రేవతి కుటుంబానికి రూ.2 కోట్ల ఆర్థిక సాయం: అల్లు అరవింద్

పుష్ప-2 సినిమా రిలీజ్ సందర్భంగా ఈనెల 4వ తేదీన హైదరాబాద్ ఆర్టీసీ క్రాస్ రోడ్‌లో ఉన్న సంధ్య థియేటర్ వద్ద జరిగిన తొక్కిసలాట ఘటనలో రేవతి అనే మహిళ ప్రాణాలు కోల్పోగా.. ఆమె 9 ఏళ్ల కుమారుడు ప్రస్తుతం కిమ్స్ ఆస్పత్రిలో చికిత్స పొందుతున్న విషయం తెలిసిందే. అయితే ఈ కేసులో ఇప్పటికే ఐకానిక్ స్టార్ అల్లు అర్జున్ సహా పలువురు అరెస్ట్ కాగా.. బెయిల్‌పై బయటికి వచ్చారు. ఇక ఈ సంధ్య థియేటర్ వద్ద జరిగిన తొక్కిసలాట తెలంగాణలోనే కాకుండా యావత్ దేశవ్యాప్తంగా తీవ్ర దుమారం రేపిన సంగతి తెలిసిందే. ఇక తెలంగాణలో రాజకీయంగా తీవ్ర చర్చనీయాంశంగా మారిన ఈ వ్యవహారంలో బాధిత కుటుంబానికి అండగా ఉంటామని ఇప్పటికే అల్లు అర్జున్ సహా పుష్ప-2 సినిమా బృందం ప్రకటించింది.

ఇక రేవతి కుటుంబ బాధ్యత కోసం చర్యలు తీసుకున్నట్లు ప్రొడ్యూసర్ అల్లు అరవింద్ తెలిపారు. కిమ్స్ ఆస్పత్రిలో గత 20 రోజులుగా చికిత్స పొందుతున్న శ్రీతేజ్ భవిష్యత్‌ కోసం ఆర్థిక సాయం ప్రకటించినట్లు తెలిపారు. మొత్తంగా శ్రీతేజ్ కుటుంబానికి భరోసా ఇచ్చేందుకు.. రూ.2 కోట్లు ఇవ్వనున్నట్లు చెప్పారు. ఇందులో అల్లు అర్జున్ రూ.1 కోటి.. డైరెక్టర్ సుకుమార్ రూ.50 లక్షలు.. మైత్రీ మూవీస్ సంస్థ రూ.50 లక్షలు.. ఫిలిం డెవలప్‌మెంట్ కార్పొరేషన్ -ఎఫ్‌డీసీ ఛైర్మన్ దిల్‌రాజుకు అందించినట్లు అల్లు అరవింద్ స్పష్టం చేశారు. ఇక ప్రస్తుతం కిమ్స్ ఆస్పత్రిలో చికిత్స పొందుతున్న శ్రీతేజ్ ఆరోగ్యం క్రమంగా మెరుగుపడుతోందని చెప్పిన అల్లు అర్జున్.. కళ్లు తెరుస్తున్నాడని పేర్కొన్నారు.

ఇక ఆ వ్యవహారానికి సంబంధించి రేవతి భర్త, శ్రీతేజ్ తండ్రి భాస్కర్ కీలక ప్రకటన చేశారు. ప్రస్తుతం తన కొడుకు శ్రీతేజ్ కోలుకుంటున్నాడని.. చికిత్సకు స్పందిస్తున్నాడని పేర్కొన్నారు. తమ వల్ల అల్లు అర్జున్ అరెస్ట్ కావడం ఇష్టం లేదని తెలిపిన ఆయన.. కేసును వెనక్కి తీసుకుంటానని సంచలన వ్యాఖ్యలు చేశారు. తెలంగాణ సర్కార్ తరఫున మంత్రి కోమటిరెడ్డి వెంకటరెడ్డి హామీ ఇచ్చారని తెలిపారు. అల్లు అర్జున్ కూడా రూ.25 లక్షలు ప్రకటించి రూ.10 లక్షలు ఇచ్చినట్లు చెప్పారు. మైత్రీ మూవీస్ సంస్థ కూడా రూ. 50 లక్షలు ఇచ్చిందని వెల్లడించారు.