ఇందిరమ్మ ఇళ్ల లబ్ధిదారుల్లో ఎక్కువ మంది వారే ఉంటారు: సీఎం రేవంత్

తెలంగాణలో పేదల సొంతింటి కలను నిజం చేసేందుకు ఇందిరమ్మ ఇండ్ల పథకం తీసుకొచ్చిన సంగతి తెలిసిందే. ఈ పథకం అమలుకు ప్రభుత్వం సిద్ధమైంది. ఇప్పటికే ప్రత్యేకంగా యాప్ తీసుకురాగా.. అందులో దరఖాస్తు చేసుకున్నవారి వివరాలు నమోదు చేస్తున్నారు. సంక్రాంతి నుంచి ఇందిరమ్మ ఇండ్లు పంపిణీ చేయనునట్లు అసెంబ్లీలో ప్రభుత్వం ప్రకటించింది. ముందుగా నియోజకవర్గానికి 3500 ఇండ్ల చొప్పున సొంత జాగా ఉన్నవారికి ఈ ఇండ్లు మంజూరు చేస్తారు. ఇంటి నిర్మాణానికి రూ.5 లక్షలు నాలుగు విడతలుగా మంజూరు చేయనున్నారు.

ఈ నేపథ్యంలో లబ్ధిదారుల ఎంపిక విషయంలో సీఎం రేవంత్ కీలక ప్రకటన చేశారు. క్రిస్మస్ సందర్భంగా దళిత క్రైస్తవులకు తీపి కబురు చెప్పారు. ఇందిరమ్మ ఇళ్ల లబ్ధిదారుల్లో ఎక్కువమంది దళిత క్రైస్తవులే ఉన్నారని రేవంత్ వెల్లడించారు. వారికే అధిక ప్రాధాన్యం ఇచ్చామన్నారు. మెదక్ చర్చిలో నిర్వహించిన క్రిస్మస్ వేడుకల్లో సీఎం రేవంత్ రెడ్డి పాల్గొన్నారు. ఈ సందర్భంగా కేక్ కట్ చేసి అందరికీ శుభాకాంక్షలు చెప్పారు. అనంతరం మాట్లాడిన ఆయన.. వందేళ్ల చరిత్ర ఉన్న మెదక్ చర్చిలో నిర్వహించిన క్రిస్మస్ వేడుకల్లో పాల్గొనడం ఆనందంగా ఉందని అన్నారు.

గతేడాది తెలంగాణ అసెంబ్లీ ఎన్నికలకు ముందు.. తెలంగాణ కాంగ్రెస్ అధ్యక్షుడిగా మెదక్ చర్చికి వచ్చినట్లు తెలిపారు. రాష్ట్రంలో కాంగ్రెస్ ప్రభుత్వం రాబోతోందని తాను ఆరోజే చెప్పానని గుర్తుచేశారు. అనుకున్నట్లే తెలంగాణ ప్రజల ఆశీర్వాదంతో రాష్ట్రంలో ప్రజా ప్రభుత్వాన్ని ఏర్పాటు చేసినట్లు తెలిపారు. రాష్ట్ర అభివృద్ధికి మెదక్ జిల్లా ప్రజల సహకారం కావాలని ఆకాంక్షించారు. వందేళ్ల క్రితం కరువు, కాటకాలు నిర్మూలించడానికి మెదక్‌లో చర్చిని నిర్మించారని సీఎం గుర్తు చేశారు. పనికి ఆహార పథకానికి మెదక్ చర్చి స్ఫూర్తి అని అన్నారు.

రాష్ట్రంలో అన్ని వర్గాలను తమ ప్రభుత్వం ఆదుకుంటుందని వెల్లడించారు. పేద విద్యార్థుల కోసం ఫీజు రీయింబర్స్‌మెంట్ పథకాన్ని అమలు చేస్తున్నట్లు చెప్పారు. వచ్చే ఏడాది మళ్లీ మెదక్ చర్చికి వస్తానని.. తమ ప్రజా ప్రభుత్వాన్ని దీవించండని సీఎం రేవంత్‌రెడ్డి కోరారు. అంతకుముందు.. చర్చిలో సీఎం రేవంత్ ప్రత్యేక ప్రార్థనలు చేశారు. పలు అభివృద్ధి పనులకు శంకుస్థాపన చేశారు. మెదక్ చర్చి అభివృద్దికి కట్టుబడి ఉంటామని.. ఏం కావాలన్న మంజురు చేస్తామని సీఎం రేవంత్ హామీ ఇచ్చారు. ఈ కార్యక్రమంలో మంత్రులు దామోదర రాజనర్సింహ్మా, పొంగులేటి శ్రీనివాస్ రెడ్డి, పీసీసీ అధ్యక్షుడు మహేష్ కుమార్ గౌడ్, ఎమ్మెల్యే మైనంపల్లి రోహిత్ సహా పలువురు నేతలు పాల్గొన్నారు.