సంధ్య థియేటర్ ఘటనలో పోలీసుల షోకాజ్ నోటీసులు, వారం రోజులు డెడ్‌లైన్

పుష్ప 2 బెనిఫిట్ షో సందర్భంగా హైదరాబాద్ సంధ్య థియేటర్ వద్ద డిసెంబర్ 4న తొక్కిసలాట జరిగిన విషయం తెలిసిందే. రాత్రి 8 గంటల తర్వాత మూవీ చూసేందుకు హీరో అల్లు అర్జున్ తన టీంతో కలిసి థియేటర్‌కు రాగా.. అభిమానులు పోటెత్తటంతో తొక్కిసలాట జరిగింది. ఈ ఘటనలో సినిమా చూసేందుకు వచ్చిన రేవతి అనే మహిళ ప్రాణాలు కోల్పోయింది. ఆమె కుమారుడు శ్రీతేజ్ తీవ్రంగా గాయపడగా ప్రస్తుతం కిమ్స్ ఆసుపత్రిలో చికిత్స పొందుతున్నాడు. తొక్కిసలాటకు బాధ్యులను చేస్తూ థియేటర్ యాజమాన్యంతో పాటుగా అల్లు అర్జున్‌లను అరెస్టు చేశారు. ప్రస్తుతం వారికి హైకోర్టు మధ్యంతర బెయిల్ మంజూరు చేసింది.

ఇక ఈ వ్యవహారంలో కీలక పరిణామం చోటు చేసుకుంది. సంధ్య థియేటర్ లైసెన్స్‌ విషయమై పోలీసులు షోకాజ్ నోటీసులు జారీ చేశారు. లైసెన్స్ రద్దు విషయమై చిక్కడపల్లి పోలీసులు ఈ నోటీసులు ఇచ్చారు. తొక్కిసలాటలో ఒకరి మృతికి కారణమైన థియేటర్‌ లైసెన్స్‌ను ఎందుకు రద్దు చేయకూడదో వివరణ ఇవ్వాలన్నారు. ఈ మేరకు షోకాజ్ నోటీసులు జారీ చేస్తూ వారం రోజులు గడవు ఇచ్చారు. వారం రోజుల్లో వివరణ ఇవ్వకుంటే లైసెన్స్ రద్దు చేస్తామని నోటీసుల్లో పోలీసులు పేర్కొన్నారు.

ఇక హైదరాబాద్ కిమ్స్ ఆసుపత్రిలో చికిత్స పొందుతున్న చిన్నారి శ్రీతేజ్‌ను హైదరాబాద్ పోలీస్ కమిషనర్ సీవీ ఆనంద్, తెలంగాణ హెల్త్ సెక్రటరీ క్రిస్టినా పరామర్శించారు. బాలుడి ఆరోగ్య పరిస్థితిపై డాక్టర్లను అడిగి వివరాలు తెలుసుకున్నారు. చిన్నారి ఆరోగ్యం మెరుగయ్యేందుకు అవసరమైన వైద్య సేవలు అందించాలని సూచించారు. బాలుడిని పరామర్శించిన అనంతరం సీవీ ఆనంద్ మీడియాతో మాట్లాడారు. ప్రస్తుతం చిన్నారికి ఐసీయూలో చికిత్స అందుతోందని చెప్పారు. చిన్నారి ఆరోగ్య పరిస్థితిని ఎప్పటికప్పుడు తెలుసుకుంటున్నామన్నారు.

ఇక రెండ్రోజుల క్రితం హీరో అల్లు అర్జున్ సైతం చిన్నారి ఆరోగ్యం కీలక కామెంట్స్ చేశారు. శ్రీతేజ్ త్వరగా కోలుకోవాలని ఆకాంక్షించారు. అనుకోకుండా జరిగిన ప్రమాదతో ఈ దుర్ఘటన చోటు చేసుకుందన్నారు. కేసు కోర్టులో ఉన్నందున ప్రత్యక్షంగా వెళ్లి పరామర్శించలేకపోతున్నానని అన్నారు.