రేవంత్ రెడ్డికి నేనే స్వయంగా శాలువా కప్పి సన్మానం చేస్తా

బీఆర్ఎస్ ఎమ్మెల్యే, మాజీ మంత్రి గంగుల కమలాకర్ ఇంట్రెస్టింగ్ వ్యాఖ్యలు చేశారు. సీఎం రేవంత్ రెడ్డి ఆ పని చేస్తే తామే స్వయంగా శాలువా కప్పి సన్మానం చేస్తామని గంగుల కమలాకర్ తెలిపారు. తెలంగాణ భవన్‌లో మీడియా సమావేశంలో మాట్లాడిన గంగుల కమలాకర్.. కులగణన నివేదికపై కీలక వ్యాఖ్యలు చేశారు. మొదటి నుంచి కాంగ్రెస్ పార్టీ బీసీల వ్యతిరేకి అని ఆరోపించిన గంగుల కమలాకర్.. అసెంబ్లీలో పెట్టిన కులగణన నివేదిక ఓ బోగస్ అని కీలక కామెంట్ చేసారు. కాంగ్రెస్ ప్రభుత్వం చేసిన తప్పులతో బీసీ జాతికి అన్యాయం జరిగిందని ఆరోపించారు. సభలో రేవంత్ రెడ్డి, ఉత్తమ్ కుమార్ రెడ్డి బీసీల లెక్కలపై మమ్మల్ని బుల్డోజ్ చేసే ప్రయత్నం చేశారనన్నారు. బుల్డోజ్ చేస్తే భయపడటానికి తాము గొర్రెలమా అంటూ ప్రశ్నించారు.

మరోవైపు.. పదేళ్లకు గానూ 13 శాతం జనాభా పెరుగుదల ఉంటుందని.. ఆ ప్రకారం 4 కోట్ల 25 లక్షల జనాభా ఉంటుందని.. కానీ 3 కోట్ల 75 లక్షల జనాభాకే కులగణన పరిమితం చేసిందని గంగుల కమలాకర్ చెప్పుకొచ్చారు. దాదాపు 50 లక్షల బీసీ జనాభాను మింగేశారన్నారు. ముస్లింలను కలపకుండానే బీసీల జనాభా 56 శాతంపైనే ఉంటుందని.. రేవంత్ రెడ్డి మాత్రం కేవలం 46 శాతం చూపారని తెలిపారు.

అన్ని కులాల శాతం పెరిగి, బీసీల జనాభాను మాత్రం కావాలనే పది శాతం తగ్గించారని గంగుల కమలాకర్ ఆరోపించారు. కాంగ్రెస్ పాలకులకు బీసీలంటే భయమన్నారు. మిగతా కాంగ్రెస్ ప్రభుత్వాలు బీసీలను తొక్కేసినట్టే రేవంత్ సర్కారు కూడా తొక్కేస్తోందన్నారు. తెలంగాణలో రీ సర్వే చేయాలని డిమాండ్ చేశారు. మళ్లీ సర్వే చేస్తే బీసీల జనాభా 56 శాతం వస్తుందన్నారు. రాష్ట్ర ప్రభుత్వానికి దమ్ముంటే కులాల వారీగా జనాభా ఎంతో బయటపెట్టాలని డిమాండ్ చేశారు.

అసెంబ్లీలో బీసీల మీద చాలా ప్రేమ ఉన్నట్లు మాట్లాడారని.. తనను పేరు పెట్టి పిలిచి మరి మాట్లాడారని గంగుల కమలాకర్ తెలిపారు. నిజంగా బీసీల మీద ప్రేమ ఉంటే.. బీసీలను 46 శాతం నుంచి 56 శాతానికి పెంచితే రేవంత్ రెడ్డికి తామే శాలువా కప్పి సన్మానిస్తామని గంగుల కమలాకర్ కామెంట్ చేశారు.