్చే సరికి కుమారుడు బాగా ఏడవడంతో భయపడిని ఆంథోని వెంటనే 911కు ఫోన్ చేసి జరిగినదంతా చెప్పాడు.

హుటాహుటిన సంఘటనా స్థలానికి చేరుకున్న పోలీసులు కేసు నమోదు చేసుకున్నారు. వెంటనే నవజాత శిశువును స్థానికంగా ఉన్న ఆస్పత్రికి తరలించారు. చికిత్స పొందుతూనే బాలుడు రెండ్రోజుల తర్వాత మృతి చెందాడు. పోలీసుల ద్వారా విషయం తెలుసుకున్న బాలుడి తల్లి ముందుగా షాక్ అయింది. కానీ భర్త చేసిన అమానుషం తెలుసుకుని కన్నీరుమున్నీరుగా విలపించింది. అతడికి ఎలాగైనా శిక్ష పడాలని పోలీసులకు తెలిపింది. అప్పటికే అతడిపై కేసు నమోదు కాగా.. కోర్టులో హాజరు పరిచారు పోలీసులు.

ఈక్రమంలోనే కోర్టు ఆంథోనికి బెయిల్ నిరాకరించింది. అప్పటి నుంచి అతడు జైల్లోనే ఉండగా.. తాజాగా 2025 డిసెంబర్‌లో మరోసారి విచారణ జరిగింది. ఈక్రమంలోనే కన్నకొడుకును కోపంతో ఘోరాతి ఘోరంగా కొట్టి చంపినందుకు గాను 20 సంవత్సరాల జైలు శిక్ష విధించింది. నవజాత శిశువుపు అంత దారుణంగా చంపిన ఆంథోనికి 20 ఏళ్ల జైలు శిక్ష పడడం తనకు చాలా సంతోషంగా ఉందని అతడి భార్య చెప్పింది. అలాగే అతడి అత్త, మామలు కూడా.. ఇలాగైనా చనిపోయిన బాలుడిని న్యాయం జరిగిందని అన్నారు.