ఎంట్రీకి ముందే తండ్రికి చెమటలు.. డెలివరీ తర్వాత తల్లికి నిరాశ

నందిని నిండు గర్భిణి. ఆమెకు ఇది మూడో కాన్పు. ముందు ఇద్దరూ మగపిల్లలే. తన ఇంట్లో ఓ మహాలక్ష్మి ఉండాలన్నది నందిని కోరిక. ఈసారి కచ్చితంగా అమ్మాయే పుడుతుందని నందిని చాలా గట్టిగా నమ్ముతోంది. తనకు అమ్మాయి పుడితే.. ఏం పేరు పెట్టాలి.. తనను ఎలా చూసుకోవాలి.. ఇలా ఎన్నో ఆలోచనలు ఆమె మదిలో మెదులుతున్నాయి. ఇంతలో ఆమె పొట్టలో కదలిక మొదలైంది. ఇప్పటికే రెండు కాన్పుల అనుభవం ఉన్న నందిని.. నెలలు నిండిన తర్వాత ఇలాంటి కదలికలు సహజమే కదా అని సర్ధిచెప్పుకుంది. కానీ.. ఆ కదలికలు మెల్లిమెల్లిగా నొప్పులుగా మారాయి. ఇదే విషయాన్ని నందిని తన భర్తకు చెప్పింది. ఇంతలో.. నొప్పుల తీవ్రత ఇంకాస్త పెరిగింది. దీంతో.. నందిని భర్త వెంటనే అంబులెన్స్‌కు కాల్ చేసి ప్రభుత్వ ఆస్పత్రికి తరలించాడు. ఇంటి నుంచి ఆస్పత్రికి చేరుకునే సమయంలో నందిని నొప్పులతో తల్లడిల్లిపోయింది.

ఆస్పత్రికి తీసుకెళ్లిన వెంటనే నందినిని ఆపరేషన్ థియేటర్‌కి తీసుకెళ్లారు. వైద్య సిబ్బంది ఆమెను పరిశీలించారు. ఎలాగూ నొప్పులు వస్తుండటంతో.. సాధారణ ప్రసవం జరుగుతుందని అంతా భావించారు. నందిని భర్త, కుటుంబ సభ్యులు కూడా అదే ఆలోచనలో ఉన్నారు. ఇంతలో.. ఆపరేషన్ థియేటర్‌ నుంచి టెన్షన్‌గా బయటికొచ్చిన డాక్టర్.. "ఇక్కడ ఎవరు నందిని భర్త..?" అని అడిగింది. "నేనే మేడం..ఏమైంది.." అంటూ కాస్త ఆత్రుతతో నందిని భర్త డాక్టర్ దగ్గరికి వెళ్లాడు. "నందినికి సాధారణ ప్రసవం కావటం కష్టం. ఆపరేషన్ చేయాల్సిందే." అని డాక్టర్ చెప్పింది.

"ఏమైంది మేడం..ఏదైనా సమస్యా.." కాస్త ఆందోళనగా అడిగాడు నందిని భర్త. "శిశువు కాస్త బరువుంది.. సాధారణ ప్రసవం కోసం ప్రయత్నిస్తే తల్లీబిడ్డా ఇద్దరికీ ప్రమాదమయ్యే ఛాన్స్ ఉంది.." అని చెప్పగానే అతనిలో టెన్షన్ పెరిగింది. ఏమాత్రం ఆలోచించకుండా.. "ఆపరేషన్ అయితే ఆపరేషన్.. చేసేయండి మేడం.. ఇద్దరినీ కాపాడండి.. ప్లీజ్" అంటూ వేడుకున్నాడు. "ఏం టెన్షన్ పడకండి.. ఏమీ కాదు.. జస్ట్ ఆపరేషన్ చేయటం కోసం మీ పర్మిషన్ కావాలి అంతే.. మీరు కూల్‌గా ఉండండి" అని చెప్పి డాక్టర్ తిరిగి ఆపరేషన్ థియేటర్‌లోకి వెళ్లింది. ఏం టెన్షన్ పడకండి చెప్పి డాక్టర్ తాపీగా లోపలికైతే వెళ్లింది కానీ.. బయట మాత్రం నందిని భర్తకు మాత్రం టెన్షన్‌తో చలి కాలం కూడా చెమటలు పట్టేస్తున్నాయి. కుదురుగా ఒక్క దగ్గర కూర్చోలేక.. అటూ ఇటూ తిరిగేస్తున్నాడు.

మరోవైపు.. థియేటర్‌ లోపలికి వెళ్లిన డాక్టర్.. నందినికి విజయవంతంగా ఆపరేషన్ చేశారు. అయితే.. ఈసారి కచ్చితంగా మహాలక్ష్మే వస్తుందని బలంగా కోరుకున్న నందిని కోరిక మాత్రం నెరవేరలేదు.. మళ్లీ మగపిల్లాడే వచ్చాడు. నందిని గర్భం నుంచి బయటకు ఎంట్రీ ఇచ్చిన ఆ పిల్లాన్ని చూసి.. డాక్టర్‌తో పాటు వైద్య సిబ్బంది అంతా ఆశ్చర్యపోయారు. పిల్లాన్ని శుభ్రం చేసి.. ఓ నర్సు బయటకు తీసుకొచ్చి నందిని కుటుంబ సభ్యులకు చూపించింది. నర్సు చేతిలో ఉన్న ఆ బుడ్డోన్ని చూసి.. నందిని భర్తతో పాటు అక్కడున్న కుటుంబ సభ్యులు కూడా ఆశ్చర్యంతో కళ్లు పెద్దవి చేసి చూశారు. అయితే.. వాళ్ల ఆశ్చర్యానికి కారణం.. మళ్లీ మగపిల్లాడేనా అనే కాదు.. మరో విషయం కూడా ఉంది.

పిల్లాడు కాస్త బరువుంటాడని డాక్టర్ ముందే చెప్తే.. ఏ మూడు కిలోల పైన ఉన్నాడో అని అందరూ అనుకున్నారు. కానీ.. ఆ పిల్లాడిని చూసి.. ఒక్క క్షణం ఆశ్చర్యపోగా.. వెంటనే అందరి ముఖాల్లో ఒక్కసారిగా నవ్వులు విరిశాయి. బాలభీముడు పుట్టాడ్రోయ్ అంటూ ఆ బుడ్డోడిని అందరూ ముద్దు చేశారు. అక్కడున్న వేరే వాళ్లు కూడా ఆ బుడ్డోడిని ఫొటోలు తీసుకున్నారు. ఇంతకూ ఆ బాలభీముడు ఎంత బరువున్నాడా అని తూకం వేస్తే.. ఏకంగా 5.25 కిలోలు ఉన్నాడు. పిల్లాడి సంగతి సరే.. కానీ మరి "నందిని ఎలా ఉంది మేడం" అని నర్సును అడిగితే.. "బాగుంది. ఇప్పుడే ఆపరేషన్ అయ్యింది కదా.. ఓ అరగంట తర్వాత వార్డుకు షిఫ్ట్ చేస్తాం" అని నర్సు చెప్పటంతో అంతా ఊపిరి పీల్చుకున్నారు.

ఈ ఘటన.. భద్రాచలంలో జరిగింది. బూర్గంపాడు మండలం ఇరవెండి గ్రామానికి చెందిన మడకం నందినికే ఈ బాలభీముడు జన్మించింది. ఈ ఘటనపై ఆస్పత్రి సూపరింటెండెంట్ డాక్టర్ రామకృష్ణ కూడా స్పందించారు. సాధారణంగా అప్పుడే పుట్టిన పిల్లలు రెండున్నర కిలోల నుంచి సుమారు మూడున్నర కిలోల బరువు ఉంటారని.. 5.25 కిలోలతో జన్మించటం అరుదైన ఘటన అని ఆయన తెలిపారు. సరైన సమయానికి వైద్యులు ఆపరేషన్ చేయటంతో.. తల్లీ బిడ్డా ఇద్దరూ క్షేమంగా ఉన్నారని తెలిపారు.

ఈ ఘటనలో అందరూ సంతోషంగానే ఉన్నారు. అయితే.. బాలభీమునికి జన్మనిచ్చిన తల్లి నందినికి కూడా సంతోషం ఉన్నప్పటికీ ఎక్కడో కాస్త నిరాశ ఉండిపోయింది. ఈసారి తనకు కచ్చితంగా పాపే పుడుతుందని కాస్త గట్టిగానే అనుకుంది. ఎలాగైతేనేం.. బాలభీముడు జన్మించి ఆ కాస్త నిరాశను కూడా తన ఎంట్రీతో తీసేశాడు. ఇదంతా చదివాక.. అమ్మబాబోయ్ అంత బరువా అని కళ్లు పెద్దవి చేసి ఆశ్చర్యపోకండి. ఆ బుడ్డోనికి దిష్టి తగులుతుంది. ఇరుగు దిష్టి.. పొరుగు దిష్టి.. నా దిష్టి.. నీ దిష్టి.. తూతూతూ..!!